ក្រុមតំណាងរាស្ត្រគណបក្សសង្គ្រោះជាតិពន្យល់ហេតុផលដែលមិនចូលរួមប្រជុំសភានៅព្រឹកនេះថ្ងៃសុក្រនេះថា ព្រោះមានមនុស្សមួយក្រុមរៀបចំត្រៀមវាយតំណាងរាស្ត្រគណបក្សប្រឆាំងដូចកាលពីឆ្នាំមុនទៀត។
ក្នុងសន្និសីទនៅស្នាក់ការគណបក្សនៅព្រឹកនេះ លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះ ជាតិថ្លែងថាតាមគម្រោងរូបលោកនឹងតំណាងរាស្ត្រផ្សេងទៀតត្រៀមខ្លួនរួចហើយទៅប្រជុំសភា ប៉ុន្តែមុនចេញ ដំណើរប៉ុន្មាននាទី មានប្រភពដែលលោកថាអាចទុកចិត្តបានផ្តល់ដំណឹងថាមនុស្សមួយក្រុមកំពុងរៀបចំផែនការវាយតំណាងរាស្ត្រទៀត។ លោកថាដើម្បីកុំឲ្យមានគ្រោះថ្នាក់ទើបតំណាងរាស្ត្របក្សប្រឆាំងសម្រេចចិត្តមិនចូលរួមប្រជុំសភានៅព្រឹកនេះទេ។
កាលពីថ្ងៃទី២៦ខែតុលាឆ្នាំ២០១៥ ក្រុមបាតុករគាំទ្រគណបក្សប្រជាជនកម្ពុជាមួយក្រុមបានវាយ ទាត់ធាក់ និង ជាន់លើតំណាងរាស្ត្រគណបក្សសង្គ្រោះជាតិ២រូបនៅជាប់របងរដ្ឋសភា បណ្តាលឲ្យរងរបួសធ្ងន់ បន្ទាប់ពីតំណាងរាស្ត្រទាំងពីររូបនោះចេញពីប្រជុំ៕
