រដ្ឋាភិបាលកម្ពុជាបានឲ្យដឹងថាជំងឺផ្ដាសាយបក្សី H5N1 បានផ្ទុះឡើងជាថ្មីដែលកើតឡើងលើសត្វបក្សី នៅក្នុងខេត្តកំពង់ចាម ហើយអំពាវនាវឲ្យពលរដ្ឋមានការប្រុងប្រយ័ត្នខ្ពស់។
នៅថ្ងៃទី ០៩ ខែធ្នូនេះ នាយករដ្ឋាប្រយុទ្ធប្រឆាំងជំងឺឆ្លងបានលើកឡើងនៅក្នុងទំព័រហ្វេសប៊ុករបស់ខ្លួនថាថ្មីៗ នេះមានការផ្ទុះជំងឺផ្ដាសាយបក្សី H5N1 កើតលើសត្វបក្សីនៅភូមិកោះស្វាយ ឃុំត្រពាំងព្រះ ស្រុកព្រៃឈរ ខេត្តកំពង់ចាម។
នាយករដ្ឋាប្រយុទ្ធប្រឆាំងជំងឺឆ្លងបន្តថាករណីជំងឺនេះពុំទាន់មានឆ្លងលើមនុស្សទេ តែមន្រ្តីជំនាញក្រសួងសុខាភិបាលកំពុងបន្តតាមស្ថានភាពជំងឺយ៉ាងយកចិត្តទុកដាក់បំផុត។
ជាមួយគ្នានោះដែរនាយករដ្ឋាប្រយុទ្ធប្រឆាំងជំងឺឆ្លង ក៏អំពាវនាវឲ្យពលរដ្ឋមានការប្រុងប្រយ័ត្នខ្ពស់អំពីការចំលងជំងឺនេះ ដោយកុំយកមាន់ ទា ឬសត្វបក្សីឈឺឬងាប់ មករៀបចំជាអាហារ ឫលក់បន្ត ត្រូវអនុវត្តអនាម័យក្នុងការ បោចរោម និង ចំអិនជាប់ជានិច្ច។
នាយករដ្ឋាប្រយុទ្ធប្រឆាំងជំងឺឆ្លងបន្ថែមថាអ្នកឆ្លងជំងឺនេះមានអាចមានរោគសញ្ញាគ្រុនក្តៅលើសពី ៣៨.៥ អង្សារសេ និងមានរោគសញ្ញា ក្អក ឬ ឈឺក ឬ ដកដង្ហើម ហត់ និងមានប្រវត្តិប៉ះពាល់ជាមួយបក្សីឈឺ ឬងាប់ ក្នុងកំឡុងពេល ៧ ថ្ងៃមុនចេញរោគសញ្ញា ហើយបើមានករណីសង្ស័យ ត្រូវបញ្ចូនអ្នកជំងឺ ទៅមណ្ឌលសុខភាព ឬមន្ទីរពេទ្យជិតបំផុតដើម្បីទទួលថ្នាំសម្រាប់ព្យាបាលជំងឺនេះ។
នាយករដ្ឋាប្រយុទ្ធប្រឆាំងជំងឺឆ្លងក៏បានលើកឡើងដែរថាចាប់តាំងពីឆ្នាំ ២០០៥ ដល់ ២០១៤ ក្នុងប្រទេសយើងធ្លាប់កើតមានជំងឺផ្តាសាយបក្សី ដែលបានឆ្លងពីសត្វបក្សីមកមនុស្សចំនួន ៥៦ករណី ដែលក្នុង នោះ ៣៧ ករណីបានស្លាប់៕