នាយករដ្ឋមន្រ្តីកម្ពុជានៅថ្ងៃពុធនេះបានអំពាវនាវជាថ្មីម្តងទៀតឲ្យអាមេរិកលុបចោលបំណុលដែលកម្ពុជាជំពាក់ កាលពីសម័យ លន់ នល់។
ការអំពាវនាវជាថ្មីទៀតនេះធ្វើឡើងបន្ទាប់ពីអគ្គរដ្ឋទូតអាមេរិកប្រចាំនៅកម្ពុជា លោក William A. Heidt (វីល លៀមហេដ) បានអះអាងកាលពីថ្ងៃទី៦ ខែកុម្ភៈនេះថា សហរដ្ឋអាមរិកនឹងមិនលុបបំណុលកម្ពុជាជំពាក់តាំងពីសម័យ លន់ នល់ នោះទេ។
ក្នុងពិធីបញ្ចុះខណ្ឌសីមានៅវត្តព្រែកប្រា នៅថ្ងៃពុធនេះ លោក ហ៊ុន សែន បានថ្លែងថា អាមេរិកគួរតែលុបបំណុលដែលកម្ពុជាជំពាក់កាលពីសម័យ លន់ នល់ ដោយថា អាមេរិកជាដើមចមធ្វើឲ្យកម្ពុជាមានសង្គ្រាម ហើយបន្សល់ទុកយុទ្ធភ័ណ្ឌមិនទាន់ផ្ទុះរហូតដល់ពេលបច្ចុប្បន្ន។ លោកបានថ្លែងថា៖ «អាមេរិកកំាងហើយ អាមេរិកកំាង ប្រធានាធិបតី ដូណាល់ ត្រំា យ៉ាងម៉េចទៅ វាយទារលុយ វាយយើងហើយទារលុយយើងទៀត វាមិនយល់កន្លែងហ្នឹង។ ឥឡូវមានចលនាប្រជាពលរដ្ឋច្រើនកន្លែង បានគំាទ្រឲ្យលុបបំណុល សង្ឃឹមបក្សនយោបាយនានានៅកម្ពុជាក៏គំាទ្រឲ្យលុបបំណុលដែរ តែបក្សប្រឆំាងជឿជាក់ថាមិនទាមទារទេ ព្រោះពួកគាត់ខ្លាច ព្រោះកូនចៅអាមេរិក»។
តំណាងរាស្ត្រគណបក្សសង្គ្រោះជាតិលោក អេង ឆៃអ៊ាង មានប្រសាសន៍ថា គណបក្សសង្គ្រោះជាតិតែងតែគិតពីប្រយោជន៍ជាតិនិងប្រជាពលរដ្ឋ ដោយថារាល់ការប្រជុំសភាពាក់ព័ន្ធច្បាប់គ្រប់គ្រងហិរញ្ញវត្ថុគណបក្សប្រឆំាងបានស្នើទៅរដ្ឋាភិបាលឲ្យចាត់ចែងថវិកាជាតិឲ្យមានតម្លាភាព កុំឲ្យមានអំពើពុករលួយ ដើម្បីកុំឲ្យខ្ចីបុលបរទេសច្រើនពេក។ លោកនិយាយថា៖ «គណបក្សសង្គ្រោះជាតិជានិច្ចកាលគឺយើងមិនត្រូវការឲ្យប្រទេសកម្ពុជាជំពាក់បំណុលអ្នកដទៃទេ ពេលជជែកពីរឿងច្បាប់ថវិកាជាតិម្តងៗគឺយើងតែងតែលើកឡើង យើងស្នើសុំឲ្យរដ្ឋាភិបាលខិតខំប្រឹងប្រែងលុបបំបាត់ អំពើពុករលួយជាកម្រិតអតិប្បរមា ដើម្បីប្រមូលធនធានធម្មជាតិមកអភិវឌ្ឍន៍ ជាជាងការទៅខ្ចីបុលគេ ដែលធ្វើឲ្យជំពាក់វាក់វិន»។
អ្នកស្រាវជ្រាវពីការអភិវឌ្ឍសង្គម លោក មាស នី យល់ថា ការអំពាវនាវរបស់រដ្ឋាភិបាលកម្ពុជាឲ្យអាមេរិកលុបបំណុលដែលកម្ពុជាជំពាក់ នៅអំឡុងពេលស្ថានការណ៍នយោបាយ កម្ពុជាកំពុងឡើងកម្តៅនេះ អាចនឹងទទួលបានផលវិជ្ជមាន ។ ប៉ុន្តែលោកថា បើមានការលុបបំណុលមែនក៏អាមេរិកអាចនឹងដាក់លក្ខខណ្ឌមួយចំនួនជាមួយរដ្ឋាភិបាលកម្ពុជាផងដែរ។ លោកមានប្រសាសន៍ថា៖ «ខ្ញុំមើលទៅអាចមានតម្រុយប្រុងនឹងអាចឈានទៅរកការជជែកគ្នារវាងលក្ខខណ្ឌមួយចំនួនជាមួយនឹងការដោះដូបំណុលដែរ។ យើងអត់ដឹងថាមានអ្វីទេ ប៉ុន្តែអាចដោះដូទៅនឹងស្ថានភាពមួយចំនួន ដូចជាការដាក់ទោសទណ្ឌទៅនឹងមន្ត្រីសិទ្ធិមនុស្ស មន្ត្រី គជប ឬក៏សភាពការតានតឹង នយោបាយផ្សេងទៀតដែលអាចនឹងត្រូវបន្ធូបន្ថយដោះដូជាមួយបំណុល ប៉ុន្តែរឿងទំាងអស់វានឹងទៅជារបៀបវារៈ បើសិនជាមានភ្លើងខៀវពីសហរដ្ឋអាមេរិកមក»។
នៅក្នុងកិច្ចពិភាក្សាមួយនៃវេទិកាសេដ្ឋកិច្ចពិភពលោកនៅប្រទេសស្វីសកន្លងទៅ លោកនាយករដ្ឋមន្ត្រីហ៊ុន សែន បានលើកឡើងថា បំណុលដែលម្ពុជាជំពាក់អាមេរិក គឺលោកលន់ នល់ ជាអ្នកខ្ចីយកមកប្រើប្រាស់បង្កសង្គ្រាមនៅកម្ពុជា។ ទោះជាយ៉ាងណាលោកថា លោកនឹងស្វះស្វែងរកអន្តរាគមន៍ពីរដ្ឋាភិបាលអាមេរិកដឹកនាំដោយលោក ត្រាំ ដើម្បីលុបចោលបំណុលនោះ។
បំណុលកម្ពុជាជំពាក់អាមេរិកកាលពីសម័យសាធារណរដ្ឋខ្មែរ គិតទាំងដើម ទាំងការ រហូតដល់ពេលបច្ចុប្បន្ននេះ មានជាង៣០០លានដុល្លារ៕