កម្ពុជានឹងទទួលខុសត្រូវលើថវិកាទាំងស្រុងសម្រាប់ដំណើរការមជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC) ក្នុងកំឡុងពេល២ឆ្នាំដំបូងគឺឆ្នាំ២០១៧និង២០១៨។
សេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិកម្ពុជាឲ្យដឹងថា កិច្ចប្រជុំនៅក្នុងប្រទេសកម្ពុជាកាលពីថ្ងៃទី៣ខែកក្កដាកន្លងទៅនេះ មានការពិភាក្សាពិនិត្យលើថវិកាឆ្នាំ២០១៧ រៀបចំផែនការការងារឆ្នាំ ២០១៧-២០១៨ និងការជ្រើសរើសនាយកប្រតិបត្តិ។ ក្នុងសេចក្តីប្រកាសព័ត៌មានក៏បានបញ្ជាក់ថា ក្នុងរយៈពេល២ឆ្នាំនេះ កម្ពុជាទទួលខុសត្រូវលើការចំណាយ។
មជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC) ដែលមាន លោក គ្រីស្តូហ្វឺរ ម៉ុនតេរ៉ូ ជាប្រធាននៃគណៈកម្មាធិការអចិន្ត្រៃយ៍ ក្នុងពេលបច្ចុប្បន្នត្រូវបានផ្តួចផ្តើមគំនិតបង្កើតដោយ លោក ហ៊ុន សែន ក្នុងអំឡុងកិច្ចប្រជុំកំពូលអាស៊ានលើកទី២១ ឆ្នាំ២០១៦ ដែលមានកម្ពុជាជាម្ចាស់ផ្ទះ។
មជ្ឈមណ្ឌលតំបន់អាស៊ានសម្រាប់សកម្មភាពមីន(ARMAC) នឹងក្លាយជាមជ្ឃមណ្ឌលមួយដែលអនុញ្ញាតឲ្យប្រទេសសមាជិកអាស៊ានបានសិក្សា ទទួល និងចែកចាយចំណេះដឹងពីផលប៉ះពាល់នៃសំណល់គ្រាប់បែកក្រោយសង្គ្រាម និងលើកទឹកចិត្តឲ្យជួយរកដំណោះស្រាយផងដែរ៕
ហ៊ាង សុគន្ធារី
