អាជ្ញាធរកម្ពុជាឲ្យដឹងថា ពលរដ្ឋខ្មែរ បានសម្រេចប្រគល់ឡានទំនិញថៃជាង២០គ្រឿងឲ្យទៅក្រុមឈ្មួញវិញ បន្ទាប់ពីអាជ្ញាធរថៃ យល់ព្រមដោះលែងពលរដ្ឋខ្លួនចំនួន១៣នាក់ចេញពីពន្ធនាគារ ឲ្យត្រឡប់មកកាន់កម្ពុជាវិញ។
មេបញ្ជាការនគរបាលការពារព្រំដែន ប្រចាំតំបន់បឹងត្រកួនលោកវរសេនីយ៍ទោ ឡុង សំណាង បានឲ្យដឹងតាមរយៈ អគ្គស្នងការនគរបាលជាតិថា ប្រជាពលរដ្ឋខ្មែរចំនួន ១៣នាក់ ត្រូវបានអាជ្ញាធរថៃដោះលែង និងត្រូវបានដឹកតាមរថយន្ត២គ្រឿង ចូលតាមច្រកតំបន់ព្រំដែនបឹងត្រកួន ភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យ កាលពីយប់ម៉ោង៧ ថ្ងៃទី៧ មិថុនា ឆ្នាំ២០១៧។
ក្រោយពីអាជ្ញាធរថៃ បានបញ្ជូនពលរដ្ឋខ្មែរ១៣នាក់មកដល់ព្រំដែនក្នុងទឹកដីកម្ពុជា ប្រជាពលរដ្ឋខ្មែរ ក៏បានបើករថយន្តនិងលើកលូរចេញ ដើម្បីបើកផ្លូវឲ្យរថយន្តថៃចំនួន២៦គ្រឿង បានចូលទៅប្រទេសថៃវិញតាមការសន្យា។
គួរបញ្ជាក់ថា កាលពីថ្ងៃទី២ខែមិថុនា ប្រជាពលរដ្ឋខ្មែរប្រមាណ១០០នាក់ បានឃាត់រថយន្តថៃចំនួន២៦គ្រឿង ដោយយករថយន្តប្រមាណ៤ទៅ៥គ្រឿង និងដាក់លូបិតផ្លូវឃាត់រថយន្តថៃ ដើម្បីជាថ្នូរដោះដូរប្រជាពលរដ្ឋចំនួន១៣នាក់ ដែលថៃចាប់បាននៅចំណុចផ្សារស្រុកតាប្រាយ៉ា ខេត្តសាកែវប្រទេសថៃ បន្ទាប់ពីត្រូវបានចោទប្រកាន់ពីបទស្នាក់នៅខុសច្បាប់ និងអន្តោប្រវេសខុសច្បាប់ ដោយត្រូវបានឃុំខ្លួន។ ពលរដ្ឋទាំងនោះថា ប្រសិនជាថៃ មិនដោះលែងប្រជាពលរដ្ឋខ្មែរទាំង១៣នាក់នោះទេ រថយន្តថៃចូលដឹកដំឡូង ដែលឃាត់បានក៏មិនឲ្យទៅវិញដូចគ្នា៕
