មេបញ្ជាការកងទ័ពនាវាចរណ៍អាមេរិកប្រចាំតំបន់ប៉ាស៊ីហ្វិកច លោកឧត្ដមនាវី Scott Swift បាននិយាយនៅថ្ងៃនេះថា គ្មានការផ្លាស់ប្ដូរនយោបាយទាក់ទងនឹងសេរីភាពនៃប្រតិបត្តិការនាវាចរណ៍របស់កងទ័ពអាមេរិកនោះឡើយ នៅក្រោមរដ្ឋបាលប្រធានាធិបតី ដូណាល់ ត្រាំ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ស្ថិតក្រោមរដ្ឋបាលមុន កងទ័ពជើងទឹកអាមេរិកបានធ្វើប្រតិបត្តិការនាវាចរណ៍នៅទូទាំងសមុទ្រចិនខាងត្បូង ដែលចិនអះអាងជាម្ចាស់ស្ទើតែទាំងអស់។ ប៉ុន្តែ គ្មានប្រតិបត្តិការនាវាចរណ៍ណាមួយ ត្រូវបានធ្វើឡើងនៅក្នុងតំបន់នេះនោះឡើយ នៅក្រោមរដ្ឋបាលលោក ត្រាំ។
កាសែតញូវយ៉ក ថែមស៍ កាលពីសប្ដាហ៍មុនបានរាយការណ៍ថា បញ្ជាការដ្ឋានកងទ័ពអាមេរិកនៅប៉ាស៊ីហ្វិក កាលពីខែមីនា បានស្នើធ្វើនាវាចរណ៍នៅជិតតំបន់មានជម្លោះ Scarborough ដែលចិនបានដណ្ដើមកាន់កាប់កាលពីឆ្នាំ២០១២ ប៉ុន្តែ ត្រូវបានមន្ត្រីជាន់ខ្ពស់នៅមន្ទីរបញ្ចកោណបដិសេធ។
កាសែតនេះ បានចុះផ្សាយបន្តថា សំណើសុំធ្វើនាវាចរណ៍ ២ទៀតនៅខែកុម្ភៈ ក៏ត្រូវបានគេច្រានចោលផងដែរ។
មនុស្សមួយចំនួនមើលឃើញថា បញ្ហានេះបង្ហាញឲ្យឃើញថា សហរដ្ឋអាមេរិកចង់បញ្ចៀសសកម្មភាពអរិភាពជាមួយចិន ខណៈដែលអាមេរិករង់ចាំមើលថា តើចិននឹងប្រឹងប្រែងដល់កម្រិតណាក្នុងការដាក់គំនាបទៅលើកូរ៉េខាងជើង ឲ្យបោះបង់កម្មវិធីនុយក្លេអ៊ែរ និងគ្រាប់មីស៊ីលរបស់ខ្លួន។
ដោយសំដៅទៅដល់សេរីភាពខាងនាវាចរណ៍របស់កងទ័ពជើងទឹកអាមេរិកនោះ លោកឧត្ដមនាវី Scott Swift បានប្រាប់អ្នកយកព័ត៌មាននៅសិង្ហបុរីថា គ្មានអ្វីផ្លាស់ប្ដូរខ្លាំងឡើយនៅក្នុងរយៈពេល ២ ឬ ៣ខែមកនេះ។
ចិនបានអះអាងជាម្ចាស់លើដែនទឹកសមុទ្រចិនខាងត្បូងស្ទើតែទាំងអស់ ជាទីដែលនាវាពាណិជ្ជកម្មតម្លៃ ៥ពាន់ពាន់លានដុល្លារតែងតែឆ្លងកាត់រៀងរាល់ឆ្នាំ ប៉ុន្តែ ប្រទេសប៊្រុយណេ ម៉ាឡេស៊ី ហ្វីលីពីន វៀតណាម និងកោះតៃវ៉ាន់ ក៏បានអះអាងជាម្ចាស់ផងដែរ៕
