អ្នកឃ្លាំមើលមួយចំនួន បង្ហាញការយល់ឃើញ របស់ពួកគេថានៅអាណត្តិទី៥នេះរដ្ឋសភាបានចូលរួមចំណែករុញលទ្ធិប្រជាធិបតេយ្យឲ្យដើរថយក្រោយ តាមរយៈធ្វើច្បាប់នានាកម្រិតសិទ្ធិអង្គការសង្គមស៊ីវិល និងរឹបអូសអាសនៈគណបក្សប្រឆាំងជាដើម។
មន្ត្រីឃ្លាំមើលការបោះឆ្នោតនៅអង្គការខុមហ្វែ្រល លោក កន សាវាង្ស លើកឡើងថា តាមការអង្កេតរបស់លោក ជិតមួយអាណត្តិមកនេះ តំណាងរាស្ត្រដែលពលរដ្ឋបោះឆ្នោតឲ្យចូលមកអង្គុយក្នុងស្ថាប័នឃ្លាំមើលការអនុវត្តច្បាប់ និងអនុម័តច្បាប់មួយនេះ មានទាំងល្អ មានទាំងមិនល្អ។
លោក កន សាវង្ស និយាយថាចំនុចល្អ របស់អ្នកតំណាងរាស្ត្រជាប់ឆ្នោតអាណត្តិទី៥នេះ គឺបានស្រុះស្រួលគ្នាធ្វើច្បាប់បោះឆ្នោត និងធ្វើកំណែទម្រង់ គ.ជ.ប រួមទាំងច្បាប់ដែលជំរុញឲ្យរដ្ឋាភិបាលឈប់ផ្តល់ដីសម្បទានសេដ្ឋកិច្ច ។
ប៉ុន្តែមន្ត្រីឃ្លាំមើលការបោះឆ្នោតរូបនេះ និយាយថា អ្វីដែលរដ្ឋសភាធ្វើឲ្យសហគមជាតិ និងអន្តរជាតិរិះគន់នោះគឺ បានរុញកម្ពុជាឲ្យងាកចេញពីគន្លងប្រជាធិបតេយ្យនោះ គឺការធ្វើច្បាប់ស្តីពី សមាគម និងអង្គការមិនមែនរដ្ឋាភិបាល កម្រិតសិទ្ធិបញ្ចេញមតិ ការធ្វើវិសោធនកម្មច្បាប់ គណបក្សនយោបាយ បើកផ្លូវឲ្យមានការរឹបអូសអាសនៈក្នុងសភា និងឃុំ សង្កាត់ ជាដើម។
លោកថា៖«ជាពិសេសអាជ្ញាធរលោក មិនបានគោរពទៅតាមអភ័យឯកសិទ្ធិរបស់តំណាងរាស្ត្រ ។នេះហើយដែលយើងឃើញមានបញ្ហាដែលសម្រេចឲ្យមានការចាប់ខ្លួនអីជាដើម»។
នាយកប្រតិបត្តិគណនេយ្យភាពសង្គមកម្ពុជា លោក សន ជ័យ មើលឃើញថា សភាអាណត្តិទី៥នេះ ហាក់បានរួមចំណែករុញដំណើរការប្រជាធិបតេយ្យនៅកម្ពុជាឲ្យដើរថយក្រោយ ដោយថាដូចជាការធ្វើច្បាប់ បែបឯកបក្ខ បង្កជាជម្លោះនយោបាយ និងមិនបានជំរុញការអនុវត្តច្បាប់ ដើម្បីការពារម្ចាស់ឆ្នោតដែលរងគ្រោះ ពីបញ្ហាដីធ្លី និងអយុត្តិធម៌សង្គម។
[Quote]
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត ហៅដំណើរការសភាអាណត្តិទី៥នេះថា ជាអាណត្តិបង្កើតភាពចម្រូងចម្រាស ច្រើនជាងមូលមតិគ្នាដោះស្រាយបញ្ហាជាតិដែលនៅសេសសល់ និងបញ្ហារបស់ប្រជាពលរដ្ឋ។ លោកថា ភាពចម្រូងចម្រាសនៅក្នុងសភាពបែបនេះ បានរារាំងដល់យន្តការជំរុញលទ្ធិប្រជាធបតេយ្យ និងការអភិវឌ្ឍជាតិ។
លោកថា៖«ចាប់ពីឆ្នាំ១៩៩៣មក មានតែអាណត្តិទី៥នេះមួយគត់ដែលត្រូវបានរំលាយគណបក្សមួយ ហើយសមាជិកនៃរដ្ឋសភា របស់គណបក្សហ្នឹងក៏ត្រូវបានរំសាយចេញពីរដ្ឋសភា»។
អ្នកនាំពាក្យរដ្ឋសភា លោក ឡេង ប៉េងឡុង បានច្រានចោលការយល់ឃើញ របស់អង្គការសង្គមស៊ីវិលនេះ ប៉ុន្តែលោកសុំមិនទាន់អត្ថាធិប្បាយថាអាណត្តិទី៥នេះ រដ្ឋសភាបានធ្វើកិច្ចការអ្វីដែលលេចធ្លោជំរុញដល់យន្តការប្រជាធិបតេយ្យដែលទទួលស្គាល់ដោយសហគមន៍ជាតិនិងអន្តរជាតិនោះទេ ដោយថាលោកកំពុងបូកសរុបរបាយការណ៍។
លោកថា៖«លោកយើងហើយ ប្រទេសយើងបានទទួលសុខសន្តិភាព មានការរីកចម្រើន ។និយាយបែបនឹង គឺថាដើម្បីបញ្ហាក្រពះរបស់គាត់ ។គាត់ស៊ីឈ្នួលបរទេស គាត់និយាយតាមបរទេសអញ្ចឹងហើយ»។
យ៉ាងណាក៏ដោយ ក្រុមអ្នកឃ្លាំមើលយល់ថា ច្បាប់ដែលរដ្ឋសភាទើបអនុម័តនៅប៉ុន្មានថ្ងៃនេះ ដែលច្បាប់នោះតម្រូវឲ្យថៅកែរោងចក្រ ត្រូវទូទាត់អត្ថប្រយោជន៍ផ្សេងៗជូនកម្មករ៦ខែម្តង និងកំណត់ប្រាក់ឈ្នួលអប្បបរមានោះ ថាជាច្បាប់មួយដែលបានចូលរួមការពារប្រយោជន៍កម្មករបានមួយភាគធំ។
នៅសល់តែជាង១ខែទៀតប៉ុណ្តោះ ការបោះឆ្នោតជាតិនឹងចូលមកដល់ ។ ចំណែកសភានីតិកាលទី៥ នឹងត្រូវប្តូរវេនតំណាងរាស្ត្រថ្មី នីតិកាលទី៦ ចូលមកជំនួសវិញ។
