កាសែតបាងកក ប៉ុស្តិ៍របស់ថៃ បានរាយការណ៍ថា មនុស្សយ៉ាងហោចណាស់ ៣៧នាក់ បានរងរបួស ក្រោយពីគ្រាប់បែក ២គ្រាប់ បានផ្ទុះឡើងនៅផ្សារទំនើប Big C ស្ថិតក្នុងទីរួមខេត្តផាតានី នៅរសៀលថ្ងៃនេះ។
កាសែតថៃមួយនេះ បានឲ្យដឹងបន្ថែមថា គ្រាប់បែកទីមួយ បានផ្ទុះនៅម៉ោងប្រហែល ២ និង ១០នាទី ហើយគ្រាប់បែកទីពីរក៏បានផ្ទុះបន្ថែមទៀតខុសគ្នាតែបន្តិចប៉ុណ្ណោះ។
តម្រួតថៃខេត្តផាតានី លោក ព្រីឆា ប្រាជុំឆៃ បាននិយាយថា វត្ថុគួរឲ្យសង្ស័យមួយទៀត ត្រូវបានគេប្រទះឃើញនៅឯហាងដៃអាណា ស្ថិតក្នុងទីរួមខេត្តនេះ។
ក្រុមមន្ត្រីសន្តិសុខ បាននិយាយថា គ្រាប់បែកទីមួយ បានផ្ទុះឡើងនៅជិតទីតាំងលក់អាហារ ស្ថិតនៅក្នុងអគារផ្សារ Big C ហើយគ្រាប់បែកទីពីរ បានផ្ទុះឡើងខុសគ្នាតែបន្តិច នៅខាងក្រៅអគារ បន្ទាប់ពីអតិថិជន និងបុគ្គលិកផ្សារ បានរត់ចេញពីផ្សារទាំងស្លន់ស្លោរ។
បាងកក ប៉ុស្តិ៍ បានដកស្រង់សម្ដីតម្រួតថៃ ដែលបាននិយាយថា គ្រាប់បែកទីពីរ ត្រូវបានគេបង្កប់នៅក្នុងថង់មួយ នៅក្នុងរថយន្តមួយគ្រឿង ចតចោលនៅខាងក្រៅអគារ។
យ៉ាងហោចមនុស្ស ៣៧នាក់ បានរងរបួសដោយសារការបំផ្ទុះគ្រាប់បែកនោះ។ អ្នករងរបួសទាំងអស់ ត្រូវបានគេបញ្ជូនទៅមន្ទីរពេទ្យនៅក្នុងខេត្តផាតានី៕
