លោកនាយករដ្ឋមន្ត្រី ហ៊ុន សែន បានអះអាងថា សហគមន៍អន្តរជាតិនៅតែបន្តគាំទ្ររដ្ឋាភិបាលរបស់លោកដដែល ដែលជាប្រតិកម្មតបទៅនឹងអតីតមេបក្សប្រឆាំង ដែលបានអះអាងថា សហគមន៍អន្តរជាតិមិនទទួលកម្ពុជានោះឡើយ
អតីតមេដឹកនាំបក្សនេះ លោក សម រង្ស៊ី កាលពីចុងខែមេសាកន្លងមកនេះ បានស្វែងរកការគាំទ្រពីបណ្ដាប្រទេសមួយចំនួនក្នុងនោះមានទាំងជប៉ុន និងឥណ្ឌូនេស៊ី ឲ្យជួយស្ដារលទ្ធិប្រជាធិបតេយ្យនៅកម្ពុជាឡើងវិញ ហើយលោកអះអាងថា សហគមន៍អន្តរជាតិបានគាំទ្រឲ្យមានវត្តមានអតីតបក្សប្រឆាំងមួយនេះនៅក្នុងការបោះឆ្នោតខាងមុខ។
ប៉ុន្តែ អំឡុងពេលបើកការដ្ឋានពង្រីកផ្លូវជាតិលេខ ៣ នៅព្រឹកថ្ងៃនេះ លោក ហ៊ុន សែន បានប្រតិកម្មខ្លាំងៗថា គណបក្សមួយស្លាប់បាត់មិនអាចរារាំងដំណើរការលិទ្ធិប្រជាធិបតេយ្យសេរីពហុបក្សនៅកម្ពុជាបាននោះទេ ហើយក៏មិនចាំបាច់ត្រូវការការទទួលស្គាល់ពីអន្តរជាតិ ឬប្រទេសណាមួយទៅលើការបោះឆ្នោតនោះទេ។
លោកថា៖ «ឥឡូវឆ្លើយមកសហគមន៍អន្តរជាតិជានរណា? អ្នកឯងមានប្រទេស១ ប្រទេស២ ស្រែកគាំទ្រអ្នកឯង តែកុំភ្លេចថា ប្រទេសច្រើនណាស់ដែលគាំទ្ររដ្ឋាភិបាលសព្វថ្ងៃ ហើយបន្តការងារជាមួយរដ្ឋាភិបាលសព្វថ្ងៃ ចិន ឥណ្ឌា កូរ៉េខាងត្បូង ជប៉ុន អាស៊ាន រុស្ស៊ី តើគេមិនមែនជាសហគមន៍អន្តរជាតិទេអី? […] អង្គការសហប្រជាជាតិកំពុងតែត្រូវការកម្ពុជាឲ្យបញ្ជូនកម្លាំងកាន់តែច្រើន! កៅអីនេះជារបស់កម្ពុជាមិនមែនជារបស់លោកឯងទេ! អានេះ បើសិនជាឆ្កួត ហើយបើភូតគួរណាស់តែភូតមហាសមុទ្រអាត្លង់តិចទៅ កុំភូតថ្លុកភូតត្រពាំង! ភូតប្រចាំថ្ងៃយ៉ាងនេះ»។
ទោះជាយ៉ាងណា សហរដ្ឋអាមេរិក សហគមន៍អឺរ៉ុបដែលមានសមាជិក ២៧ប្រទេស សុទ្ធតែបានថ្កោលទោសលើរដ្ឋាភិបាលកម្ពុជា និងបានជំរុញទៅប្រទេសនេះ ឲ្យស្ដារលទ្ធិប្រជាធិបតេយ្យឡើងវិញ ដោះលែងមេដឹកនាំបក្សប្រឆាំង លោក កឹម សុខា ដែលកំពុងជាប់ឃុំអស់រយៈពេលជាង ៨ខែមកហើយ និងការអនុញ្ញាតឲ្យបក្សប្រឆាំងចូលរួមការបោះឆ្នោតដោយសេរី ត្រឹមត្រូវ និងយុត្តិធម៌។
ប្រេសិតពិសេសអង្គការសហប្រជាជាតិទទួលបន្ទុកបញ្ហាសិទ្ធិមនុស្សកម្ពុជា លោកស្រី រ៉ូណា ស្មីត កាលពីចុងខែមេសាកន្លងមកនេះ បានលើកឡើងក្នុងសេចក្តីថ្លែងការណ៍របស់លោកស្រីថា ការបោះឆ្នោតខែកក្កដាខាងមុខ នឹងមិនឆ្លុះបញ្ចាំងពីគោលការណ៍ប្រជាធិបតេយ្យនៅកម្ពុជានោះទេ ប្រសិនបើរដ្ឋាភិបាល មិនដោះលែងលោក កឹម សុខា មិនលុបចោលបម្រាមនយោបាយលើមេដឹកនាំបក្សប្រឆាំង ១១៨រូប មិនអនុញ្ញាតឲ្យគណបក្សសង្គ្រោះជាតិចូលរួមការបោះឆ្នោតនាពេលខាងមុខ មិនបញ្ឈប់ការរឹតត្បិតលើអង្គការសង្គមស៊ីវិល និងបណ្ដាញសារព័ត៌មានឯករាជ្យ។
លោកស្រី រ៉ូណា ស្មីត ថ្លែងថា៖ «ការបោះឆ្នោតមួយ មិនអាចក្លាយជាការបោះឆ្នោតពិតប្រាកដឡើយ បើគណបក្សប្រឆាំងដ៏ធំមួយ ត្រូវបានគេរារាំងមិនឲ្យចូលរួម»។
បណ្ដាប្រទេសចំនួន ៤៥ ក្នុងចំណោមសមាជិក ៤៧ប្រទេសនៅក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីខែមីនាកន្លងមកនេះ បានរួមគ្នាចេញសេចក្តីថ្លែងការណ៍ថ្កោលទោសបញ្ហានយោបាយ និងបញ្ហាសិទ្ធិមនុស្សនៅកម្ពុជា ដោយថា រដ្ឋាភិបាលកំពុងអនុវត្តផ្ទុយពីគន្លងប្រជាធិបតេយ្យ និងស្មារតីនៃកិច្ចព្រមព្រៀងសន្ដិភាពក្រុងប៉ារីស។
ប៉ុន្តែ តំណាងកម្ពុជានៅអង្គការសហប្រជាជាតិ បានច្រានចោលការចោទប្រកាន់នេះ ហើយថា សេចក្តីថ្លែងការណ៍នោះ មិនបានឆ្លុះបញ្ចាំងពីការពិតនៅកម្ពុជា៕
