រដ្ឋមន្ត្រីក្រសួងការងារកម្ពុជាថាកង្វល់ពីប្រាក់ខែកម្មករត្រូវបានដោះស្រាយបន្ទាប់ពីក្រុមហ៊ុនអាមេរិកនៅបន្តទិញទំនិញពីកម្ពុជា ការអះអាងនេះស្របពេលស្ថានការណ៍នយោបាយរវាងកម្ពុជា និងអាមេរិកមានភាពរកាំរកូស។
ការថ្លែងរបស់លោក អ៊ិត សំហេង បែបនេះគឺបន្ទាប់ពីកិច្ចប្រជុំជាមួយតំណាងក្រុមហ៊ុនវ៉លម៉ាតអន្តរជាតិនៅរសៀលថ្ងៃទី៧ វិច្ឆិកានេះ ថ្លែងថា ក្រុមហ៊ុនអាមេរិកនេះនៅសន្យាបន្ត និងបង្កើនការទិញផលិតផលវាយនភ័ណ្ឌពីកម្ពុជានៅឆ្នាំ២០១៨បន្តទៀត ដែលធ្វើឲ្យកង្វល់របស់រដ្ឋាភិបាលកម្ពុជាក្នុងការដំឡើងប្រាក់ឈ្នួលដល់កម្មករសម្រាប់ឆ្នាំខាងមុខត្រូវបានដោះស្រាយ។
លោកថា៖ « អញ្ចឹងអ្វីដែលជាកង្វល់របស់យើងទាក់ទងនឹងការកើនឡើងប្រាក់ឈ្នួលអាចថាមិនមានការបញ្ជាទិញ អាហ្នឹងត្រូវបានដោះស្រាយបានន័យថាមិនមែនជាកង្វល់ហ្នឹងទេ។ ក្រុមហ៊ុនវ៉លម៉ាតនេះគេគិតថាបន្តការបញ្ជាទិញពីយើងតទៅទៀត » ។
លោក អ៊ិត សំហេង បានឲ្យដឹងបន្ថែមថា ទីផ្សារដែលក្រុមហ៊ុននេះយកទៅលក់គឺជាទីផ្សារសហរដ្ឋអាមេរិក និងកាណាដា ដែលលោកថាជាទីផ្សារធំសម្រាប់ទំនិញ និងពាណិជ្ជកម្មកម្ពុជា។
ទោះជាយ៉ាងណាលោកបាន បដិសេធនិងដើរចេញបន្ទាប់ពីអ្នកសារព័ត៌មានសួរពីស្ថានការនយោបាយដែលរកាំកូសរវាងកម្ពុជា និងអាមេរិក ទាក់ទងនឹងការទិញទំនិញនេះ។
ប្រធានសហភាពការងារកម្ពុជាលោក អាត់ ធន់ សាទរចំពោះការបន្តបញ្ជាទិញពីកម្ពុជាដោយក្រុមហ៊ុនរបស់អាមេរិកនេះ តែលោកថាក្រុមហ៊ុនទាំងនោះគួរជំរុញបន្ថែមទៅកម្ពុជាដើម្បីសម្រួលឲ្យមានលក្ខខណ្ឌការងារកាន់តែប្រសើរដល់កម្មករ។
លោកថា៖ « តាមពិតការសន្យាបញ្ជាទិញពីក្រុមហ៊ុននៅអាមេរិកវាជារឿងល្អ ខ្ញុំចង់ឲ្យមានការសន្យាចឹងដែរ ព្រោះថាស្ថានភាពនយោបាយវាអាចធ្វើឲ្យយើងមានការលំបាកបើសិនជាមានការដកទំនិញអីអញ្ចឹងណាតែមានការសន្យាវាល្អ។ ក៏ប៉ុន្តែគ្រាន់ថាទីផ្សារវ៉ាលម៉ាតនេះវាមិនមែនសូវគិតគូរពីលក្ខខណ្ឌការងារអីទេ វានិយាយថាទីផ្សារមូយអាក្រក់ ការរំលោភសិទ្ធកម្មករល្បីលើពិភពលោកហ្មង តែបើសិនជាបញ្ជាទិញហើយគេធានានូវកម្មករ លក្ខខណ្ឌការងារដល់កម្មករខ្ញុំគិតថាគិតជារឿងកាន់តែល្អថែមទៀត»។
របាយការណ៍សកល ផ្នែកសេដ្ឋកិច្ច ចេញផ្សាយ ដោយចភពអង់គ្លេសOECបានបង្ហាញថា ប្រទេសបីដែលកម្ពុជានាំចេញផលិផលធំបំផុតទៅលក់នោះមាន សហរដ្ឋអាមេរិក អង់គ្លេស និងអាល្លឺម៉ង់ ដែលមានទំហំទឹកប្រាក់ ៦,៥ពាន់លានដុល្លារ ហើយប្រទេសបី ដែលកម្ពុជានាំចូលទំនិញមកវិញធំបំផុតគឺ ចិន ថៃ និងវៀតណាម ដែលមានទឹកប្រាក់ ៩,៩១ពាន់លានដុល្លារ៕
