តុលាការចិននៅថ្ងៃចន្ទនេះ បានបើកសវនាការកាត់ទោស មេធាវីការពារសិទ្ធិមនុស្សលោក Xie Yang ពីបទធ្វើវិទ្ធង្សនានិងការប្រឆាំងអំណាចតុលាការ ករណីនេះនាំឲ្យសហគមន៍អន្តរជាតិបានសម្តែងការព្រួយបារម្ភ ព្រោះមានការចោទថា មេធាវីការពារសិទ្ធិមនុស្សរូបនោះរងការធ្វើទារុណកម្មក្នុងពន្ធនាគារ។
ក្រោមអំណាចដឹកនាំរបស់លោក ស៊ី ជីនពីង ៤ឆ្នាំមកនេះ មានការបង្ក្រាបខ្លាំងលើមេធាវីការពារសិទ្ធិមនុស្ស និង សកម្មជនផ្សេងៗទៀត ដោយចោទថា អ្នកទាំងនោះបានធ្វើសកម្មភាពបណ្តាលឲ្យប៉ះពាល់ដល់សន្តិសុខសណ្តាប់ធ្នាប់សាធារណៈ។នេះ បើតាមទីភ្នាក់ងារព័ត៌មានរ៉យទ័រ។
តុលាការប្រជាជនកម្រិតកណ្តាលនៃខេត្ត Hunan បានផ្សព្វផ្សាយពីតំណើរការកាត់ក្តីនៅថ្ងៃចន្ទនេះ តាមបណ្តាញទំនាក់ទំនងសង្គម។ នៅក្នុងការផ្សព្វផ្សាយនោះ តុលាការក៏បង្ហាញជាវីឌីអូដែលលោកមេធាវី Xie Yang ថ្លែងថា លោកមិនបានប្រព្រឹត្តកំហុងដូចការចោទប្រកាន់នោះទេ។ នៅក្នុងសវនាការនៅព្រឹកនេះ មានការចូលរួមពី អ្នកពីអ្នកព័ត៌មានជាតិ និង អន្តរជាតិប្រមាណ៤០នាក់៕
