តុលាការកំពូលនៅថ្ងៃនេះ បានសម្រេចឲ្យបន្តឃុំខ្លួនលោក កឹម សុខា ដូចការសម្រេចរបស់តុលាការថ្នាក់ក្រោមដដែល បើទោះបីជាមេធាវីលោក កឹម សុខា អះអាងថា កូនក្ដីរបស់ខ្លួននឹងសហការជាមួយតុលាការដោយមិនរត់គេចទៅណានោះទេ។
កាលពីថ្ងៃទី៥ខែមីនាឆ្នាំ២០១៨ ចៅក្រមសាលាដំបូងរាជធានីភ្នំពេញ លោក គី ឫទ្ធី បានសម្រេច ឃុំខ្លួនលោក កឹម សុខា រយៈពេល៦ខែទៀត ខណៈដែលលោកជាប់ពន្ធនាគារអស់រយៈពេល៦ខែកន្លងមក។
នៅថ្ងៃនេះ តុលាការកំពូលបានបើកសវនាការលើបណ្តឹងប្រឆាំងនឹងការសម្រេចពន្យារពេលឃុំខ្លួនរបស់មេធាវីការពារក្ដីឲ្យលោក កឹម សុខា ប៉ុន្តែសវនាការនេះ មិនមានវត្តមានលោក កឹម សុខា ចូលរួមឡើយ។
នៅក្នុងបន្ទប់សវនាការនៅថ្ងៃនេះ ក្រុមមេធាវីការពារក្ដីឲ្យលោក កឹម សុខា បានប្រាប់ទៅក្រុមប្រឹក្សាជំនុំជម្រះនៃតុលាការកំពូលថា ចៅក្រមសាលាដំបូង និងសាលាឧទ្ធរណ៍ បានសម្រេចឲ្យឃុំខ្លួនកូនក្ដីរបស់ពួកគេរយៈពេល៦ខែបន្តទៀត ដោយថា ដើម្បីបង្ក្រាបបទល្មើសកុំឲ្យកើតឡើងជាថ្មី និងរក្សាជនត្រូវចោទទុកជូនតុលាការចាត់ការ។ ប៉ុន្តែការលើកហេតុផលនេះ ក្រុមមេធាវីថា មិនសមស្របឡើយនោះឡើយ ដោយសារ រយៈពេល៦ ដែលឃុំខ្លួនកូនក្ដីរបស់ពួកគេកន្លងមក គឺចៅក្រមស៊ើបរកមិនឃើញភស្តុតាងអ្វីថ្មីនោះទេ។
មេធាវីការពារក្ដីឲ្យលោក កឹម សុខា គឺ លោក ចាន់ ចេន លើកឡើងថា កន្លងមក កូនក្ដីរបស់លោកបានអះអាងនៅចំពោះមុខចៅក្រមសាលាដំបូងថា នឹងសហការជាមួយតុលាការគ្រប់នីតិវិធី ពោលគឺមិនរត់គេចខ្លួនទៅណានោះទេ ប៉ុន្តែតុលាការនៅតែឃុំខ្លួនកូនក្ដីរបស់ពួកគាត់បន្តទៀត។ លោកចាត់ទុកការសម្រេចបន្តឃុំខ្លួនកូនក្ដីលោកបន្តទៀតនេះថា តុលាការហាក់មានការព្រួយបារម្ភហួសហេតុ។
លោកស្រី ម៉េង សុភារី លើកឡើងដែរថា ប្រសិនបើតុលាការខ្លាចកូនក្ដីរបស់លោកស្រីរត់គេចខ្លួនទៅក្រៅប្រទេសនោះ លោកស្រី ថា តុលាការអាចដកលិខិតឆ្លងដែន ឬអាចដាក់អាជ្ញាធរតាមឃ្លាំងមើល និងតាមវិធីផ្សេងៗទៀតក៏បានដែរ។ លោកស្រីស្នើទៅក្រុមប្រឹក្សាជំនុំជម្រះឲ្យលុបចោលសេចក្ដីសម្រេចរបស់តុលាការថ្នាក់ និងអនុញ្ញាតឲ្យកូនក្ដីរបស់លោកស្រីបាននៅក្រៅឃុំ និងបានដោះស្រាយបញ្ហាវិបត្តិនយោបាយនាពេលបច្ចុប្បន្ននេះផងដែរ។
មុនបញ្ចប់សវនាការនៅព្រឹកនេះ តំណាងមហាអយ្យកាលោក អ៊ុក គឹមសិទ្ធិ បានស្នើឲ្យតម្ដល់សាលដីកាសាលាឧទ្ធរណ៍ដោយ ឃុំខ្លួនលោក កឹម សុខា ដដែល។
បន្ទាប់ពីសវនាការជាង១ម៉ោង ប្រធានក្រុមប្រឹក្សាជំនុំជម្រះនៃតុលាការកំពូល លោក ឃឹម ប៉ុណ្ណ បានសម្រចបដិសេធសំណើសុំនៅក្រៅឃុំរបស់លោក កឹម សុខា ដដែល។
ប្រាប់អ្នកសារព័ត៌មាននៅក្រៅបន្ទប់សវនាការ លោក ផែង ហេង សម្ដែងការខកចិត្ត ដោយលោកចាត់ទុកការសម្រេចរបស់តុលាការដែលមិនអនុញ្ញាតឲ្យកូនក្ដីរបស់លោកនៅក្រៅឃុំនោះ ថាមិនបានផ្ដល់យុត្តិធម៌ឲ្យកូនក្ដីរបស់លោកទេ។
វីអូឌី មិនអាចសុំការអត្ថាធិប្បាយ ពីប្រធានគ្រប់គ្រងផ្នែកអង្កេតនៃអង្គការលីកាដូ លោក អំ សំអាត បានទេនៅថ្ងៃនេះ។ ប៉ុន្តែ កាលពីថ្ងៃទី ២៧ ខែមីនាបាន លោក អំ សំអាត បានលើកឡើងថា នេះមិនមែនជាករណីថ្មីនោះទេ ដែលតុលាការកម្ពុជា តែងតែបដិសេធបណ្តឹងទាស់នៅក្នុងសំណុំរឿងពាក់ព័ន្ធនឹងនយោបាយនោះ។
លោក អំ សំអាត មានប្រសាសន៍ថា៖ «តាំងពីដើមមក ករណីធំៗឬក៏រឿងអ្នកនយោបាយ ឬក៏សកម្មជនការពាសិទ្ធិមនុស្ស ការពារដីធ្លី និងបរិស្ថាននានា បើសិនជាសាលាដំបូងសម្រេចម៉េចហើយ សាលាឧទ្ធរណ៍កម្រមានការកែប្រែណាស់ គឺសាលក្រម ឬក៏សេចក្ដីសម្រេចរបស់តុលាការជាពិសេសការជំទាស់នឹងការឃុំខ្លួនហ្នឹង»។
លោក កឹម សុខា ត្រូវបានសមត្ថកិច្ចចាប់ខ្លួនកាលពីថ្ងៃទី០៣ខែកញ្ញា និងបញ្ជូនទៅឃុំខ្លួន នៅពន្ធនាគារត្រពាំងផ្លុង ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ជុំវិញវីដេអូឃ្លីបនៃការថ្លែងរបស់លោកនៅក្នុងប្រទេសអូស្ត្រាលី កាលពីឆ្នាំ២០១៣ ដែលត្រូវបានរដ្ឋាភិបាលចោទថា «បានឃុបឃិតជាមួយបរទេសមានបំណងផ្ដួលរំលំរដ្ឋាភិបាលស្របច្បាប់» ហើយរហូតមកដល់ពេលនេះ លោក កឹម សុខា ជាប់ពន្ធនាគារ៨ខែមកហើយ៕