សំណង់អគារនៅជាប់​របង​ស្តាត​អូឡាំពិក ត្រូវបានគេរាយការណ៍ថាបាន​បាក់មួយផ្នែក​កាលពី​យប់​មិញនេះ

សំណង់អគារនៅជាប់​របង​ស្តាត​អូឡាំពិក (ដោយ សាយ ទ្បាលីស)

ប្រភពដែលសុំមិនឲ្យបញ្ចេញឈ្មោះបានទូរសព្ទប្រាប់វីអូឌីឲ្យដឹងថានៅម៉ោងប្រមាណ៣ព្រឹកនេះ សំណង់អាគារដែលទើបនឹងសង់ថ្មីរបស់ក្រុមហ៊ុន OCIC នៅក្នុងបរិវេណការដ្ឋានសំណង់អូឡាំពិកក្នុងសង្កាត់វាលវង់ ខណ្ឌ៧មករាបានបាក់ ដែលលោកថាបណ្តាលមកពីជើងទម្រនៃសំណង់ដែលចាក់ថ្មីមិនរឹងមាំ។

ប្រភពដដែលបន្ថែមថាក្រោយពីមានហេតុការណ៍នេះក្រុមហ៊ុននិងមេការនៃសំណង់នេះបានហាមប្រាមមិនឲ្យកម្មករបញ្ចេញព័ត៌មាននេះទេនិងបានលើកសំណាញ់បិទបាំងសំណង់ដែលនេះទៀតផង។

ទាក់ទងទៅនឹងព័ត៌មាននេះ អគ្គនាយករងនៃក្រុមហ៊ុន OCIC លោក ទូច សំណាង បានបដិសេធយ៉ាងខ្លីថាដូចជាមិនមានហេតុការណ៍នេះកើតឡើងទេ ហើយអះអាងថាលោកជាប់រវល់។

វីអូឌីមិនទាន់អាចទាក់ទងអ្នកនាំពាក្យក្រសួងដែនដី លោក សេង ឡូត និងលោក ជៀម សុផលមករា បាននៅឡើយទេនៅព្រឹកថ្ងៃសុក្រនេះ ដោយទូរសព្ទចូលតែគ្មានអ្នកទទួល។

ចំណែកអ្នកនាំពាក្យសាលារាជធានីភ្នំពេញលោក មាន ចាន់យ៉ាដា ថាលោកមិនទាន់ទទួលបានព័ត៌មាននេះនៅឡើយទេ។ ដោយលោកថាលោកនឹងពិនិត្យជាមួយអភិបាលខណ្ឌ៧មករាសិន។

វីអូឌីមិនអាចទាក់ទងសុំព័ត៌មានពីអភិបាលខណ្ឌ៧មករាលោក លឹម សុភា បាននៅឡើយ ដោយលោកជាប់រវល់ប្រជុំ។

កាលពីថ្ងៃទី៨ខែមិថុនាកន្លងទៅ ក្រោយពីមានភ្លៀងមួយមេធំបានបណ្តាលឲ្យបាក់ស្រុតផ្លូវដែលនៅតាមរបងនៃសំណង់អាគាររបស់ក្រុមហ៊ុននេះផងដែរ។ ហើយកាលពីថ្ងៃទី២ ខែវិច្ឆិកា ឆ្នាំ២០១៤ មានដែកនៃសំណង់អាគារនៃក្រុមហ៊ុននេះបានធា្លក់ត្រូវក្បាលស្ត្រីម្នាក់បណ្តាលឲ្យស្លាប់បាត់បង់ជិវិត។

គួរបញ្ជាក់ផងដែរថាកាលពីថ្ងៃ១៥ កក្កដា ២០១៥ មានករណីបាក់បេតុងចាក់ថ្មីសង្កត់ទៅលើកម្មករសំណង់អាគារនៅផ្សារត្រពាំងថ្លឹង ដែលមានទីតាំងនៅតាមបណ្តោយផ្លូវវេងស្រេង ក្នុងសង្កាត់ចោមចៅ ខណ្ឌពោធ៌សែនជ័យ ដែលបណ្តាលឲ្យមនុស្សបីនាក់រងរបួសធ្ងន់និងម្នាក់ទៀតបានស្លាប់ក្នុងហេតុការណ៍នោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ