បណ្តាញអាស៊ីដើម្បីការបោះឆ្នោតដោយសេរី បានកោតសរសើរចំពោះកិច្ចការរបស់គជប ក្នុងការធានាការប្រព្រឹត្តិទៅនៃការបោះឆ្នោតឃុំ សង្កាត់ កាលពីថ្ងៃទី៤ មិថុនា កន្លងទៅ ដោយថាមានភាពល្អប្រសើរ ប៉ុន្តែថានៅមិនទាន់គ្រប់លក្ខខណ្ឌស្តង់ដារអន្តរជាតិនៅឡើយ ។
ក្នុងសន្និសីទនៅព្រឹកនេះ អង្គការអន្តរជាតិនេះ បានអះអាងថានៅមានភាពមិនប្រក្រតីជាច្រើនត្រូវបានក្រុមនេះកត់សម្គាល់បានទាំងអំឡុងពេលឃោសនា និងក្នុងពេលបោះឆ្នោត។
អគ្គលេខាធិការ និងជាប្រធានបេសកម្មរបស់បណ្តាញអាស៊ីដើម្បីការបោះឆ្នោតដោយសេរីហៅកាត់ថា អាន់ហ្វ្រែល លោក រូហាន់ណា ហាត់ទីរ៉ាឈឺ មានប្រសាសន៍ថាការបោះឆ្នោតឆ្នាំ២០១៧នេះកម្ពុជាធ្វើបានយ៉ាងល្អប្រសើរតែទោះជាយ៉ាងណាបើតាមការសង្កេតការរបស់បណ្តាញរបស់លោកបានមើលឃើញថានៅមានបញ្ហាដូចជា ចំណេះដឹងរបស់មន្ត្រីបោះឆ្នោត ការទិញសន្លឹកឆ្នោត ការប្រើប្រាស់លុយដើម្បីឃោសនាមិនស្មើគ្នា និងការប្រើប្រាស់ប្រព័ន្ធផ្សព្វផ្សាយមានភាពលំអៀង។ លោកបញ្ហាទាំងនេះបានធ្វើឲ្យការបោះឆ្នោតឆ្នាំ២០១៧ មិនទាន់គ្រប់ស្តង់ដារអន្តរជាតិបើទោះបីជាបានប្រព្រឹត្តិទៅបានរលូនក៏ដោយ។
លោកថា៖ «គឺហិរញ្ញប្បទានយុទ្ធនាការគឺមានសារៈសំខាន់ជាខ្លាំង ជាពិសេសសម្រាប់ការបោះឆ្នោតជ្រើសតាំងតំណាងរាស្ត្រនាពេលខាងមុខនេះ ខ្ញុំគិតថារឿងនេះមិនមែនសម្រាប់តែកម្ពុជាទេ ប្រទេសនៅអាស៊ីភាគច្រើនពុំមានបទបញ្ជាសម្រាប់ហិរញ្ញប្បទាន យុទ្ធនាការទេ គណបក្សដែលមានអំណាចហិរញ្ញវត្ថុខ្លាំង គាត់ទទួលបានឱកាសច្រើននឹងផលប្រយោជន៍ច្រើន នេះគឺគោលបំណងមួយដែលយើងត្រូវតែដោះស្រាយឲ្យបាន ខ្ញុំមិនដឹងថាយើងអាចធ្វើបានមុនការបោះឆ្នោតឆ្នាំក្រោយនេះបានឬក៏អត់ទេ ប៉ុន្តែនេះជាចំណុចដែលសំខាន់ក្របខណ្ឌច្បាប់នេះវាសំខាន់ណាស់ហើយនេះជាចំងល់មួយដ៏ធំធេងសម្រាប់ការបោះឆ្នោតទាំងអស់ »។
បណ្តាញនេះសង្ឃឹមថារដ្ឋាភិបាលកម្ពុជា នឹងគិតគូរពីបញ្ហានេះឡើងវិញដើម្បីឲ្យការបោះឆ្នោតថ្នាក់ជាតិឆ្នាំ២០១៨ អាចប្រព្រឹត្តទៅដោយមានស្តង់ដារមួយដែលល្អប្រសើរជាងនេះ។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ មានប្រសាសន៍ថា គណបក្សលោកគាំទ្រទៅនឹងលើកឡើងរបស់អ្នកសង្កេតការណ៍អន្តរជាតិនេះដោយថាបទពីសោធន៍នេះនឹងជួយឲ្យមានភាពត្រឹមត្រូវនៃការបោះឆ្នោតមួយនាពេលខាងមុខ។ លោកបន្ថែមថា គណបក្សបានខិតខំប្រឹងប្រែងជាខ្លាំងក្នុងបង្កើតច្បាប់ដើម្បីឲ្យមានការប្រើប្រាស់ហិរញ្ញវត្ថុរបស់គណបក្សនយោបាយ និងការឃោសនានេះ តែលោកថាកិច្ចខិតខំនេះមិនបានទទួលលទ្ធផលក៏ព្រោះតែមិនមានការចូលរួមពីបក្សប្រជាជនកម្ពុជា។
លោកថា៖ «មិនមានគម្រោងទេ! យើងខំប្រឹងធ្វើតាំងតែពីដើមមកក៏ប៉ុន្តែសំឡេងវាមិនគ្រប់ ដូច្នេះហើយបានជាយើងមិនបានបន្តតទៅទៀត តែដល់ដំណាក់កាលមួយដែលយើងត្រូវ ខិតខំទាល់តែមានការគាំទ្រពីគណបក្សកាន់អំណាចអាហ្នឹងបានធ្វើគ្រប់គ្រាន់ពីព្រោះគេមានសំឡេងច្រើន អញ្ចឹងកុំផ្តោតទៅលើគណបក្សសង្គ្រោះជាតិខ្លាំងពេក ពីព្រោះទោះជាខិតខំយ៉ាងមិចក៏មិនគ្រប់ ដូច្នេះសុំឲ្យជម្រុញទៅគណបក្សកាន់អំណាចឲ្យបានច្រើនជាងគណបក្សសង្គ្រោះជាតិ »។
វីអូឌីមិនអាចទាក់ទងអ្នកនាំពាក្យគណបក្សប្រជាជនណាម្នាក់ដើម្បីឆ្លើយតបទៅនឹងការលើកឡើងរបស់បណ្តាញអាស៊ីដើម្បីការបោះឆ្នោតដោយសេរីបាននៅឡើយទេ។
អ្នកនាំពាក្យរដ្ឋសភាជាតិលោក ឡេង ប៉េងឡុង មានប្រសាសន៍ថារហូតមកដល់ពេលនេះសភាជាតិមិនទាន់បានគិតគូរពីបញ្ហាហិរញ្ញវត្ថុសម្រាប់គណបក្សនយោបាយសម្រាប់ការបោះឆ្នោតនៅឡើយទេ។ តែលោកថាច្បាប់បោះឆ្នោតបានចែងរួចមួយចំនួនហើយតែមិនបានចែងជាក់លាក់។
លោកថា៖ «មកដល់ឥឡូវនេះអត់ទាន់មានគិតគូរអីទេប៉ុន្តែ កន្លងមកដូចជាមានខ្លះហើយរឿងទាក់ទងនឹងហិរញ្ញវត្ថុហ្នឹង គឺមានក្នុងច្បាប់បោះឆ្នោតខ្លះៗប៉ុន្តែមិនកំណត់ថាប៉ុន្មានៗទេ។ គ្រាន់តែមានការត្រួតពិនិត្យហិរញ្ញវត្ថុសម្រាប់ឃោសនាបោះឆ្នោត ខ្ញុំអត់បានចាំទេខ្ញុំអត់មានច្បាប់ហ្នឹងផង! តែនេះជាមតិរបស់គាត់ទេ តែប្រសិនជាគណបក្សនយោបាយ ឬក៏តំណាងរាស្ត្រណាដែលគាត់យល់ឃើញថារឿងនេះ សំខាន់គាត់អាចធ្វើសេចក្តីស្នើច្បាប់ ឬសេចក្តីព្រាងច្បាប់អីដាក់ជូនទៅរដ្ឋសភាចំពោះហិរញ្ញប្បទានរបស់គណបក្សនយោបាយក្នុងការបោះឆ្នោតហ្នឹង កន្លងមកដូចជា មានខ្លះហើយតែមិនដឹងថាកំណត់ប៉ុន្មានៗទេ »។
គួរបញ្ជាក់ផងដែរថា ក្នុងការឃោសនាបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ ត្រូវបានគេសង្កេតឃើញថាគណបក្សប្រជាជនបានប្រើប្រាស់ប្រព័ន្ធឃោសនាច្រើនរួមមានទាំងវិទ្យុ និងទូរទស្សន៍ដើម្បីផ្សព្វផ្សាយពីគោលនយោបាយរបស់ខ្លួន ខណៈដែលថ្ងៃឃោសនាចុងក្រោយប្រធានបក្សនេះលោក ហ៊ុន សែន អះអាងថាគណបក្សរបស់លោកជួលស្ថានីយ៍ទូរទស្សន៍ចំនួន៨ផ្សាយផ្ទាល់ ព្រឹត្តិការណ៍ហែបក្សឃោសនា ដែលចំណាយក្នុង១នាទី ៣០០ដុល្លារអាមេរិក បើសរុបនៃការផ្សាយផ្ទាល់រយៈពេលបីម៉ោង គណបក្សប្រជាជនត្រូវចំណាយជាង៤០ម៉ឺនដុល្លាអាមេរិក៕