ក្រសួងសុខាភិបាល បានអះអាងថា ពលរដ្ឋដល់ទៅ ១១នាក់ហើយ បានស្លាប់ ហើយអ្នកភូមិ ១៤៩នាក់ទៀត ត្រូវបានបញ្ជូនទៅសង្គ្រោះនៅតាមមន្ទីរពេទ្យ ដោយក្រសួងបានបន្ទោសទៅលើស្រាផ្ទុកទៅដោយជាតិពុលខ្ពស់ និងការប្រើប្រាស់ទឹកព្រែកនៅមូលដ្ឋាន។
អាជ្ញាធរខេត្តក្រចេះ បានរាយការណ៍កាលពីថ្ងៃម្សិលមិញថា ពលរដ្ឋ ១០នាក់នៅ ភូមិអាលច ឃុំកន្ទួត ស្រុកចិត្របុរី បានស្លាប់ ហើយ ១២១នាក់ទៀត ត្រូវបានបញ្ជូនទៅសង្គ្រោះនៅមន្ទីរពេទ្យ ក្នុងនោះមួយចំនួនត្រូវបានបញ្ជូនមកសង្គ្រោះនៅរាជធានីភ្នំពេញ បន្ទាប់ពីអ្នកភូមិទាំងនោះ មានអការៈក្អួតចង្អោ អស់កម្លាំង ទន់ដៃជើង វិលមុខ និងថប់ដង្ហើមជាបន្តបន្ទាប់។
ប៉ុន្តែ របាយការណ៍ក្រសួងសុខាភិបាលចេញផ្សាយនៅថ្ងៃនេះ បានឲ្យដឹងថា គិតត្រឹមថ្ងៃទី៧ឧសភាពនេះ ចំនួនអ្នកស្លាប់កើនដល់ ១១នាក់ ហើយពលរដ្ឋធ្លាក់ខ្លួនឈឺ បានកើនឡើងដល់ចំនួន ១៤៩នាក់ ក្នុងនោះ មានស្រី ៧៥នាក់។
ក្នុងចំណោមជនរងគ្រោះទាំងនោះ ក្រសួងថា មនុស្សចំនួន ១២នាក់ ត្រូវបានបញ្ជូនមកព្យាបាលនៅមន្ទីរពេទ្យកាល់ម៉ែត្រ រាជធានីភ្នំពេញ និងរកឃើញថា មានរោគសញ្ញាពុលស្រា ដែលមានជាតិមេតាណុលខ្ពស់។ ចំណែក ការវិភាគលើសំណាកទឹកព្រែកវិញ ក្រសួងថា មិនទាន់រកឃើញមូលហេតុជាក់លាក់នៅឡើយ។
ប្រធានមន្ទីរសុខាភិបាលខេត្តក្រចេះ លោក ឈ្នាង សុវត្ថា ប្រាប់ថា ក្រុមការងារកំពុងសិក្សាស្រាវជ្រាវលើបញ្ហានេះ ហើយលទ្ធផល នឹងចេញជាផ្លូវការនាពេលក្រោយ។
ក្នុងសេចក្ដីសេចក្ដីប្រកាសព័ត៌មាននៅថ្ងៃនេះ រដ្ឋមន្ដ្រីក្រសួងសុខាភិបាល លោក ម៉ម ប៊ុនហេង បានក្រើនរំលឹកប្រជាពលរដ្ឋរស់នៅក្នុងខេត្ដក្រចេះ ការពារសុខភាពផ្ទាល់ខ្លួន ដោយអនុវត្តអនាម័យស្អាត រស់នៅស្អាត កុំបរិភោគស្រាគ្មានប្រភពច្បាស់លាស់ និងកុំចោលសំរាម ឬកាកសំណល់ផ្សេងៗ ចូលក្នុងព្រែក ទន្លេ ឬបឹង ដែលជាប្រភពទឹកប្រើប្រាស់របស់ពួកគេ។
កាលពីថ្ងៃទី៦ឧសភាម្សិលមិញនេះផងដែរ ក្នុងឃុំកំពង់ដំរី ស្រុកឆ្លូង ខេត្តក្រចេះ មនុស្សចំនួន៤៤នាក់ ត្រូវបានគេសង្ស័យថាពុលនំអន្សមអាំង ក្នុងនោះមានស្រី ២៣នាក់ ខណៈ ២៨នាក់ មានសភាពធ្ងន់ធ្ងរ។ អ្នកបើតាមហ្វេសប៊ុកអ្នកនាំពាក្យក្រសួងព័ត៌មាន លោក ខៀវ កញ្ញារិទ្ធិ នៅថ្ងៃចន្ទនេះ៕