គ្មានអ្នកណាមិនដឹងទេថាតារាសម្ដែងនិងជាពិធីករ លោកវីជេ អាឡាស្កូ ដែលពលករកូរ៉េភាគច្រើនស្គាល់ថាឈ្មោះ អៀង សំអាត គឺជាអតីតពលករកូរ៉េ ដែលបានក្លាយជាតារាសិល្បៈក្នុងពេលដែលលោកបម្រើការរយៈពេល៨ឆ្នាំនៅទីនោះ។
ជោគជ័យតែក្នុងរយៈពេលខ្លីក្រោយបញ្ចប់ការងារនៅក្នុងប្រទេសកូរ៉េ លោកបានប្រកាសថាខ្លួននឹងបើកផ្លូវជួយដល់ពលករដែលបញ្ចប់ការងារនៅក្នុងប្រទេសកូរ៉េអោយក្លាយជាតារាសិល្បៈ ដោយមិនចាំបាច់ឆ្លងកាត់ការតស៊ូវែងឆ្ងាយដូចលោកនោះផង។
វីជេ អាឡាស្កូ បានអះអាងថាក្នុងពេលលោកនៅបម្រើការជាពលករនៅក្នុងប្រទសកូរ៉េ លោកមានក្ដីស្រម៉ៃចង់ក្លាយជាតារាសិល្បៈនិងជាពិធីករអាជីពយ៉ាងខ្លាំង ដោយលោកមិនដែលគិតថាខ្លួនមានឱកាសបានឈរក្នុងចំណោមតារាល្បី ហើយមានអ្នកគាំទ្រជាច្រើនស្គាល់ថាជាតារានោះទេ។ លោកចាត់ទុកថាអ្វីដែលខ្លួនសម្រេចបានកើតចេញពីឱកាស បើទោះជាខ្លួនមានសមត្ថភាពជារបស់ខ្លួន។
លោកក៏បានត្អូញត្អែរពីការលំបាករាប់មិនអស់ មុនមានសំណាងបានក្លាយជាតារាសិល្បៈនាពេលចុងក្រោយផងដែរ ខណៈដែលលោកបញ្ជាក់ថាក្នុងនាមជាពលករទៅបម្រើការនៅក្នុងប្រទេសកូរ៉េ បើទោះជាមានសមត្ថភាពក៏មិនសូវមានអ្នកជំរុញ។
លោកប្រកាសជាចំហថានឹងបើកផ្លូវជួយអ្នកមានសមត្ថភាពផ្នែកសិល្បៈ ដែលជាពលករនៅកូរ៉េដូចខ្លួន ដោយសន្យារដឹកដៃអោយឆាប់ដល់គោលដៅ ដើម្បីអោយពួកគេមានសំណាងបានក្លាយជាតារាសម្ដែងឬជាពិធីករក្រោមការជ្រោមជ្រែងរបស់លោកតែម្ដង។
មកទល់ពេលនេះលោកថាខ្លួនមានទំនាក់ទំនងជាមួយពលករនៅទីនោះច្រើន ដោយសារតែពេលបម្រើក្រៅពីជាពលករ លោកក៏ជាពិធីករក្នុងកម្មវិធីសិល្បៈរបស់ពលករ ដោយសារតែការផ្ដល់ឱកាសនិងភាពក្លាហាន។
រយៈពេល៨ឆ្នាំនៅក្នុងប្រទេសកូរ៉េ លោកថាខ្លួនមានឱកាសក្លាយជាពិធីកររហូតមានការទទួលស្គាល់ពីសមាគមខ្មែរនៅក្នុងប្រទេសកូរ៉េ ដោយលោកក៏មានការផ្ដល់ឱកាសអោយរៀបចំកម្មវិធីសិល្បៈធំៗក្នុងអំឡុងបុណ្យចូលឆ្នាំខ្មែរនិងកម្មវិធីដើរម៉ូដ ដែលមានការចូលរួមពីតារាកូរ៉េជាការដោះដូរវប្បធម៌ជាមួយក្រុមតារារបស់ពលករខ្មែរនៅកូរ៉េពេលលោកបម្រើការនោះផង។
អាឡាស្កូ បានចាត់ទុកការទទួលពានជាតារាឆ្នើមផ្នែពិធីករកាលពីថ្ងៃទី២ កុម្ភៈ ក្នុងកម្មវិធីប្រកួតប្រជែងស្ពានលេខ១១របស់ទូរទស្សន៍អប្សរាថាជាជោគជ័យដែលបានពីឱកាសការងារនៅក្នុងប្រទេសកូរ៉េនោះផង។
លោកថាបងប្អូនដែលបម្រើនៅក្នុងប្រទេសកូរ៉េច្រើនឡើង បានកោតសរសើរចំពោះលោកដែលជួយលើកមុខលើកមាត់ដល់ពលករកូរ៉េអោយមហាជនដឹងថាពលករកូរ៉េក៏មានសមត្ថភាពជោគជ័យក្នុងសិល្បៈ។
លោកនិយាយថា៖ «ទម្រាំមកដល់ពេលហ្នឹង ខ្ញុំពិបាកច្រើនណាស់ ចឹងហើយទើបខ្ញុំប្រកាសថាក្រោយទទួលជោគជ័យ ខ្ញុំអត់ជោគជ័យតែឯងទេ ខ្ញុំនឹងយកឱកាសនេះដឹកដៃបងប្អូនពលករមកពីកូរ៉េដែលមានសមត្ថភាពអោយពួកគាត់បានក្លាយជាសិល្បៈដែរ ព្រោះបើអោយគាត់ផ្សងព្រេង គាត់ប្រាកដជាមិនដល់គោលដៅទេហើយមិនស្រួលបាក់ទឹកចិត្តទៀត!»។
លោកថាខ្លួនមិនទាន់ក្លាយជាតារាល្បីតាមការចង់បាននៅឡើយទេ ប៉ុន្តែមានការទទួលស្គាល់ច្រើនឡើងថាលោកគឺជាតារាសិល្បៈម្នាក់ ទាំងការច្រៀងរាំ សម្ដែង និងពិធីករ។ ក្នុងនោះបើនិយាយពីឱកាសថតស្ពតសម្អាងការ គឺមានរាប់មិនអស់។
លោកវីជេ អាឡាស្កា បន្តថាសម្រាប់ពលករកូរ៉េដែលចង់ប្រឡូកសិល្បៈ ហើយមានសមត្ថភាពមិនចាំបាច់ផ្សងព្រេងនិងហែលឆ្លងការលំបាកដូចលោកមុនពេលចូលប្រឡូកសិល្បៈនោះទេ សំខាន់អោយតែមានសមត្ថភាពគឺលោកប្រកាសផ្ចុងផ្ដើមអោយក្លាយជាតារាសិល្បៈតែម្ដង ដោយមិនគិតថានឹងមានជំនាន់ក្រោយល្អជាងខ្លួននោះទេ។
លោកក៏មានគម្រោងបណ្ដុះដល់ពលករដែលមានសមត្ថភាពអោយក្លាយជាអ្នកចម្រៀងអាជីពនិងជាអ្នកសម្ដែងអាជីពអោយជោគជ័យផងដែរ ដោយសារតែក្នុងពេលនេះក្រៅពីមានទំនាក់ទំនងច្រើនជាមួយផលិតករ និងក្រុមហ៊ុនតូចធំក៏មានបទពិសោធន៍ច្រើនពាក់ព័ន្ធនឹងការងារសិល្បៈ។ ក្នុងនោះលោកក៏បានបើកវង់តន្ត្រីផ្ទាល់ខ្លួននិងទទួលរៀបចំកម្មវិធីប្រគំតន្ត្រីតូចធំ ដែលមិនពិបាកលើកស្ទួយដល់មានសមត្ថភាពផង។
លោកនិយាយថា៖ «ដោយសារខ្ញុំជាពលករកូរ៉េ ខ្ញុំដឹងថាការប្រឡូកសិល្បៈអោយល្បីគឺពិបាកណាស់ ចឹងហើយទើបក្រោយមានគេស្គាល់ខ្ញុំតាំងចិត្តថាអត់ភ្លេចកំណើតដើមទេ គឺត្រូវតែជួយពួកគាត់ដែលស្រឡាញ់សិល្បៈអោយមានឱកាសដូចខ្ញុំ ព្រោះពួកគាត់មានសមត្ថភាពច្រើនណាស់ តែអត់មានឱកាស!»។
លោកថាក្នុងពេលដ៏ខ្លីនឹងមានវត្តមានតារាសិល្បៈជាពលករកូរ៉េបង្ហាញខ្លួនដោយពលករទាំងនោះនឹងអាចមានទាំងតារាចម្រៀង តារាសម្ដែង និងពិធីករ ដោយសារតែដូចលោក៕