បន្ទាប់ពីការបោះឆ្នោតក្រុមប្រឹក្សាឃុំ-សង្កាត់កាលពីចុងសប្ដាហ៍កន្លងមកនេះ គ.ជ.ប. បានប្រកាសកាលពីថ្ងៃម្សិលមិញថា ខ្លួនទទួលបានបណ្ដឹងសរុប ៧១បណ្ដឹងពីគណបក្សនយោបាយធំៗទាំងពីរ ដោយបក្សកាន់អំណាចនាំមុខលើបណ្ដឹងស្នើសុំឲ្យរាប់សន្លឹកឆ្នោតឡើងវិញ ខណៈបក្សប្រឆាំងនាំមុខលើបណ្ដឹងឲ្យដាក់ពិន័យលើអ្នកប្រព្រឹត្តល្មើសច្បាប់បោះឆ្នោត។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ គ.ជ.ប. បានរៀបរាប់ថា គណបក្សប្រជាជនកម្ពុជា បានដាក់ពាក្យបណ្ដឹង ១៨បណ្ដឹង ដោយស្នើឲ្យរាប់សន្លឹកឆ្នោតឡើងវិញ ខណៈដែលគណបក្សសង្គ្រោះជាតិបានដាក់បណ្ដឹងឲ្យរាប់សន្លឹកឆ្នោតឡើងវិញ ១០បណ្ដឹង។
ក្រៅពីបណ្ដឹងស្នើឲ្យរាប់សន្លឹកឆ្នោតឡើងវិញ គ.ជ.ប. បានបន្ថែមថា បក្សធំៗទាំងពីរនេះ ក៏បានប្ដឹងទៅ គ.ជ.ប. ចំនួន ៤៣បណ្ដឹង ឲ្យដាក់ពិន័យលើអ្នកប្រព្រឹត្តល្មើសច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់។
គ.ជ.ប. បានបញ្ជាក់ក្នុងសេចក្ដីជូននោះថា ខ្លួនកំពុងតែដោះស្រាយបណ្ដឹងទាំងនោះតាមនីតិវិធី៕
