រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានប្ដឹងទារសំណង ១០០រៀលពីម្ចាស់អាជីវកម្មជីកដីលក់នៅខេត្តកណ្ដាល ដែលក្រសួងនេះចោទថា បានធ្វើអាជីវកម្មគ្មានការអនុញ្ញាត បានជេរប្រមាថ និងបរិហារកេរ្តិ៍ជាសាធារណៈ ប៉ុន្តែ មន្ត្រីសិទ្ធិមនុស្សបានជំរុញឲ្យមានចំណាត់ការទៅលើអាជីវកម្មខុសច្បាប់ដទៃទៀតផង។
ក្នុងពាក្យបណ្តឹងចំនួន ២ដែលផ្ញើរទៅកាន់ព្រះរាជអាជ្ញាអមសាលាដំបូងខេត្តកណ្តាលចុះថ្ងៃទី១ កុម្ភៈ លោក ស៊ុយ សែម បានចោទលោក រឿង សំអាន និងភរិយារបស់លោកថា បានធ្វើអាជីវកម្មជីកដីនៅឃុំស្វាយរលំ ស្រុកស្អាង យកទៅលក់ ដោយពុំមានច្បាប់អនុញ្ញាតនោះឡើយ។
ក្រៅពីចោទថា ធ្វើអាជីវកម្មដោយគ្មានច្បាប់អនុញ្ញាតហើយ រដ្ឋមន្ត្រីរូបនេះ បានចោទម្ចាស់អាជីវកម្មនោះថា បានប្រើពាក្យសម្ដីជេរប្រមាថមន្ត្រីក្រសួងនេះផងដែរ អំឡុងពេលមន្ត្រីក្រសួងនេះចុះទៅត្រួតពិនិត្យកាលពីថ្ងៃទី១៨ ខែមករាកន្លងមក។
បើតាមពាក្យបណ្ដឹងនោះ លោក ស៊ុយ សែម បានទាមទារទៅតុលាការខេត្តកណ្ដាល ឲ្យផ្ដន្ទាទោសប្ដីប្រពន្ធមួយគូនេះ ព្រមទាំងទាមទារសំណងជំងឺចិត្ត ១០០រៀល។
វីអូឌីមិនអាចស្វែងរកការបកស្រាយពីម្ចាស់អាជីវកម្ម លោក រឿង សំអាន និងភរិយារបស់លោក ជុំវិញការចោទប្រកាន់នេះបានទេ។
ប៉ុន្តែ អ្នកនាំពាក្យសាលាដំបូងខេត្តកណ្តាល លោក សំ រិទ្ធីវាសនា បានឲ្យវីអូឌីដឹងថា ស្ថាប័នអយ្យការមិនទាន់ទទួលបានពាក្យបណ្តឹងរបស់លោករដ្ឋមន្ត្រី ស៊ុយ សែម នៅឡើយទេ។
លោក រិទ្ធីវាសនា ប្រាប់ថា៖ «ខ្ញុំអត់ទាន់ដឹងម៉េចផង ព្រោះអីអត់ទាន់មានសំណុំរឿងអីអញ្ចឹងណា។ អញ្ចឹងខ្ញុំអត់អាចឆ្លើយបានទេចំពោះសំណួរហ្នឹង។ […] ចាំមើលពាក្យបណ្តឹងខាងក្រសួងគាត់ដាក់មកសិនចាំយើងគិតតាមក្រោយទៀត»។
អ្នកនាំពាក្យក្រសួងរ៉ែ និងថាមពល លោក ស៊ុយ ឌីម៉ង បានឲ្យដឹងថា ក្រសួងបានពន្យាពេលក្នុងការដាក់ពាក្យបណ្តឹងមកក្នុងសប្តាហ៍នេះវិញ ដោយថា ក្រសួងកំពុងរៀបចំឯកសារបន្ថែមដើម្បីតតាំងក្តីនេះ។
លោកថា៖ «យើងកំពុងរៀបចំសំណុំឯកសារអត់ទាន់បានគ្រប់។ អញ្ចឹងទៅ អត់ទាន់បានដាក់ទៅ កំពុងបង្ហើយអញ្ចឹងទៅអត់ទាន់បានដាក់ទៅតុលាការ។ (ដាក់ទៅ)ឆាប់ៗនេះហើយ ក្នុងអាទិត្យនេះឯងយ៉ាងយូរ»។
មន្ត្រីជាន់ខ្ពស់នៃសមាគមអាដហុក លោក សឹង សែនករុណា គាំទ្រចំពោះចំណាត់ការរបស់រដ្ឋាភិបាលនេះ ហើយលោកជំរុញទៅរដ្ឋាភិបាលឲ្យចាត់វិធានការស្មើភាពគ្នា និងពេញលេញ ទៅម្ចាស់អាជីវកម្មផ្សេងទៀតនៅទូទាំងប្រទេស ក្នុងនោះមានទាំងអាជីវកម្មបូមខ្សាច់ និងរុករករ៉ែផងដែរ។
លោកថា៖ «ចំពោះការជីករុករក ឬដីអីខុសច្បាប់ទាំងអស់នេះ ឃើញថា ករណីនេះគួរតែក្រសួងពិនិត្យទៅតំបន់ផ្សេងៗទៀតដូចជាខេត្តមួយចំនួនផងដែរ។ យើងឃើញហើយរឿងរ៉ែនេះ មានភាពអាណាធិបតេយ្យផងដែរ ជាពិសេសនៅខេត្តព្រះវិហារ។ ដូច្នេះយើងគាំទ្រចំពោះការអនុវត្តបែបនេះ ហើយចំណាត់យើងកុំធ្វើតែបុគ្គលប៉ុន្មានរូបយើងគួរតែធ្វើឲ្យស្នើភាពគ្នាចំពោះបុគ្គលទូទាំងប្រទេស»។
ក្រៅពីការជីកដីលក់ អាជីវកម្មបូមខ្សាច់ក៏កើតមានផងដែរនៅក្នុងប្រទេសកម្ពុជា ដែលបង្កឲ្យមានក្ដីបារម្ភអំពីការបាត់បង់ថវិកាជាតិរាប់រយលានដុល្លារ និងផលប៉ះពាល់ខាងផ្នែកបរិស្ថាន៕