ភរិយាលោក កែម ឡី នឹករឭកស្វាមី ខណៈជិតដល់ខួប១ឆ្នាំនៃឃាតកម្ម

អ្នកស្រី ប៊ូ រចនា ភរិយាសពលោកបណ្ឌិត កែម ឡី កាលពីពេល​កន្លង​មក

ខណៈដែលបុណ្យខួប១ឆ្នាំនៃការបាញ់សម្លាប់លោកបណ្ឌិត កែម ឡី ជិតមកដល់ ភរិយារបស់លោកបានសំដែង​ការ​នឹករឭក​ស្វាមីប្រកប​ដោយ​មោទនភាពចំពោះអ្វីដែលអ្នកវិភាគរូបនេះបានធ្វើឲ្យមានការកែប្រែនៅក្នុង​សង្គម ហើយមានមនុស្ស​រាប់លាននាក់​ឲ្យ​តម្លៃលោក។

នៅលើទំព័រហ្វេសប៊ុក អ្នកស្រី ប៊ូ រចនា នៅថ្ងៃទី៥ខែកក្កដានេះ បានសរសេរថា «ជិតមួយឆ្នាំហើយដែលពួកតិរិច្ឆានបានឆក់យកជីវិតបងពីអូននិងកូនៗ អូននឹកបងណាស់ តែបងកុំបារម្ភអីដោយសារមានបងប្អូនឈាមខ្មែរទាំងក្នុងនិងក្រៅប្រទេសជាង២លាននាក់ដែរបានលើកទឹកចិត្តអូន ធ្វើឲ្យអូនរឹងមាំ»។

អ្នកស្រី ប៊ូ រចនា បន្តថា «អូនពិតជាមានមោទនភាពណាស់ដែលមានបងជាស្វាមី បងលះបង់ជីវិតដើម្បីជាតិខ្មែរ »។

បើតាមអ្នកស្រី ប៊ូ រចនា ពេលនេះ គាត់និងកូនៗកំពុងរងចាំទៅរស់នៅប្រទេសមួយដែលលោក កែម ឡី ប៉ងប្រាថ្នាចង់ឲ្យកូនៗគាត់បានទៅរៀន ដោយមានការជួយជ្រោមជ្រែងពីបងប្អូនខ្មែរដែលស្រលាញ់អ្នកវិភាគរូបនេះ។

លោក កែម ឡី អ្នកវិភាគនិងជាអ្នកស្រាវជ្រាវពីការអភិវឌ្ឍសង្គម ត្រូវបានគេបាញ់សម្លាប់ កាលពីថ្ងៃទី១០ខែកក្កដាឆ្នាំ២០១៦ នៅក្នុងហាងទំនិញមួយរបស់ស្ថានីយ៍ប្រេង កាល់តិច ជាប់ស្តុបបូកគោ។

ឃាតកម្មនេះ បានកើតឡើងតែប៉ុន្មានថ្ងៃក្រោយពីលោក កែម ឡី ធ្វើ​ការបក​ស្រាយ​លើ​របាយការណ៍ស៊ើបអង្កេតមួយរបស់អង្គការឃ្លាំមើលបរិស្ថានពិភពលោក Global Witness ដែលបានបរិយាយពីការរកស៊ីរបស់ក្រុមគ្រួសារ លោក ហ៊ុន សែន៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ