ប្រមុខដឹកនាំរដ្ឋាភិបាលកម្ពុជា នៅព្រឹកថ្ងៃសៅរ៍នេះ បានធ្វើដំណើរទៅកាន់ប្រទេសឡាវ ដើម្បីទទួលពានរង្វាន់អាស៊ានមួយជីវិត និងបំពេញទស្សនកិច្ចរយៈពេល ២ថ្ងៃនៅទីនោះ។
នៅលើទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន បានរៀបរាប់ថា ក្នុងដំណើរទស្សនកិច្ចនេះ ក្រៅពីចូលរួមកម្មវិធីទទួលពានរង្វាន់ លោកគ្រោងនឹងជួបជាមួយមេដឹកនាំឡាវ ដើម្បីពិភាក្សាអំពីកិច្ចសហប្រតិបត្តិការទ្វេភាគីរវាងកម្ពុជា និងឡាវ ព្រមទាំងកិច្ចការអាស៊ានផងដែរ។
យោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា ចេញផ្សាយកាលពីថ្ងៃទី០៣ ខែសីហា លោកនាយករដ្ឋមន្ត្រី ហ៊ុន សែន គឺជាមេដឹកនាំអាស៊ានទី ៤ ដែលទទួលបានពានរង្វាន់អាស៊ានមួយជីវិត បន្ទាប់ពីអតីតនាយករដ្ឋមន្ត្រីសិង្ហបុរី លោក លី ក្វាន់យូ អតីតនាយករដ្ឋមន្ត្រីម៉ាឡេស៊ី លោក មហាធៀ ម៉ូហាម៉េដ និងព្រះអង្គម្ចាស់ស៊ុលតង់ ណាសរិនសាហ៍ របស់រដ្ឋបារ៉ាក ប្រទេសម៉ាឡេស៊ី៕
