ក្នុងជំនួបជាលក្ខណៈអន្តរជាតិកាលពីព្រឹកថ្ងៃអាទិត្យ ទី៥ កុម្ភៈ គេកត់សម្គាល់កីឡាករល្បីឈ្មោះរបស់កម្ពុជា ឆៃ សារ៉ា ដែលមានឈ្មោះជាម្ចាស់ខ្សែក្រវាត់ផង បានត្រឹមតែស្មើពិន្ទុប៉ុណ្ណោះ ជាមួយកីឡាករថៃដែលត្រូវគេអះអាងថាមិនមែនជាជើងក្នុងលំដាប់ជួរមុខរបស់ថៃ។
ប៉ុន្តែពាក់ព័ន្ធនឹងបញ្ហានេះគេដឹងហើយថាស្ថានភាពបំប៉នរបស់កីឡាករកម្ពុជាមិនអាចប្រដូចកីឡាករបរទេសបានទេ។
ការប្រកួតដែលបានធ្វើឡើងនៅលើសង្វៀនទូរទស្សន៍អាស៊ីអាគ្នេយ៍នេះ មានជំនួបរវាងកីឡាករបរទស២រូបនិងកីឡាករកម្ពុជា២រូប ដោយការប្រកួតរបស់គូអន្តរជាតិទាំងពីរសុទ្ធតែបានត្រឹមលទ្ធផលស្មើគ្នានៅចុងការប្រកួតទាំងអស់។
យ៉ាងណាមិញសម្រាប់ តក់ សោភ័ណ្ឌ មកពីម្កុដរាជសីហ៍ ស្មើពិន្ទុជាមួយកីឡាករថៃឈ្មោះ Den Phetchhit មិនមែនជារឿងចម្លែងនោះទេ ប៉ុន្តែសម្រាប់លទ្ធផលស្មើរវាងកីឡាករ ឆៃ សារ៉ា មកពីក្លឹបក្រសួងការពារជាតិ និងកីឡាករថៃដែលត្រូវគេដឹងថាគ្រាន់តែកីឡាករមិនទាន់ទាំងមានឱកាសធ្វើជាបេក្ខភាពក្នុងព្រឹត្តិការណ៍ជម្រុះយកខ្សែក្រវាត់ ទើបជារឿងចាប់អារម្មណ៍។
លោក ថៃ អ៊ូ អ្នកដឹកនាំកីឡាករថៃអោយមកប្រកួតបានអះអាងថាកីឡាករ Chhart Chhay មិនមែនជាកីឡាករលំដាប់ជួរមុខនៅក្នុងប្រទេសថៃនោះទេ ដោយសូម្បីតែការប្រកួតដណ្ដើមជើងឯកណាមួយកក៏មិនទាន់មានឱកាសដែរ កុំថាឡើយឈានដល់គ្រងតំណែងជាម្ចាស់ខ្សែក្រវាត់ដូចគ្នានឹងកីឡាករ ឆៃ សារ៉ា ដែលទើបទទួលបានខ្សែក្រវាត់ជើងក្នុងប្រភេទទម្ងន់៦៣,៥គីឡូក្រាម។
លោកថាអាចបណ្ដាលមកពីកីឡាកររបស់លោកទទួលការបង្វឹកបានច្រើនទើបធ្វើអោយការប្រកួតបញ្ចប់៥ទឹកជាមួយកីឡាករ ឆៃ សារ៉ា ហើយបានត្រឹមស្មើគ្នា។ កីឡាករ Chhart Chhay ត្រូវបានប្រកាសថាធ្លាប់ប្រកួត៦២លើក ឈ្នះ៥៧លើកនិងចាញ់៥លើក ប៉ុន្តែលោកថាគេគ្រាន់តែជាគីឡាករថ្មោងថ្មីរបស់ថៃដែលមិនទាន់មានឱកាសសូម្បីការប្រកួតដណ្ដើមយកខ្សែក្រវាត់នៅប្រទេសថៃប៉ុណ្ណោះ។
លោកបានហៅថ្វីដៃរបស់កីឡាករខ្លួនថាមិនទាន់ដល់កម្រិតត្រូវប៉ះជាមួយកីឡាករលំដាប់ៗនៅក្នុងប្រទេសថៃបើទោះជាអាចទប់ជាមួយម្ចាស់ខ្សែក្រវាត់ ឆៃ សារ៉ា របស់កម្ពុជាធ្វើអោយមានការកោតសរសើរ។
លោកនិយាយថា៖ «អាហ្នឹង(កីឡាករChhart Chhay) នៅថៃចូលគីឡូគេអត់ទាន់រួចទេ តែពេលវាមកវៃជាមួយអា សារ៉ា មានអីម៉ាអែម អា សារ៉ា កុំតែបានចុងទឹក(មានប្រៀប)តិចទេ កុំអីចាញ់អាបស់ខ្ញុំបាត់ហើយ!»។
លោកថាកីឡាករថៃបើទោះជាមិនស្ថិតក្នុងកម្រិតលេខ១និងលេខ២ តែគេមានការបំប៉នច្បាស់លាស់ ទើបកម្រិតប្រកួតរបស់ពួកគេពិបាកអោយកីឡាករកម្ពុជាទប់ជាប់។
លោកសារភាពថាកីឡាករថៃដែលលោកដឹកនាំមកប្រកួតទាល់តែយូរៗម្ដង ទើបលោកសម្រេចចិត្តយកកីឡាករលំដាប់អោយមកប្រកួត ខណៈដែលវត្តមានរបស់កីឡាករកម្រិតនោះ ក៏ពិបាករកដៃអោយប្រកួតនៅកម្ពុជា។
លោកមិនហ៊ានយកកីឡាករល្អៗរបស់ប្រទេសថៃអោយមកប្រកួតនោះទេ ដោយលោកប្រកាសថាបើហ៊ានចំណាយលុយយកកីឡាករប្រភេទនោះអោយមកប្រកួត គឺនៅស្រុកខ្មែរនឹងរកដៃគូដាក់អត់បាន។
លោកនិយាយថា៖ «នៅស្រុកថៃចង់បានកីឡាករលំដាប់ណាក៏បានដែរ តែបើហ៊ានយកខ្សែក្រវាត់ថៃមកប្រកួតជាមួយខ្សែក្រវាត់ខ្មែរវិញ ខ្ញុំថាខ្មាស់គេ ព្រោះស្រុកគេតែម្ចាស់ខ្សែក្រវាត់គឺល្អម្មង អត់មានលេងៗបានទេ!»។
យ៉ាងណាក៏ដោយលោកនៅតែអះអាងថាកីឡាករ ឆៃ សារ៉ា គឺជាកីឡាករល្អ។
លោក តែម ម៉ឺន ប្រធានសហព័ន្ធធ្លាប់បានបញ្ជាក់ថាតម្លៃខ្លួនកីឡាករខ្មែរជាហេតុផលលើករណីនេះ តែលោកថាមិនអាចដំឡើងខ្ពស់អោយស្មើនឹងបរទេសបានទេ ដោយសារតែក្រុមហ៊ុនជាអ្នកឧបត្ថម្ភចំណាយអោយប៉ុស្ដិ៍ក៏មិនច្រើន ដែលអាចបណ្ដាលមកពីការផ្សព្វផ្សាយផលិតផលនៅក្នុងព្រឹត្តិការណ៍ប្រដាល់ក៏មិនសូវលក់ដាច់បើធៀបនឹងប្រទេសរបស់ដែលមានពលរដ្ឋដល់រាប់រយលាននាក់មិនពិបាកចំណេញ។
យ៉ាងណាមិញលោកថាកម្រិតប្រកួតរបស់កីឡាករកម្ពុជាចាត់ទុកថាល្អច្រើនហើយបើធៀបនឹងអតីតកាលដែលសូម្បីតែកីឡាករថៃទើបប្រកួតតាមវត្តក៏ទប់មិនជាប់នោះ។
កីឡាករ ឆៃ សារ៉ា បានសារភាពថាកីឡាករ Chhart Chhay កណ្ដាប់រហ័ស និងជំហររឹង ទើបលោកវាយបុកមិនត្រូវ។
លោកបានទទួលស្គាល់ថាបើហ៊ានសម្រុកខ្លាំងនឹងត្រូវកីឡាករជាគូប្រកួតវាយសន្ធាប់អោយសន្លប់នោះផង ទើបលោកយល់ថាមិនហ៊ានចូលខ្លាំង ហើយបានត្រឹមលទ្ធផលស្មើក៏ចាត់ទុកខ្លួនធ្វើបានល្អសម្រាប់ការប្រកួតនេះ៕