លោកនាយករដ្ឋមន្រ្តី ហ៊ុន សែន អះអាងថា បច្ចុប្បន្នការប្រើប្រាស់ឈើរបស់ប្រជាពលរដ្ឋបានធ្លាក់ចុះដោយ សាររដ្ឋាភិបាលអភិរក្សព្រៃឈើទុក។ ក្នុងពិធីសម្ពោធរោងចក្រស៊ីម៉ងត៍នៅខេត្តកំពតកាលពីថ្ងៃទី៨មករា លោក ហ៊ុន សែន មានប្រសាសន៍ថា តម្រូវការអ្នកប្រើប្រាស់ឈើនៅក្នុងប្រទេសកម្ពុជាបានធ្លាក់ចុះ ដោយសារតែរដ្ឋាភិបាលបានអភិរក្ស និងហាមឃាត់ការប្រើប្រាស់ឈើបានប្រសិទ្ធិភាព។ លោកបន្ថែមថា«អញ្ចឹងសុទ្ធតែប្រើស៊ីម៉ងត៍មិនមែនប្រើឈើទៀតទេ ការប្រើប្រាស់ឈើកាន់តែធ្លាក់ចុះដោយ សារតែឈើរបស់យើងត្រូវបានអភិរក្ស និងការហាមឃាត់ឈើ ហាមឃាត់ការប្រើប្រាស់ឈើ អញ្ចឹងការស៊ីម៉ងត៍សម្រាប់ការសាងសង់ការរដ្ឋានទាំងអស់រាប់ទាំងផ្ទះប្រជាពលរដ្ឋ សាលារៀន មន្ទីរពេទ្យ វត្តអារាម ដែលមុននេះក៏សាងដោយឈើតែឥលូវនេះជំនួសដោយស៊ីម៉ងត៍»។
អ្នកឃ្លំាមើលព្រៃឈើយល់ឃើញថា ការប្រើប្រាស់ឈើរបស់ពលរដ្ឋនៅក្នុងស្រុកធ្លាក់ចុះមិនមែនមកពីរដ្ឋាភិបាលអភិរក្សឈើនោះទេ គឺមកពីអស់ឈើប្រើប្រាស់ដោយសារបទល្មើសព្រៃឈើឆ្លងដែនមិនអាចទប់ស្កាត់ បានប្រសិទ្ធភាព។ សមាជិកក្រុមបណ្ដាញនិស្សិឯករាជ្យ ដែលធ្វើការ ការពារធនធានធម្មជាតិ និងប្រឆាំងការជួញដូរឈើឆ្លងដែនខុសច្បាប់លោក ហេង ស្រស់ មានប្រសាសន៍ថា រដ្ឋាភិបាលទប់ស្កាត់បានបទល្មើសព្រៃឈើចំពោះតែប្រជាពលរដ្ឋតូចតាចប៉ុណ្ណោះ ប៉ុន្តែសម្រាប់បទល្មើសធំៗ និងបទល្មើសឆ្លងដែនគឺមិនអាចទប់ស្កាត់ឡើយ។ លោកបន្ថែមថា«ខ្ញុំយល់ថា គាត់[លោក ហ៊ុន សែន]ថា ការពារអភិរក្ស គាត់ឃាត់បានតែប្រជាពលរដ្ឋតូច តាចដូចគាត់រកស៊ីចិញ្ចឹមក្រពះដែលគាត់ហ្នឹងកាប់ឈើហ្នឹងយកមកធ្វើផ្ទះទេ ប៉ុន្តែចំពោះក្រុមហ៊ុនធំៗចំពោះ ឧញ្ញាធំៗដែលរកស៊ីឈើខុសច្បាប់ ដឹកឈើខុសច្បាប់ឆ្លងដែនពីកម្ពុជាទៅបណ្តាប្រទេសដទៃទៀតហ្នឹងគឺ លោក ហ៊ុន សែន មិនមានសមត្ថភាពក្នុងការទុបស្កាត់ទេ ព្រោះខ្ញុំតាមដានសង្កេតមើលរយៈកាលចុងក្រោយ ហ្នឹងគឺមានដឹកឈើយ៉ាងគគ្រឹកគគ្រៀងដោយមិនទើសក្បាលអ្នកណាទេ»។
លោកបន្តថារយៈពេលខែ៤ចុងក្រោយនេះបទល្មើសដឹកឈើទៅប្រទេសវៀតបានកើនឡើយដោយមិនអាជ្ញា ធរ ហ៊ានទប់ស្កាត់ឡើយ។ របាយការណ៍ឆ្នាំ២០១៧របស់អង្គការឃ្លាំមើលព្រៃឈើ Forest Trends បង្ហាញថា ការនាំឈើហុប និងឈើ អារពីប្រទេសកម្ពុជាទៅប្រទេសវៀតណាមកើនឡើងគួរឲ្យកត់សម្គាល់ ដោយរបាយការណ៍នេះ បញ្ជាក់ថា នៅឆ្នាំ២០១៧ ឈើប្រមាណ ១៦៣០៧១ ម៉ែត្រគូបរបស់កម្ពុជាត្រូវបាននាំចេញទៅប្រទេសវៀតណាម ពោលគឺមានកើនឡើង១៧ភាគរយលើសឆ្នាំមុន។
របាយការណ៍ដដែលនេះ បន្ថែមថា តម្លៃនៃការនាំចេញនោះបានកើនឡើង២១ភាគរយ គឺស្មើនឹងទឹកប្រាក់ ៤០ លានដុល្លារ។ កាលពីថ្ងៃទី២៣ខែមករា រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាទៅមន្ដ្រីក្រោមបង្គាប់ឲ្យបិទច្រករបៀងទាំងអស់ដោយថា ដើម្បីទប់ស្កាត់បទល្មើសឆ្លងដែនខុសច្បាប់គ្រប់ប្រភេទ។ អភិបាលខេត្តត្បូងឃ្មុំ លោក លី ឡេង បានប្រាប់ទៅកាន់មន្ដ្រីក្រោមបង្គាប់របស់ខ្លួនឲ្យបិទច្រករបៀងនៅតាមបន្ទាត់ព្រំដែនក្នុងខេត្តត្បូង ដែលបទបញ្ជានេះធ្វើឡើងក្រោយពី រដ្ឋាភិបាលស្ដីបន្ទោស និងព្រមានដកចេញពីតំណែងប្រសិនបើនៅតែកើតមានបទល្មើសឆ្លងដែន ពិសេសបទល្មើសព្រៃឈើឆ្លងទៅកាន់ប្រទេសវៀត ណាមតាមច្រកត្បូងឃ្មុំទៀតនេះ៕