លោកនាយករដ្ឋមន្រ្តី ហ៊ុន សែន ថ្លែងថា កម្ពុជាបាត់បង់ព្រៃឈើដោយសារតែចំនួនប្រជាជនមានការកើនឡើង។
ក្នុងពិធីសំណេះសំណាសជាមួយក្រុមកម្មករនៅថ្ងៃនេះ លោក ហ៊ុន សែន មានប្រសាសន៍ថា រយៈពេលប៉ុន្មានឆ្នាំចុងក្រោយនេះ ប្រជាពលរដ្ឋបានសម្រុករុករានព្រៃយ៉ាងច្រើន ដើម្បីយកដីធ្លីមកបង្កបង្កើនផលដែលបណ្តាលឲ្យព្រៃឈើចេះតែថយចុះជាបន្តបន្ទាប់រហូតមកនេះ។
លោក ហ៊ុន សែន នាយករដ្ឋមន្ត្រីកម្ពុជា
តំណាងក្រុមការងារការពារបរិស្ថាន និងព្រៃឈើ លោក អ៊ូច ឡេង មានប្រសាសន៍ថា ការលើកឡើងរបស់លោកនាយករដ្ឋមន្រ្តីនេះ អាចត្រូវតែមួយផ្នែកតូចប៉ុណ្ណោះ ប៉ុន្តែមួយផ្នែកធំការបាត់បង់ព្រៃឈើ គឺដោយសារការកាប់ឈើខុសច្បាប់របស់អ្នកមានលុយមានអំណាចតាមរយៈការទទួលបានដីសម្បទានសេដ្ឋកិច្ច។
តំណាងក្រុមការងារការពារបរិស្ថាន និងព្រៃឈើ លោក អ៊ូច ឡេង
របាយការណ៍របស់រដ្ឋាភិបាលចេញផ្សាយឆ្នាំ២០១១ស្តីពី «ធនធានគម្របព្រៃឈើនៅកម្ពុជាឆ្នាំ២០១០» ឲ្យដឹងថា នៅឆ្នាំ១៩៦៥ គម្របព្រៃឈើកម្ពុជា មានប្រមាណ៧៣ភាគរយ ហើយវាបានថយចុះមកនៅប្រមាណ៥៧ភាគរយនៅឆ្នាំ២០១០ ដែលការធ្លាក់ចុះនេះ បណ្តាលមកពីកំណើននៃការប្រើប្រាស់ដីកសិកម្ម ពិសេសដីសម្បទានសេដ្ឋកិច្ច។
ទោះជាយ៉ាងណា ការចុះផ្សាយនៅលើគេហទំព័រ Open Development Cambodia បង្ហាញថា នៅឆ្នាំ១៩៧៣ កម្ពុជាមានព្រៃឈើសរុប ១៣,១លានហិកតា ប៉ុន្ដែរហូតដល់ឆ្នាំ២០១៤ អត្រានេះបានធ្លាក់ចុះមកត្រឹម៨,៧លានហិកតាប៉ុណ្ណោះ។