អង្គការតម្លាភាពកម្ពុជាបានឲ្យដឹងថា ប្រជាពលរដ្ឋជិត៨០% នៅទូទាំងរាជធានី-ខេត្ត មិនយល់ដឹងពីទំហំថវិកាជាតិ ដោយសារកត្តាចំណេះដឹងនៅមានកម្រិតទាបនៅឡើយ។
ក្នុងឆ្នាំ២០១៧ រដ្ឋាភិបាលកម្ពុជា បានបង្កើនគម្រោងចំណាយថវិកាជាតិជាង ៥ពាន់លានដុល្លារ គឺកើនលើសឆ្នាំ២០១៦ ចំនួន១៥,៦%។ ថវិកានេះ ត្រូវបានបែងចែកទៅលើវិស័យសំខាន់មួយចំនួនដែលក្នុងនោះជាង៥២%នៃថវិកាជាតិត្រូវបានចំណាយទៅលើបៀវត្សរ៍របស់មន្ត្រីរាជការ ជាង២៥%សម្រាប់វិស័យការពារជាតិ ១០% វិស័យសេដ្ឋកិច្ច និងជាង៣៧% ទៅលើវិស័យសង្គមកិច្ច។
ក្នុងកម្មវិធីផ្សព្វផ្សាយលទ្ធផលនៃការស្ទង់មតិថ្នាក់ជាតិ ស្តីពី «គណនេយ្យភាព និងតម្លាភាពនៃដំណើរការថវិកា» នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល បានថ្លែងថា តាមរយៈអង្គការលោកធ្វើការស្ទង់មតិប្រជាពលរដ្ឋជាង១៥០០នាក់ក្នុងភូមិចំនួន២០០ នៃឃុំចំនួន១០០ ក្នុងចំណោម២៥រាជធានី-ខេត្ត រកឃើញថា មានប្រជាពលរដ្ឋ០.៣%ប៉ុណ្ណោះ ដែលដឹងពីទំហំថវិកាជាតិឆ្នាំ២០១៧ ខណៈជិត៨០% ទៀត មិនដឹងពីប្រភពចំណូលនិងចំណាយលើថ្នាក់ជាតិ និងថ្នាក់ក្រោមជាតិនោះឡើយ ដោយសារកត្តាចំណេះដឹងនៅមានកម្រិតទាប។
លោកថ្លែងថា«ការយល់ដឹងពីចំណូល ក៏ដូចជាចំណាយនៅក្នុងថវិកាជាតិក៏មានកម្រិតទាបផងដែរ មានតែ៣៣.៤%នៃប្រជាពលរដ្ឋដែលយើងបានធ្វើការសម្ភាសន៍ គាត់មិនអាចកំណត់ថា តើចំណូលរបស់រដ្ឋាភិបាល បានមកពីណាហើយ៤៦.៤%មិនអាចបង្ហាញថា តើមានការចំណាយថ្នាក់ជាតិជាដុំកំភួនទេ»។
លោក ព្រាប កុល ផ្តល់ជាអនុសាសន៍ថា រដ្ឋាភិបាលត្រូវខិតខំប្រឹងប្រែងបន្ថែមទៀត តាមរយៈបង្កើនការផ្សព្វផ្សាយតាមមូលដ្ឋានឲ្យបានទូលំទូលាយ និងលើកទឹកចិត្តដល់ប្រជាពលរដ្ឋឲ្យបានចូលរួមនៅក្នុងដំណើរការរៀបចំថវិកាជាតិឲ្យបានកាន់តែច្រើន ទើបធ្វើឲ្យកំណែទម្រង់ស៊ីជម្រៅរបស់រដ្ឋាភិបាលទទួលបានផលវិជ្ជាមាន។
មន្ត្រីថ្នាក់ក្រោមជាតិនៅក្រសួងសេដ្ឋកិច្ច ហិរញ្ញវត្ថុ លោក ចន ជីវ័ន្ត ដែលចូលរួមកម្មវិធីនេះ អះអាងថា ស្ថាប័នរដ្ឋនឹងធ្វើការពង្រឹងបន្ថែមទៀតជុំវិញការផ្តល់ព័ត៌មានជូនប្រជាពលរដ្ឋឲ្យបានទូលំទូលាយឲ្យស្របតាមច្បាប់ ដោយថាដើម្បីជួយដោះស្រាយទុក្ខកង្វល់ដល់ប្រជាពលរដ្ឋដែលជួបបញ្ហាប្រឈមទាំងនោះ។
លោកមានប្រសាសន៍ថា«យើងប្រហែលជាត្រូវមានការរៀបចំពង្រឹងថាតើក្នុងច្បាប់នីមួយៗដែលមានប្រការ ដែលយើងអនុញ្ញាតហើយ...យើងនិងមានភ្ជាប់កម្មវិធីអ្វីខ្លះ ដើម្បីណែនាំពង្រឹងឲ្យប្រជាពលរដ្ឋយើងយល់ដឹង ហើយកាន់តែមានឆន្ទៈចង់ចូលរួម ហើយឲ្យដឹងថាការចូលរួមរបស់ពួកគាត់មានផលប្រយោជន៍អ្វីខ្លះដល់ពួកគាត់ ហើយក៏ដូចជាសហគមន៍របស់គាត់ទាំងមូលផងដែរ»។
តាមរបាយការណ៍អង្កេតលើការផ្សព្វផ្សាយព័ត៌មានថវិកាឆ្នាំ២០១៥របស់វេទិកានៃអង្គការមិនមែនរដ្ឋាភិបាលស្តីពីកម្ពុជាឲ្យដឹងថា ដើម្បីផ្សព្វផ្សាយព័ត៌មានឲ្យប្រជាពលរដ្ឋយល់ដឹងពីថវិកាជាតិ រដ្ឋាភិបាលត្រូវបង្ហាញឯកសារថវិកាដោយសាមញ្ញ មិនមានលក្ខណៈបច្ចេកទេស ដើម្បីពួកគេយល់ដឹងអំពីហិរញ្ញវត្ថុសាធារណៈ ។
របាយការណ៍ដដែលបន្តថាចាប់តំាងពីឆ្នាំ២០១៤ ក្រសួងសេដ្ឋកិច្ចនិងហិរញ្ញវត្ថុបានផ្សព្វផ្សាយ “ថវិកាសង្ខេប” ដែលមានតួលេខចំណូល ចំណាយ និងការវាស់វែងម៉ាក្រូសេដ្ឋកិច្ចសរុបមួយចំនួន ប៉ុន្តែថវិកាសង្ខេបនោះមិនត្រូវបានចាត់ទុកជាឯកសារថវិកាសម្រាប់ប្រជាពលរដ្ឋអាចយល់បានដ៏ល្អនោះទេ។
អង្គការភាពជាដៃគូថវិកាអន្ដរជាតិបានវាយតម្លៃបង្ហាញថា កម្ពុជាទទួលបានពិន្ទុ៨លើពិន្ទុ១០០ សម្រាប់ សន្ទសន៍តម្លាភាពថវិកាជាតិ ដែលអង្គការនេះបង្ហាញថា ពលរដ្ឋកម្ពុជាមានលទ្ធភាពតិចតួចក្នុងការទទួលបានព័ត៌មានពីការប្រើប្រាស់ថវិកាជាតិដោយរដ្ឋាភិបាលដែលពួកគេត្រូវយល់ដឹង៕