បេសកជនរបស់កូរ៉េខាងត្បូងកំពុងរៀបចំនាំសារពីមេដឹកនាំកូរ៉េខាងជើងទៅសហរដ្ឋអាមេរិក ក្នុងគោលបំណងឲ្យមេដឹកនាំប្រទេសទាំងពីរនេះ បានជជែកគ្នាដោះស្រាយបញ្ហាកំពុងប្រ ឈមគឺកម្មវិធីអាវុធនុយក្លេអ៊ែនៅឧបទ្វីបកូរ៉េ។
សារដែលមេដឹកនាំកូរ៉េខាងជើងលើកឡើងកាលពីថ្ងៃចន្ទនោះ គឺមិនមានអ្វីលាក់បាំងទេ ដោយលោក គីម ជុងអ៊ុនថា ចង់ជួបជាមួយមេដឹកនាំសហរដ្ឋអាមេរិកដើម្បីដោះស្រាយបញ្ហាកំពុងប្រឈមមុខដាក់គ្នា។
តាមគម្រោងបេសកជនកូរ៉េខាងត្បូងនឹងធ្វើដំណើរទៅកាន់សហរដ្ឋអាមេរិកនៅសប្តាហ៍ក្រោយ ប៉ុន្តែមិនទាន់ដឹងថ្ងៃណាជាក់លាក់នៅឡើយ។
កាលពីពេលកន្លងទៅសហរដ្ឋអាមេរិកតែងតែប្រកាសស្នើសុំជជែកដោយផ្ទាល់ជាមួយកូរ៉េខាងជើង ប៉ុន្តែមិនធ្លាប់មានការឆ្លើយតបនោះទេ ហើយករណីកូរ៉េខាងជើងបញ្ជាក់ជំហរនេះជាលើកទី១ហើយ។
ទន្ទឹមនឹងពេលជាមួយគ្នានេះមេដឹកនាំកូរ៉េខាងជើង និងកូរ៉េខាងត្បូងគ្រោងជួបគ្នានៅក្នុងខែមេសាខាងមុខនេះ។
មន្ត្រីកូរ៉េខាងត្បូងរួមមានប្រធានទីប្រឹក្សាសន្តិសុខជាតិ លោក Eui-yong និង លោកSun Hoon ជាប្រធានទីភ្នាក់ងារចារកម្ម បានជួបពិសេសមួយជាមួយលោក គីម ជុងអ៊ុន រយៈពេលពីរថ្ងៃ ហើយបានបញ្ចប់កាលពីថ្ងៃអង្គារ។
ក្នុងជំនួបនោះលោក គីម ជុងអ៊ុន លើកឡើងថា លោក ពិតជាចង់ជួបជាមួយមេដឹកនាំអាមេរិក ហើយថា បើជំនួបនោះអាចកើតឡើងមែន ការសាកល្បងអាវុធផ្សេងៗអាចនឹងត្រូវផ្អាក។
ជុំវិញបញ្ហានេះ កូរ៉េខាងត្បូងមិនអាចធ្វើអ្វីកើតទាំងអស់ ក្រៅតែពីនាំសារទាំងនេះទៅសហរដ្ឋអាមេរិក ហើយសម្រេចយ៉ាងណានោះគឺអាស្រ័យលើមេដឹកនាំអាមេរិក។នេះបើតាមទីភ្នាក់ងារព័ត៌មានកូរ៉េខាងត្បូងយ៉ុងហាប់។
ទោះយ៉ាងណាសហរដ្ឋអាមេរិកនៅមិនទាន់បញ្ជាក់ជំហរជាក់លាក់លើបញ្ហានេះនៅឡើយទេ ខណៈអាមេរិកបានដាក់ទណ្ឌកម្មបន្ថែមទៀត លើករណីថា កូរ៉េខាងជើងបានប្រើថ្នាំពុលសម្លាប់លោក គីម ជុងណាមនៅប្រទេសម៉ាឡេស៊ី៕