ប្រមុខការទូតជប៉ុន បានជំរុញទៅរដ្ឋាភិបាលកម្ពុជាជាថ្មីម្ដងទៀត ឲ្យរៀបចំការបោះឆ្នោតជាតិនាពេលខាងមុខ ដែលឆ្លុះបញ្ចាំងពីឆន្ទៈរបស់ប្រជាជនកម្ពុជា បើទោះបីជាកូនប្រុសលោកនាយករដ្ឋមន្ត្រី ហ៊ុន សែន បានប្រាប់ទៅក្រុមមេដឹកនាំជប៉ុននូវអ្វីដែលលោកហៅថាស្ថានភាពពិតនៅកម្ពុជាក៏ដោយ។
លោក ហ៊ុន ម៉ាណែត ជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន និងជាមេបញ្ជាការរងកងទ័ពជើងគោកផងនោះ បានធ្វើដំណើរទៅជួបជាមួយក្រុមមេដឹកនាំជប៉ុន មានទាំងលោកនាយករដ្ឋមន្ត្រី ស្ស៊ិនហ៊្សូ អាបេ និងរដ្ឋមន្ត្រីការបរទេស លោក តារ៉ូ កូណូ កាលពីចុងខែមេសាកន្លងមកនេះ ដោយលោកថា បានប្រាប់អំពីស្ថានភាពពិតប្រាកដនៃនយោបាយកម្ពុជានាពេលបច្ចុប្បន្នទៅដល់ក្រុមមេដឹកនាំជប៉ុនទាំងនោះ។
ឧត្ដមសេនីយ៍ឯកយោធារូបនេះ មិនបានបង្ហាញឲ្យដឹងអំពីការឆ្លើយតបបែបណាពីសំណាក់ក្រុមមេដឹកនាំជប៉ុន ជុំវិញបញ្ហានយោបាយកម្ពុជានាពេលបច្ចុប្បន្ននោះទេ។
ប៉ុន្តែ កំណត់ហេតុនៃជំនួបរវាងលោក ហ៊ុន ម៉ាណែត និង លោក តារ៉ូ កូណូ ដែលត្រូវបានក្រសួងការបរទេសផ្សព្វផ្សាយកាលពីថ្ងៃម្សិលមិញនេះ បានឲ្យដឹងថា ប្រមុខការទូតជប៉ុនរូបនេះ បានជំរុញមករដ្ឋាភិបាលកម្ពុជាជាថ្មីម្ដងទៀត ឲ្យរៀបចំការបោះឆ្នោតមួយដែលឆ្លុះបញ្ចាំងអំពីឆន្ទៈពិតប្រាកដរបស់ប្រជាជនកម្ពុជា។
កំណត់ហេតុនោះ ត្រូវបានសរសេរថា៖ «និយាយដល់ស្ថានភាពនយោបាយនៅកម្ពុជានោះ រដ្ឋមន្ត្រី កូណូ ជាថ្មីម្ដងទៀត បានជំរុញទៅកម្ពុជាឲ្យរៀបចំការបោះឆ្នោតសកលនៅខែកក្កដា តាមវិធីមួយដែលឆ្លុះបញ្ចាំងដោយត្រឹមត្រូវពីឆន្ទៈរបស់ប្រជាជន[កម្ពុជា]»។
បើតាមកំណត់ហេតុនោះ លោក ហ៊ុន ម៉ាណែត បានឆ្លើយតបថា លោកនឹងនាំយកមតិរបស់លោក កូណូ ទៅប្រាប់ឪពុករបស់លោក ក្រោយពេលវិលត្រឡប់មកកម្ពុជាវិញ។
បន្ទាប់ពីជំនួបជាមួយលោក ហ៊ុន សែន កាលពីថ្ងៃទី៩ ខែមេសាកន្លងមក ប្រមុខការទូតជប៉ុនរូបនេះ ត្រូវបានសារព័ត៌មានជប៉ុន NHK ដកស្រង់សម្ដីដែលបាននិយាយថា លោកជំរុញទៅមេដឹកនាំកម្ពុជា ឲ្យរៀបចំការបោះឆ្នោតដោយសេរី និងត្រឹមត្រូវ ប៉ុន្តែ លោក ហ៊ុន សែន បានរៀបរាប់លើទំព័រហ្វេសប៊ុករបស់លោកថា លោក កូណូ មិនបានលើកឡើងពីបញ្ហានយោបាយកម្ពុជានោះឡើយ។
បើតាមសារព័ត៌មានជប៉ុន NHK ដដែល លោក កូណូ បានដកស្រង់សម្ដីលោក ហ៊ុន សែន ដែលបានអះអាងប្រាប់រូបលោកថា ការបោះឆ្នោតនាពេលខាងមុខ នឹងមានលក្ខណៈសេរី និងត្រឹមត្រូវ។
លោក កូណូ បាននិយាយផងដែរថា ជប៉ុននឹងបន្តតាមដានស្ថានការណ៍នយោបាយនៅកម្ពុជា ខណៈដែលបញ្ជាក់ថា ជប៉ុនជាមិត្តយូរអង្វែងជាមួយកម្ពុជា និងមិនចង់ឃើញប្រទេសមួយនេះ ប្រឈមមុខនឹងការរិះគន់នោះឡើយ។
ទាំងក្រុមបក្សប្រឆាំង និងក្រុមបក្សកាន់អំណាច សុទ្ធតែព្យាយាមពន្យល់ទៅក្រុមមន្ត្រីជាន់ខ្ពស់ជប៉ុនអំពីស្ថានការណ៍នយោបាយកម្ពុជា ជាមួយនឹងអំណះអំណាងរៀងៗខ្លួន បន្ទាប់ពីគណបក្សសង្គ្រោះជាតិ ដែលទទួលបានសំឡេងឆ្នោតពីពលរដ្ឋប្រហែលពាក់កណ្ដាលប្រទេស ត្រូវបានតុលាការកំពូលសម្រេចរំលាយចោលកាលពីខែវិច្ឆិកាឆ្នាំមុន ហើយមេដឹកនាំបក្សនេះគឺលោក កឹម សុខា នៅតែស្ថិតនៅក្រោមការឃុំខ្លួនអស់រយៈពេលជាង ៧ខែមកហើយនោះ។
ក្រុមមេដឹកនាំអតីតគណបក្សសង្គ្រោះជាតិ មានទាំងលោក សម រង្ស៊ី និងកញ្ញា កឹម មនោវិទ្យា ដែលជាកូនស្រីលោក កឹម សុខា នោះ បានធ្វើដំណើរទៅប្រទេសជប៉ុនជាបន្តបន្ទាប់ និងបានជំរុញទៅក្រុមមេដឹកនាំជប៉ុន ឲ្យជួយស្ដារលទ្ធិប្រជាធិបតេយ្យនៅកម្ពុជាឡើងវិញ៕