គណបក្សសង្គ្រោះជាតិ (CNRP) ថានឹងស្នើទៅក្រសួងសេដ្ឋកិច្ចនិងហិរញ្ញវត្ថុ ទម្លាក់ថវិកាជាតិចំនួន៥០ម៉ឺនដុល្លារឲ្យឃុំ-សង្កាត់នីមួយៗ ទៅតាមគោលនយោបាយរបស់ខ្លួន ខណៈរដ្ឋសភាកំពុងធ្វើសេចក្តីព្រាងច្បាប់ថវិកាជាតិឆ្នាំ២០១៨។
ការបញ្ជាក់ឡើងវិញនេះធ្វើឡើងម្តងទៀតនៅពេលអ្នកសារព័ត៌មានសួរអ្នកតំណាងរាស្ត្របន្ទាប់ពីកិច្ចប្រជុំគណៈកម្មាធិការអចិន្ត្រៃយ៍រដ្ឋសភា លើការពិនិត្យសំណើសុំអនុម័ត «សេចក្តីព្រាងច្បាប់ស្តីពីឧបាស្រ័យពាណិជ្ចកម្ម» និង «សេចក្តីស្នើច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា» ថ្ងៃទី៨ មិថុនា ២០១៧ នៅរដ្ឋសភាជាតិ។
លោក យ៉ែម បុញ្ញារិទ្ធិ អ្នកនាំពាក្យតំណាងរាស្ត្រសំឡេងភាគតិចនៅរដ្ឋសភា មានប្រសាសន៍ថា គណបក្សសង្រ្គោះជាតិនឹងស្នើទៅក្រសួងសេដ្ឋកិច្ចនិងហិរញ្ញវត្ថុ ត្រៀមថវិកាជាតិយកទៅអភិវឌ្ឍន៍ភូមិឃុំ បើទោះជាគណបក្សកាន់អំណាចមិនយល់ព្រមក៏ដោយ។ លោកថា «ថវិការបស់ជាតិជិត៥ពាន់លានដុល្លារក្នុងមួយឆ្នាំ ថវិកាមិនទាន់បែងចែកប៉ុន្មានភាគរយ? បើយើងសន្សំសំចៃបាន យើងនឹងទម្លាក់ថវិកានោះទៅភូមិឃុំរបស់យើង»។ លោកក៏សុំឲ្យអ្នកសារព័ត៌មានចៀសវាងការញុះញង់ បំផុសបំផុល បំន្លៃការពិត ចំពោះគោលនយោបាយ៥០ម៉ឺនដុល្លារក្នុងមួយឃុំ សង្កាត់ បើគណបក្សសង្រ្គោះជាតិដឹកនាំរដ្ឋាភិបាល។
លោក ឈាង វុន អ្នកនាំពាក្យតំណាងរាស្ត្រសំឡេងភាគច្រើននៅរដ្ឋសភា ឆ្លើយតបភ្លាមចំពោះការលើកឡើងនេះថា ចាំជជែកគ្នានៅពេលរដ្ឋសភាប្រជុំធ្វើសេចក្តីព្រាងច្បាប់ថវិកាជាតិសម្រាប់ចំណាយឆ្នាំ២០១៨។ លោកថា «យើងពិបាកហើយព្រោះថាលុយរាប់រយលានដែលត្រូវបន្ថែមនេះ មិនមែនលុយធ្លាក់មកពីលើមេឃទេ គឺជាឈាមជ័រញើសរបស់ប្រជាពលរដ្ឋដែលយើងយកពន្ធពីគាត់មក»។
គោលនយោបាយផ្តល់ថវិកា៥០ម៉ឺនដុល្លារទៅឲ្យឃុំ-សង្កាត់របស់គណបក្សសង្គ្រោះជាតិ ទើបតែបានដាក់ចេញនៅក្នុងយុទ្ធការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤។ គោលនយោបាយនេះនៅតែបន្តការជជែគឥតឈប់ទាំងគណបក្សកាន់អំណាចនិងគណបក្សប្រឆាំងរហូតមកដល់ពេលនេះ៕
