អង្គការជាតិ និងអន្តរជាតិជិត ២០០ស្ថាប័ន ថ្មីៗនេះ បានផ្ញើលិខិតចំហរទៅរដ្ឋមន្ត្រីមហាផ្ទៃ លោក ស ខេង ដោយបានស្នើសុំឲ្យបង្កើតក្រុមស៊ើបអង្កេតមួយ ជុំវិញឃាតកម្មលើអ្នកវិភាគនយោបាយល្បីឈ្មោះ លោកបណ្ឌិត កែម ឡី។
ក្នុងលិខិតចំហរចុះថ្ងៃទី៧ ខែកក្កដា បណ្ដាអង្គការជាតិ និងអន្តរជាតិ ១៦៤ស្ថាប័ន បានបង្ហាញក្ដីបារម្ភជាថ្មីម្ដងទៀតជុំវិញការវិវឌ្ឍតិចតួចនៅក្នុងការស៊ើបអង្កេតករណីឃាតកម្មនេះ ដោយថា ការស៊ើបអង្កេត និងសវនាការជំនុំជម្រះមិនទាន់គ្រប់គ្រាន់ ដោយសារតែមានតែជនសង្ស័យឈ្មោះ អឿត អាង តែម្នាក់ប៉ុណ្ណោះ ត្រូវបានតុលាការសម្រេចផ្ដន្ទាទោស ឬចោទប្រកាន់។
ក្រុមអង្គការសង្គមស៊ីវិលទាំងនោះ បានទាមទារឲ្យបង្កើតគណៈកម្មការស៊ើបអង្កេតឯករាជ្យ និងឥតលម្អៀងមួយស្របតាមបទដ្ឋានអន្តរជាតិ ដើម្បីបន្តបើកការស៊ើបអង្កេតបន្ថែមទៀត។
អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា លោកមិនជំទាស់និងការស្នើសុំរបស់អង្គការជាតិ និងអន្តរជាតិដែលស្នើសុំឲ្យបង្កើតគណៈកម្មការស៊ើបអង្កេតឯករាជ្យ ដើម្បីបន្តបើកការស៊ើបអង្កេតបន្ថែមទៀតករណីឃាតកម្មលោក កែម ឡី។ ប៉ុន្តែលោកថា កម្ពុជាមានសមត្ថភាពគ្រប់គ្រាន់ ដើម្បីធ្វើកិច្ចការនេះ ដោយថា បើមានអន្តរជាតិចូលរួមស៊ើបអង្កេត នោះកម្ពុជានឹងស្ថិតនៅក្រោមអាណា និគមបរទេស។
លោកនិយាយថា«យើងមានស្ថាប័នរបស់យើងគ្រប់គ្រាន់ហើយ មានច្បាប់គ្រប់គ្រាន់ ទំាងច្បាប់នីតិវិធី ព្រហ្មទណ្ឌ ក្រមព្រហ្មទណ្ឌ មានតុលាការ មាននគរបាលគ្រប់គ្រាន់ ជាប្រទេសមួយធិបតេយ្យ ហើយទំរាន់បានជាប្រទេសធិបតេយ្យ តើយើងឆ្លងកាត់អ្វីខ្លះយើងដឹងហើយ ឆ្លងកាត់កិច្ចប្រជុំទីក្រុងប៉ារីសរហូតដល់មានរដ្ឋធម្មនុញ្ញ ដូច្នេះខ្ញុំយល់ថាបើការងារប៉ុណ្នឹង មានការស៊ើបអង្កេតអន្តរជាតិចូល វានាំឲ្យធិបតេយ្យភាពរបស់យើងធ្លាក់ចូលទៅក្នុងអាណានិគមនិយមបរទេសទៀត»។
លើសពីនេះទៀត លោក សុភ័គ បានបញ្ជាក់ថា ករណីឃាតកម្មលើលោក កែម ឡី អាចបន្តស៊ើបអង្កេតបាន ដរាបណាមានការស្នើសុំពីតុលាការ ដោយលោកថាសំណុំរឿងនេះកំពុងស្ថិតនៅក្នុងដៃតុលាការ។
ទោះជាយ៉ាងណា VOD មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក លី សុផាណា បានទេនៅព្រឹកថ្ងៃនេះ។
លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ទាំងកណ្ដាលថ្ងៃចែស នៅក្នុងម៉ាត់ស្ថិតក្នុងការ៉ាស់សាំងកាល់តិច នៅម្ដុំស្តុបបូកគោ កាលពីថ្ងៃទី១០ ខែកក្កដាឆ្នាំមុន។
រហូតមកដល់បច្ចុប្បន្ននេះ មានតែជនសង្ស័យឈ្មោះ អឿត អាង ហៅខ្លួនឯងថា ជួប សម្លាប់ តែម្នាក់ប៉ុណ្ណោះ ត្រូវបានចាប់ខ្លួនភ្លាមៗក្រោយឃាតកម្មនេះ។
ប៉ុន្តែ ក្រុមអង្គការស៊ីវិលលើកឡើងថា សវនាការលើជនសង្ស័យរូបនេះមានចន្លោះប្រហោង និងមានចំណុចសង្ស័យជាច្រើន ពាក់ព័ន្ធទៅនឹងមូលហេតុនៃឃាតកម្មនេះ ដែលត្រូវបានជនសង្ស័យឈ្មោះ អឿត អាង ប្រាប់ទៅសមត្ថកិច្ច៕
រាយការណ៍បន្ថែម ដោយ ណាត សុភាព