អគ្គស្នងការនគរបាលជាតិលោក នេត សាវឿន បានណែនាំឲ្យស្នងការថ្មីប្រចាំនៅក្នុងខេត្តមណ្ឌលគិរីឲ្យរៀបចំទីតាំងឈរជើង និងជម្រកស្នាក់នៅរបស់កម្លាំងការពារព្រំដែនឲ្យបានសមរម្យ និងច្បាស់លាស់។
ក្នុងពិធីតែងតាំងស្នងការនគរបាលថ្មីប្រចាំខេត្តមណ្ឌលគិរី កាលពីម្សិលមិញលោក នេត សាវឿន លើកឡើងថា៖ «ឥឡូវនេះ ខ្ញុំដាក់បន្ទុកឲ្យស្នងការរៀបចំភ្លាមដំណើរការថ្មី ត្រូវស្គាល់ភូមិសាស្ដ្រទៅមើលជួយរៀបចំ សិក្សាឡើងវិញអំពីទីតាំង កន្លែងឈរជើង ជំរកយើងនឹងរួមគ្នាដើម្បីគិតគូរ ធ្វើម៉េចដោះស្រាយជំរក»។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
លោក នេត សាវឿន បញ្ជាក់ទៀតថា ទោះបីជំរក និងទីតាំងរបស់កម្លាំងនគរបាលតាមព្រំដែនដែលត្រូវសាងសង់មិនបានទំនើបដូចប្រទេសជិតខាង ប៉ុន្ដែត្រូវតែធ្វើយ៉ាងណាឲ្យបានរឹងមាំ និងមានប្រព័ន្ធការពារគ្រប់គ្រាន់៕