លោកនាយករដ្ឋមន្ត្រី ហ៊ុន សែន ប្រកាសជាសាធារណថា លោកនឹងមិនលើកលែងទោសឲ្យមេដឹកនាំបក្សប្រឆាំង ដែលកំពុងជាប់ឃុំនោះទេ ដោយថាមេបក្សរូបនេះ ធ្លាប់បានដឹកនាំបាតុម្មផ្តួលរំលំរបបដឹកនាំស្រប់ច្បាប់របស់លោក មិនបានសម្រេច។
បើទោះបីជាលោក ហ៊ុន សែន ថ្លែងមិនបញ្ចេញឈ្មោះក៏ដោយ ប៉ុន្តែ មេបក្សប្រឆាំងដែលកំពុងជាប់ពន្ធនាគារពេលនេះ គឺសំដៅទៅអតីតប្រធានគណបក្សសង្គ្រោះជាតិ លោក កឹម សុខា។ លោក កឹម សុខា ត្រូវបានរដ្ឋាភិបាលចាប់ឃុំខ្លួន ជាង៧ខែមកហើយ ចោទថា «ក្បត់ជាតិ»។ ប៉ុន្តែ សហគន៍អន្តរជាតិ មានសហរដ្ឋអាមេរិក និង សហភាពអឺរ៉ុបជាដើម បានជំរុញឲ្យដោះលែងវិញ ដោយថា ចំណាត់ការនេះ ជាការគំរាមកំហែងផ្នែកនយោបាយ និងផ្ទុយពីយន្តការប្រជាធិបតេយ្យ។
លោក ហ៊ុន សែន ក្នុងពិធីចុះជួបកម្មករនៅក្រុងបាវិត ខេត្តស្វាយរៀង នាថ្ងៃនេះ បានថ្លែងថា មេបក្សប្រឆាំងរូបនេះ ធ្លាប់មកទម្លាយទ្វាររោងចក្រនៅតំបន់សេដ្ឋកិច្ចពិសេស ខេត្តស្វាយរៀងនេះ ដើម្បីកៀរគរកម្មករឲ្យទៅធ្វើបាតុកម្មផ្តួលរំលំរដ្ឋាភិបាល។ លោកថា ដូចនេះ គ្មានថ្ងៃត្រូវលោកលើកលែងទោសឲ្យបក្សប្រឆាំងនេះទេ។
លោកនាយករដ្ឋមន្ត្រី ហ៊ុន សែន
អ្នកតាមដានមួយចំនួនបង្ហាញការព្រួយបារម្ភថា កម្តៅនយោបាយពេលនេះ ប្រឈមនឹងបែកបាក់ជាតិ បើគ្មានដំណោះស្រាយនយោបាយ ដោយថា បក្សប្រឆាំងដែលបានរំលាយទៅមានអ្នកគាំទ្រជិតពាក់កណ្តាលប្រទេស។
ប្រធានក្រុមអ្នកវិភាគវ័យក្មេង លោក ហង្ស វិទូ វិភាគថា របត់នយោបាយពេលនេះ អាចវិលទៅរករបបឯកបក្ស បើគ្មានអ្វីប្រែប្រួល។ ករណីនេះ លោក វិទូ រំឭកឲ្យអ្នកនយោបាយខ្មែរ ពិសេសបក្សកាន់អំណាច ត្រូវចេះដោះស្រាយបញ្ហា ដោយតម្កល់ប្រយោជន៍ជាតិជាធំ ជាជាងកម្ទេចដៃគូប្រកួត ព្រោះតែប្រយោជន៍បក្ខពួកនិងគ្រួសារនិយម។
ប្រធានក្រុមអ្នកវិភាគវ័យក្មេង លោក ហង្ស វិទូ
ក្រុមប្រទេសលោកសេរី បានថ្កោលទោសបក្សកាន់អំណាចទាក់ទិននឹងការរំលាយគណបក្សសង្គ្រោះជាតិ និងការចាប់ឃុំខ្លួនលោក កឹម សុខា ជាដើម និងបានគំរាមដាក់ទណ្ឌកម្មសេដ្ឋកិច្ច បើរដ្ឋាភិបាលមិនស្តាប្រជាធិបតេយ្យឡើងវិញ។
យ៉ាងណាក៏ដោយនៅថ្ងៃពុធនេះ លោក ហ៊ុន សែន បានបញ្ជាក់ជំហរម្តងទៀតថា លោកនៅបន្តកាន់អំណាច១០ឆ្នាំទៀត ដើម្បីទប់ទល់នឹងក្រុមប្រឆាំង ដែលលោកថា ដើម្បីការពារសន្តិភាព៕