អាជ្ញាធរថាអគ្គីភ័យបានឆាបឆេះផ្សារសែនមនោរម្យនាព្រឹកមិញ បណ្ដាលឲ្យពលរដ្ឋជាអាជីវករ ២នាក់បានស្លាប់។
បើតាមការឲ្យដឹងពីអនុផែនព្រហ្មទណ្ឌនៃស្នងការនគរបាលខេត្តមណ្ឌលគិរី លោក ម៉ៅ គឹម សេង ថាអគ្គីភ័យនេះបានកើតឡើងនៅវេលាម៉ោង ២ និង ២០ នាទីរំលងអធ្រាត្រឈានចូលថ្ងៃទី១០ ខែកុម្ភៈបណ្ដាលឲ្យឆេះផ្សារសែនមនោរម្យ ក្រុងសែនមនោរម្យ ខេត្តមណ្ឌលគិរី ទាំងស្រុង បណ្ដាលឲ្យស្លាប់មនុស្ស ២នាក់ ជាអាជីវករលក់ដូរដែលមិនទាន់ស្គាល់អត្តសញ្ញាណច្បាស់។ លោក ម៉ៅ គឹមសេង បានបន្តថាករណីអគ្គីភ័យនេះកើតឡើងដោយសារការឆ្លងចរន្តអគ្គិសនី។
លោក ម៉ៅ គឹមសេង បន្ថែមថាមកដល់ពេលនេះអគ្គិភ័យនោះនៅមិនទាន់រលត់នៅឡើយទេ ហើយកំលាំងសមត្ថកិច្ចកំពុងអន្តរាគមន៍ពន្លត់ និង ស្រាវជ្រាវបន្ថែមជុំវិញការស្លាប់ របួស និង ការខូតខាតទ្រព្យសម្បត្តិ៕