ប្រធានអង្គភាពប្រឆាំងអំពើពុករលួយ(ACU)ឲ្យដឹងថាអង្គភាពនឹងស៊ើបអង្កេតបន្តទៀត ករណីលោក ស៊ុត ឌីណា ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង ក្រោយពីអង្គភាពបានស្នើតុលាការចោទប្រកាន់រូបលោកចំនួនពីរបទល្មើសជាមុនសិន។
ក្នុងសន្និសីទសារព័ត៌មាន ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានថ្លែងថាអង្គភាពបានស្នើតុលាការចោទប្រកាន់ លោក ស៊ុត ឌីណា ដែលអង្គភាពបានឃាត់ខ្លួនកាលពីថ្ងៃចន្ទ ចំនួនពីរបទល្មើសគឺកេងយកផលប្រយោជន៍ដោយខុសច្បាប់និងរំលោភអំណាចដោយមានប្រសិទ្ធភាព។ លោកបានបញ្ជាក់ថាក្នុងនោះមានការយកលុយស្ទីកឃ័រសម្រាប់ទិដ្ឋាការសម្រាប់ប្រើប្រាស់ជាប្រយោជន៍ផ្ទាល់ខ្លួននិងការកេងយកលុយពីក្រុមគ្រួសារពលករដែលស្លាប់នៅប្រទេសកូរ៉េ។ លោកបន្តថាលោកបានរកឃើញបួនប្រាំបទល្មើសទៀត តែលោកថាអង្គភាពបញ្ជូនទៅតុលាការតែពីរបទល្មើសជាមុនសិន។
ប្រធានអង្គភាពប្រឆាំងអំពើពុករលួយបានបញ្ជាក់បន្ថែមថាលោក ស៊ុត ឌីណា ក៏បានជួយរត់ឯកសារសម្រាប់ខ្មែររៀបការជាមួយជនជាតិកូរ៉េផងដែរ ដែលលោកថានេះជាបទល្មើសផ្សេងទៀត ហើយលោកថាលោកមានភស្តុតាងពីរភាគបី ដែលមិនទាន់ផ្ញើទៅតុលាការ។ លោកមានប្រសាសន៍ថាអង្គភាពមាន”ភស្តុតាងរឹងជាច្រើន” ទាក់ទងនឹងការចោទប្រកាន់នេះ។ លោកបញ្ជាក់ថាលោក ស៊ុត ឌីណា មិនមែន”ក្រ”ដូចការចុះផ្សាយតាមហ្វេសប៊ុកនោះ។
តាមក្រមព្រហ្មទណ្ឌ មាត្រា៥៩៨ លោក ស៊ុត ឌីណា អាចត្រូវផ្តន្ទាទោសពី២ទៅ៥ឆ្នាំនិងពិន័យជាប្រាក់ពី៤លានទៅ១០លានរៀល ប្រសិនបើរកឃើញជាប់បទល្មើសកេងផលប្រយោជន៍ដោយខុសច្បាប់។ លោក ឱម យ៉ិនទៀង បញ្ជាក់ថាចំណែកបទល្មើសរំលោភអំណាចមានប្រសិទ្ធភាព លោក ស៊ុត ឌីណា អាចជាប់ពន្ធនាគារពី៥ទៅ១០ឆ្នាំ។
ក្នុងសេចក្ដីប្រកាសព័ត៌មានចេញផ្សាយនៅថ្ងៃព្រហស្បតិ៍នេះ អង្គភាពប្រឆាំងអំពើពុករលួយឲ្យដឹងថាយោងតាមការចុះស៊ើបអង្កេតរបស់ACU នៅក្នុងប្រទេសនិងនៅក្នុងប្រទេសកូរ៉េខាងត្បូងនិងចម្លើយសារភាពរបស់លោក ស៊ុត ឌីណានិងសាក្សីជាច្រើនទៀត អង្គភាពបានរកឃើញថាលោក ស៊ុត ឌីណា មានលុយនៅក្រៅធានាគារចំនួន៧,២លានដុល្លារនិងមានមាស១២,៤៧គីឡូក្រាម។ អង្គភាពឲ្យដឹងទៀតថាចំនួនទឹកប្រាក់នេះបង្ហាញថាកំណើនសាច់ប្រាក់របស់លោក ស៊ុត ឌីណា ក្នុងរយៈពេល៣ឆ្នាំមានចំនួន៣លានដុល្លារ ដោយក្នុងឆ្នាំ២០១៣ លោកមានប្រាក់ចំនួន៤,២លានដុល្លារអាមេរិក។ លោក ឱម យ៉ិនទៀង បញ្ជាក់ថាលោកមិនទាន់ដឹងថាលុយក្នុងកុងធានាគារមានចំនួនប៉ុន្មាននោះទេ។
ក្នុងសេចក្ដីប្រកាសព័ត៌មានដដែល អង្គភាពបញ្ជាក់ថាចាប់ពីថ្ងៃទី៧ ខែកុម្ភៈ ឆ្នាំ២០១៤ ដែលជាពេល លោកចាកចេញទៅធ្វើជាឯកអគ្គរាជទូតប្រចាំប្រទេសកូរ៉េខាងត្បូង រហូតមកដល់បច្ចុប្បន្ន លោក ស៊ុត ឌីណា បានធ្វើដំណើរទៅមករវាងប្រទេសកូរ៉េនិងប្រទេសកម្ពុជាចំនួន២១លើក ក្នុងរយៈពេល២៥ខែនោះ ដែលមានន័យថាស្ទើរតែ១ខែ១លើក។ អង្គភាពលើកឡើងថាខ្លួនមានភស្តុតាងគ្រប់គ្រាន់ដើម្បីកសាងសំណុំបែបបទបញ្ជូនលោក ស៊ុត ឌីណា ទៅតុលាការ។ អង្គភាពឲ្យដឹងទៀតថាអាស្រ័យដោយពេលវេលាកាសងបែបបទមានតែ៤៨ម៉ោង អង្គភាពបានសម្រេចកាសងសំណុំរឿងប្រមូលផ្ដុំលើ២បទល្មើសសិន។
អង្គភាពបញ្ជាក់ថាការឃាត់ខ្លួនលោក ស៊ុត ឌីណា ធ្វើឡើងតាមពាក្យបណ្តឹងរបស់ពលករខ្មែរនៅប្រទេសកូរ៉េខាងត្បូងនិងពាក្យបណ្តឹងរបស់មន្រ្តីក្រសួងការបរទេសកម្ពុជានិងកំណត់ហេតុសវនកម្មនៃប្រតិភូចម្រុះក្រសួងសេដ្ឋកិច្ចនិងក្រសួងការបរទេសដែលអង្គភាពបានអះអាងថាលោក ស៊ុត ឌីណា បានឃើញនិងឯកភាពកាលពីថ្ងៃទី១៩ ខែមករា ឆ្នាំ២០១៦។
ម្តាយរបស់លោក ស៊ុត ឌីណា អ្នកស្រី យ៉ាំ ឈីវអេង អាយុ៦៧ ឆ្នាំ បានបដិសេធនឹងការលើកឡើងរបស់អង្គភាពប្រឆាំងអំពើពុករលួយ ដោយថាកូនរបស់អ្នកស្រីមិនមានលុយទៅដល់ថ្នាក់ហ្នឹងនោះទេ។ អ្នកស្រីបញ្ជាក់ថា៖ “កុហកទាំងស្រុង មានមាសប៉ុន្មាន១០គីឡូ អាណាស្អី។ ឲ្យដើរសួរធនាគារគ្រប់ទៅ វាមិនពិតទេអូន ខ្ញុំឲ្យគាត់ដើរសួរតាមធនាគារទាំងអស់ទៅ ទៅដាក់ធនាគារឯណា៧លាន ៧សែន ឯណោះ បើមានលុយប៉ុណ្ណោះ ទិញឡានជិះ ខ្ញុំលើកផ្ទះថ្មនៅ”។
អ្នកស្រីបន្តថាលោកត្រូវបានរដ្ឋមន្រ្តីក្រសួងការបរទេសលោក ហោ ណាំហុង ហៅមកប្រជុំ ទើបលោកមក ហើយមានការចាប់ខ្លួននៅក្រសួងការបរទេសកាលពីថ្ងៃចន្ទ។
ឪពុករបស់លោក ស៊ុត ឌីណា លោក ស៊ុត ប៉េងគុណ បានអំពាវនាវឲ្យលោកនាយករដ្ឋមន្រ្តី ហ៊ុន សែន ជួយរកយុត្តិធម៌ឲ្យកូន។ លោកមានប្រសាសន៍ថា៖ “កូនខ្ញុំមិនអញ្ចឹងទេ សូមសម្តេចជួយ កូនមកឃើញតែល្ហេមល្ហាម ទៅកូរ៉េមិនដែលផ្ញើលុយមកប៉ា”។
គួរបញ្ជាក់ថាលោក ស៊ុត ឌីណា ត្រូវបានអង្គភាពប្រឆាំងអំពើពុករលួយបញ្ជូនខ្លួនទៅកាន់សាលាដំបូងរាជធានីភ្នំពេញនៅព្រឹកថ្ងៃព្រហស្បតិ៍នេះ បន្ទាប់ពីអង្គភាពបានឃាត់ខ្លួនរូបលោកអស់រយៈពេល៣ថ្ងៃ។ ពេលត្រូវនាំខ្លួនចូលទៅក្នុងសាលាដំបូងរាជធានី លោក ស៊ុត ឌីណា បានថ្លែងទៅកាន់អ្នកសារព័ត៌មានថា នេះគឺជារឿង “អយុត្តិធម៌ណាស់” សម្រាប់រូបលោក៕ ដោយ កាន់ វិច្ឆិកា និងស៊ុន ណារិន
