សាលាឧទ្ធរណ៍ បានសម្រេចតម្កល់សាលាក្រមសាលាដំបូងរាជធានីភ្នំពេញទុកជាបានការដដែល ដោយបន្ដឃុំខ្លួនប្រធានអតីតបក្សប្រឆាំង លោក កឹម សុខា ដដែល។
នៅព្រឹកថ្ងៃអង្គារនេះ សាលាឧទ្ធរណ៍បានបើកសវនាការជាអសាធារណៈមួយ លើបណ្ដឹងសាទុក្ខរបស់ក្រុមមេធាវីការពារក្ដី ដែលសុំឲ្យដោះលែង លោក កឹម សុខា បានក្រៅឃុំជាបណ្ណោះអាសន្ន។
ប៉ុន្ដែ មេធាវីម្នាក់ ដែលការពារក្ដីឲ្យលោក កឹម សុខា គឺលោក ផែង ហេង ប្រាប់ VOD នៅថ្ងៃនេះថា សភាស៊ើបសួរសាលាឧទ្ធរណ៍ សម្រេចមិនដោះលែង លោក កឹម សុខា ឲ្យនៅក្រៅឃុំឡើយ ពាក់ព័ន្ធសំណុំរឿងដែលតុលាការចោទថា បានឃុបឃិតជាមួយបរទេស ដើម្បីផ្ដួលរំលំរដ្ឋាភិបាលស្របច្បាប់។
អតីតប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួន កាលពីថ្ងៃទី៣ខែកញ្ញាឆ្នាំមុន និងបញ្ជូនទៅឃុំខ្លួន នៅពន្ធនាគារត្រពាំងផ្លុង ខេត្តត្បូងឃ្មុំ ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ជុំវិញវីដេអូឃ្លីប ដែលលោកថ្លែងនៅប្រទេសអូស្ត្រាលី កាលពីឆ្នាំ២០១៣៕