រដ្ឋាភិបាលនៅថ្ងៃទី៨ ខែសីហា ម្សិលមិញបានសម្រេចផ្តល់ថវិកាបន្ថែមដល់មន្ទីរពេទ្យគន្ធបុប្ផាដែលទទួលបានពីការតម្លើងថ្លៃប័ណ្ណចូលទស្សនារមណីយដ្ឋានអង្គរចំពោះភ្ញៀវទេសចរបរទេសម្នាក់ៗ ក្នុងចំនួន២ដុល្លារអាមេរិច។ នេះបើយោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ចនិងហិរញ្ញវត្ថុ។
ការសម្រេចផ្តល់ថវិកាបន្ថែមដល់មន្ទីរពេទ្យគន្ធបុប្ផានេះ នឹងត្រូវអនុវត្ដចាប់ពីខែកុម្ភៈឆ្នាំ២០១៧តទៅ។
រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន មានប្រសាសន៍ថា៖ “ខ្ញុំសង្ឃឹមថាការកៀរគរវិភាគទានសប្បុរសពីភ្ញៀវទេសចរបរទេស នឹងរួមចំណែកបន្ដនិរន្ដរភាពប្រតិបត្ដិការរបស់មន្ទីពេទ្យគន្ធបុប្ផា ដើម្បីជាប្រយោជន៍សម្រាប់កុមារទាំងឡាយជាពិសេសកុមារក្រីក្រកម្ពុជា ដែលមានជម្ងឺនិងសម្រាកព្យាបាលនៅមន្ទីពេទ្យគន្ធបុប្ផា“។
យោងតាមសេចក្ដីប្រកាសរបស់គ្រឹះស្ថានអង្គរចេញផ្សាយថ្ងៃទី៥ ខែសីហា បានសរសេរថា តម្លៃសំបុត្រសម្រាប់ចូលទស្សនារយៈពេល១ថ្ងៃ នឹងត្រូវដំឡើងពី២០ដុល្លារទៅ៣៧ដុល្លារ ខណៈដែលតម្លៃសំបុត្រសម្រាប់រយៈពេល៣ថ្ងៃ នឹងត្រូវដំឡើងពី៤០ដុល្លារទៅ៦២ដុល្លារ។ ចំណែកតម្លៃសំបុត្រចូលទស្សនារយៈពេលមួយសប្ដាហ៍ នឹងត្រូវដំឡើងពី៦០ដុល្លារទៅ៧០ដុល្លារ ហើយការអនុវត្តតម្លៃថ្មីនឹងចាប់ផ្ដើមនៅដើមឆ្នាំ២០១៧៕
