នគរបាលខណ្ឌជ្រោយចង្វារបញ្ជាក់ថា ខ្លួនកំពុងសាកសួរមនុស្ស៤នាក់ និងកំពុងតាមរកបន្ថែមទៀត អ្នកដែលបានចូលមកប្រមូលយកកម្ទេចដែកស្ពានបាឡេ តភ្ជាប់ពីខណ្ឌជ្រោយចង្វារទៅកាន់ខណ្ឌឬស្សីកាលពីយប់មិញ។
កាលពីយប់ថ្ងៃទី៩មីនា ទូកនេសាទជាង២០ទូក បានមកប្រមូលកម្ទេចដែកស្ពាន ដែលធ្វើឲ្យមានការភ្ញាក់ផ្អើលថា ពួកគេបានចូលមកលួចកាត់ដែកស្ពាន រហូតឈានដល់សមត្ថកិច្ចចេញតាមចាប់ខ្លួន។
យោងតាមរបាយការណ៍សមត្ថកិច្ចខណ្ឌជ្រោយចង្វារឲ្យដឹងថា រហូតមកដល់ពេលនេះសមត្ថកិច្ចបានឃាត់ខ្លួនមនុស្សបាន៤នាក់ នឹងកំពុងតាមរកបន្ថែមទៀត ខណៈឃាត់បានវត្ថុតាងបានទូកចំនួន២ និងកម្ទេចដែកមួយចំនួន។ តាមការសួរចម្លើយលើអ្នកទាំង៤ ពួកគេបានបញ្ជាក់ថាពួកគេគ្រាន់តែចូលមកប្រមូលកម្ទេចដែកសំណល់ស្ពានប៉ុណ្ណោះ គ្មានចេតនាក្នុងការកាត់ដែកស្ពាននោះទេ។
យោងតាមការសមត្ថកិច្ចខណ្ឌ នៅពេលនេះសមត្ថកិច្ចកំពុងសួរចម្លើយអ្នកទាំង៤បន្តទៀត ខណៈរង់ចាំការសម្រេចពីព្រះរាជអាជ្ញាថាបន្តនីតិវិធីទៅតុលាការ ឬដោះលែងពួកគេទាំងនោះវិញ៕