ប្រជាសហគមន៍ចំនួន៣ បាននាំគ្នាបោះជុំរុំនៅក្បែក្រុមហ៊ុនចិនមួយ នៅស្រុកឆែប ខេត្ដព្រះវិហារ ដោយទទួចឲ្យអាជ្ញាធរទប់ស្កាត់គ្រឿងចក្រក្រុមហ៊ុន ដែលអ្នកភូមិថាបានឈូសឆាយចូលដីព្រៃសហគមន៍ពួកគាត់។
ប្រជាសហគមន៍ទាំងនោះមកពីស្រុកត្បែងមានជ័យ ស្រុកជ័យសែន និងស្រុកឆែប ខេត្ដព្រះវិហារ។
តំណាងសហគមន៍នៅស្រុកឆែប លោក ជុំ សុភឿត ប្រាប់VODនៅថ្ងៃនេះថា ពួកគេបានរួមគ្នាបោះតង់នេះ ចាប់ពីថ្ងៃទី១ខែមករាឆ្នាំ២០១៧មក បន្ទាប់ពីគ្រឿងចក្រជាច្រើនគ្រឿងរបស់ក្រុមហ៊ុនចិនហេងរ៉ូយ ធ្វើការឈូសឆាយដីព្រៃសហគមន៍ ដោយមិនមានការទប់ស្កាត់ពីអាជ្ញាធរ។លោកបន្ដថា ដីព្រៃសមូហភាពរបស់ប្រជាសហគមន៍ជាងមួយពាន់ហិកតា នៅឃុំសង្កែពីរ ត្រូវបានក្រុមហ៊ុនចិន ឈូសឆាយរំលោភយកជាបន្ដបន្ទាប់ ដែលលោកថា ប្រឈមនិងការបាត់បង់ ខណៈដីនោះពួកគាត់បានកាន់កាប់និងថែរក្សាទុកជាសម្បត្ដិរួម។លោកបន្ដថា៖ «គ្រឿងចក្រ១០គ្រឿងតែខ្ញុំចាប់បានមួយគ្រឿងព្រោះអីគេរំលែកការដ្ឋានមួយកំណាត់ៗក្នុងមួយការដ្ឋានមានបីទៅបួនគ្រឿងខ្ញុំចង់ទាមទារឲ្យបានដីសហគមន៍របស់ខ្ញុំទាំងអស់សម្រាប់ប្រើប្រាស់ទៅមុខទៀត»។
តំណាងប្រជាសហគមន៍មកពីស្រុកជ័យសែន ដែលចូលរួមបោះជុំរុំ អ្នកស្រី ហួត ម៉ាលី ឲ្យដឹងថា ដីព្រៃសហគមន៍ដែលពួកគាត់ទទួលបានអនុផលព្រៃឈើជាច្រើនឆ្នាំមកហើយ ប៉ុន្ដែក្រុមហ៊ុនចិនហេងរ៉ូយនោះ នៅតែលួចឈូសឆាយជាបន្ដបន្ទាប់ បើទោះបីសហគមន៍មានច្បាប់ការពារពីរដ្ឋាភិបាលក៍ដោយ ។អ្នកស្រីបន្ដថា ក្រុមហ៊ុននោះ បានសន្យាផ្អាកឈូសឆាយបណ្តោះអាសន្ន ខណៈដែលប្រជាសហគមន៍ ឃាត់គ្រឿងចក្រមួយគ្រឿង កាលពីថ្ងៃទី១ខែមករា ប៉ុន្ដែគ្មានប្រសិទ្ធិភាព ទើបពួកគាត់នាំគ្នាបោះជំរុំការពារកុំឲ្យក្រុមហ៊ុនចិនលួចឈូសឆាយបន្ដទៀត។អ្នកស្រីព្រមានថា ពួកគេនឹងរួមគ្នាបោះតង់ការពារដីពួកគេរហូត បើសិនអាជ្ញាធរមិនចាត់វិធានការឲ្យក្រុមហ៊ុនចិននោះ បញ្ជប់ឈូសឆាយនោះទេ។ អ្នកស្រីបន្ដថា៖ «កាលពីថ្ងៃទី៤និងទី៥ម្សិលនេះគាត់បានដើរល្បាតមើលទៅគាត់ឃើញអាប៊ុលឈូសជាបន្ដបន្ទាប់ពីទៀតអត់ដូចកិច្ចសន្យាដូចដែលគេធ្វើទេ ចឹងគាត់អត់ទុកចិត្ដគាត់បោះទីតាំងចាំល្បាតមើល។ម្សិលគាត់ដេញចេញពីកន្លែង៥គ្រឿងទៀត»។
ករណីនេះ អភិបាលខេត្ដព្រះវិហារលោក អ៊ុន ចិន្ដា មានប្រសាសន៍ថា លោកមិនទាន់ទទួលព័ត៌មាននេះទេ។លោកបន្ដថា៖ «គាត់ដាក់ពាក្យមកខ្ញុំមកខ្ញុំមិនទាន់ទទួលព័ត៌មានហ្នឹងទេ»។
ទោះជាយ៉ាងណា អ្នកសម្របសម្រួលសមាគមការពារសិទ្ធិមនុស្សអាដហុក ខេត្ដព្រះវិហារលោក ឡោ ចាន់ មានប្រសាសន៍ថា ជម្លោះដីធ្លីនៅតំបន់នោះ បានអូសបន្លាយជាច្រើនឆ្នាំមកហើយ ប៉ុន្ដែអាជ្ញាធរគ្មានចំណាត់ការណាមួយនោះទេ ដោយលោកថា ដោយសារមន្ដ្រីមួយចំនួនបានទទួលចំណែកដីព្រៃខ្លះពីក្រុមហ៊ុននោះ។លោកស្នើឲ្យអាជ្ញាធរសម្របសម្រួលបោះបង្គោលកមណត់ព្រំប្រទល់ដីជម្លោះនោះឲ្យបានឆាប់ ដើម្បីឲ្យសហគមន៍ពួកគាត់បានកាន់និងថែរក្សាទុកជាសម្បត្ដិសមូហភាព។
បើតាមលោក ឡោ ចាន់ ឲ្យដឹងថា ពលរដ្ឋដែលបោះជំរុំទប់ស្ដាត់ការឈូសឆាយដីសហគមន៍ បានកើតឡើងជាច្រើនលើកមកហើយ ប៉ុន្ដែស្ថាប័នពាក់ព័ន្ធមិនយកចិត្ដទុកដាក់ដោះស្រាយជូនពួកគាត់៕