ក្រសួងសុខាភិបាលប្រកាសទទួលស្គាល់សញ្ញាបត្រពេទ្យរបស់និស្សិតដែលបានបញ្ចប់ការសិក្សាមកពីប្រទេសវៀតណាម បន្ទាប់ពីពួកគេស្នើឲ្យមានការអន្តរាគមន៍ជួយពីនាយករដ្ឋមន្រ្តីហ៊ុន សែន។
កាលពីពេលថ្មីៗនេះក្រុមនិស្សិតពេទ្យទាំងនោះតែងតែស្នើនៅលើទំព័រហ្វេសប៊ុករបស់លោកនាយករដ្ឋមន្រ្តីហ៊ុន សែន ឲ្យលោកជួយអន្តរាគមន៍ស្វែងរកយុត្តិធម៌ឲ្យពួកគេដែលជានិស្សិតអាហារូបករណ៍មកពីសាធារណរដ្ឋសង្គមនិយមវៀតណាម ករណីក្រសួងសុខាភិបាលមិនទទួលស្គាល់សញ្ញាបត្ររបស់ពួកគេ។
ទោះបីជាយ៉ាងណាក្រសួងសុខាភិបាលបានចេញសេចក្ដីជូនដំណឹងមួយចុះថ្ងៃទី ០៤ខែ ឧសភា ស្ដីពីការទទួលស្គាល់សញ្ញាបត្រវេជ្ជបណ្ឌិតមកពីសាធារណរដ្ឋសង្គមនិយមវៀតណាម។
ក្នុងសេចក្ដីជូនដំណឹងដដែលលើកឡើងថា៖ «ក្រសួងសុខាភិបាលសម្រេចទទួលស្គាល់សញ្ញាបត្រវេជ្ជបណ្ឌិតដែលត្រឹមត្រូវចេញដោយគ្រឹះស្ថានបណ្ដុះបណ្ដាលក្នុងវិស័យសុខាភិបាលស្របច្បាប់ពីសាធារណៈសង្គមនិយមវៀតណាម»។
ក្នុងសេចក្ដីជូនដំណឹងដដែលក្រសួងសុខាភិបាលលើកឡើងថាការទទួលស្គាល់សញ្ញាបត្រនេះធ្វើឡើងក្រោយពីក្រសួងបានពិនិត្យ និងពិភាក្សាឡើងវិញ ដោយមានការឯកភាពពីប្រមុខរាជរដ្ឋាភិបាលកម្ពុជាផងដែរ៕