យុវជនម្នាក់ដែលធ្លាប់ប្តឹងមេដឹកនាំបក្សប្រឆាំង អះអាងថា ខ្លួនមិនទាន់មានគម្រោង ប្តឹងរដ្ឋមន្ត្រីក្រសួងយុត្តិធម៌ ទាក់ទិននឹងព័ត៌មានចុះផ្សាយថា រដ្ឋមន្ត្រីរូបនោះ បានទិញភាគហ៊ុននៅក្រៅប្រទេស ដែលគេថា ជាមធ្យោបាយលាក់លុយនៅឡើយទេ ដោយថាមិនមានឯកសារគ្រប់គ្រាន់។
យុវជនមួយក្រុមដែលដឹកនាំដោយយុវជន ស្រី ចំរើន ធ្លាប់អះអាងប្រាប់អ្នកសារព័ត៌មាននាពេលថ្មីៗនេះ នៅពេលដាក់ញត្តិទៅរដ្ឋសភា និងដាក់ពាក្យបណ្តឹងទៅអង្គភាពប្រឆាំងអំពើពុករលួយ ប្តឹងលោក កឹម សុខា ថា ពួកគេជាក្រុមនិស្សិតជំរុញឲ្យមានយុត្តិធម៌សង្គម។
ប៉ុន្តែនៅពេលសួរនៅថ្ងៃទី០៩ ខែមេសា នេះថា តើលោកមានគម្រោងប្តឹង រដ្ឋមន្ត្រីក្រសួងយុត្តិធម៌លោក អង្គ វង្សវឌ្ឍានា ទៅអង្គភាពប្រឆាំងអំពើពុករលួយទេ ទាក់ទិននឹងសារព័ត៌មានចុះផ្សាយថា រដ្ឋមន្ត្រីរូបនោះបានទិញភាគហ៊ុននៅក្រៅប្រទេស ត្រូវគេចាត់ថា ជាមធ្យោបាយមួយនៃការលាក់លុយក្រៅប្រទេសនោះ ។
លោកស្រី ចំរើន អះអាងថា លោកមិនទាន់មានគម្រោងប្តឹងរដ្ឋមន្ត្រីក្រសួងយុត្តិធម៌លោក អង្គ វង្សវឌ្ឍានា ទេ ដោយអះអាងថា មិនទាន់មានឯកសារនិងភស្តុតាងគ្រប់គ្រាន់នៅឡើយ។
លោកថា៖”ទាក់ទងនិងឯកឧត្តម អង្គ វង្សវឌ្ឍានា យើងអត់ទាន់មានប្រភពច្បាស់លាស់ ដើម្បីយើងបើកការស៊ើបអង្កេតលើចំណុចហ្នឹង ហើយខាងACUក៏គ្រោងនឹងបើកស៊ើបអង្កេតទៅលើពាក់ព័ន្ធនឹងឯកឧត្តម អង្គ វង្សវឌ្ឍានា ដែរ ប៉ុន្តែយើងមើលជាក់ស្តែងទៅ យើងអត់ទាន់មានឯកសារគ្រប់គ្រាន់ ដែលយើងអាចទៅបាន ទីពីរវាមិនទាន់ដល់ដែនសមត្ថកិច្ចពួកខ្ញុំ”។
លោកស្រី ចំរើន ឲ្យដឹងដែលថា នៅពេលមានភស្តុតាងគ្រប់គ្រាន់ លោកនឹងស្នើទៅស្ថាប័នពាក់ព័ន្ធឲ្យចាត់វិធានការលើលោក អង្គ វង្សវឌ្ឍានា ដូចករណីលោក កឹម សុខា ដែរ។
ទោះជាយ៉ាងណានៅក្នុងសន្និសិតសារព័ត៌មួយនាពេលថ្មីៗនេះ ប្រធានអង្គភាពប្រឆាំងអំពើពុករលួយ(ACU) លោក ឱម យ៉ិនទៀង បានអះអាងថា លោកបានដឹងពីឯកសារ ដែលបង្ហាញថារដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា បានទិញភាគហ៊ុននៅក្រៅប្រទេសដែលត្រូវបានចាត់ទុកថា ជាមធ្យោបាយមួយនៃការលាក់លុយក្រៅប្រទេសនោះហើយ។
លោក ឱម យ៉ិនទៀង ឲ្យដឹងទៀតថា អង្គភាពរបស់លោកកំពុងផ្ទៀងផ្ទាត់លើករណីនេះ។
ចំណែក រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា វិញធ្លាប់ ចេញសេចក្តីប្រកាសមួយបដិសេចុះផ្សាយនេះ ប៉ុន្តែមិនបានតម្រូវឲ្យព័ត៌មានទាំងអស់ កែតម្រូវការចុះផ្សាយទេ។
រដ្ឋមន្ត្រីក្រសួងយុត្តិធម៌ត្រូវបានសារព័ត៌មានចុះផ្សាយថា បានរកឃើញឈ្មោះនៅក្នុងបញ្ជី«Panama Paper»ដែលជាការបែកធ្លាយនៃកំណត់ត្រាធនាគារពាក់ព័ន្ធនឹងការលាក់លុយនៅក្រៅស្រុក។
បុគ្គលមួយចំនួនដែលមានទ្រព្យសម្បត្តិ និងមានអំណាចជាងគេ នៅជុំវិញពិភពលោក ត្រូវបានដាក់នៅក្នុងបញ្ជីមួយនេះ។ ឯកសារបែកធ្លាយនោះត្រូវបានពិនិត្យដោយក្រុមអ្នកសារព័ត៌មានជាង៣៧០នាក់ មកពីប្រទេសជាង៧០៕