នៅក្នុងពិភពបាល់ទាល់ និងអ្នកសិល្បៈច្រើនឡើង បានទម្លាយពីទំនាក់ទំនងស្នេហារវាងតារាសម្ដែងល្បីឈ្មោះអ្នកនាង សុខ សោម៉ាវត្តី និងខ្សែការពារជម្រើសជាតិលោក លី វ៉ាហេទ បន្ទាប់ពីអ្នកនាងទាំងពីមានឱកាសថតរឿង «ខូចចិត្តអាជីព» ជាមួយគ្នាកាលពីច្រើនខែមុន។ យ៉ាងណាមិញ អ្នកនាងថាទំនាក់ទំនងស្និទ្និស្នាលជាមួយកីឡាកររូបនេះ គឺគ្រាន់តែដើម្បីធ្វើឲ្យចាប់អារម្មណ៍ចំពោះខ្សែភាពយន្តដែលត្រៀមដាក់បញ្ចាំងប៉ុណ្ណោះ បើទោះជាចម្លើយរបស់នាងមិនឆ្លើយតបចំពោះសកម្មភាព និងការសារភាពរបស់ភាគីខាងប្រុស។
លោក លី វ៉ាហេទ ដែលត្រូវគេស្គាល់ថាជាកីឡាករល្បីឈ្មោះម្នាក់នៅក្នុងពិភពបាល់ទាត់បានអះអាងថា លោក និងអ្នកនាងសុខ សោម៉ាវត្តី ពិតជាកាន់តែស្និទ្ធិស្នាលគ្នា ដែលអ្នកណាក៏មិនឃើញថាមិនខុសពីគូស្នេហ៍នឹងគ្នាមែន តែលោកប្រកាសថាអ្វីៗនៅមិនទាន់ប្រាកដនោះទេគឺលុះត្រាតែរង់ចាំពេលវេលាបន្តបន្ទាប់។
លោកថា អ្នកនាងជារៀមច្បងដែលបានបង្ហាត់បង្ហាញខ្លួនឲ្យចេះសម្ដែងក្នុងពេលសម្ដែងរឿងជាមួយ ហើយឧស្សាហ៍ទៅណាមកណាជាមួយគ្នាទើបទំនាក់ទំនងជិតស្និទ្ធិបានកើតមានឡើង ហើយអាចចាត់ទុកថាគឺជាជំហាននៃការសិក្សាពីគ្នាទៅវិញទៅមក។ យ៉ាងណាមិញ លោកថាមិនទាន់គិតដល់ពីរឿងស្នេហានោះទេ គឺគ្រាន់តែលោកទទួលស្គាល់មានអារម្មណ៍ចូលចិត្តចំពោះអ្នកនាងលើសពីនារីដែលលោកបានស្គាល់ផ្សេងទៀតប៉ុណ្ណោះ។
លោកថាមិនមានហេតុផលប្រកាន់រឿងអ្នកនាងមានកូន និងធ្លាប់មានស្វាមីនោះទេ ដោយអ្វីដែលសំខាន់គឺលោករង់ចាំមើលពេលវេលាសិនថាវានឹងប្រែក្លាយទំនាក់ទំនងរបស់លោក និងអ្នកទៅដល់ចំណុចណា។ លោកសារភាពថាអ្នកនាង សុខ សោម៉ាវត្តី គឺជានារីតែម្នាក់ដែលលោកស្និទ្ធិស្នាលលើពីមិត្តភាពធម្មតា ហើយបើទោះជាអ្នកនាងអាយុបងក៏លោកយល់ថានោះមិនមានជាឧបសគ្គដែលលោកមិនអាចរាប់អានអ្នកនាងបានដែរ។
លោកចាត់ទុកថាអ្នកនាង សុខ សោម៉ាវត្តី គឺជាមិត្តស្និទ្ធិស្នាល តែលោកនៅតែមិនទាន់ទទួលស្គាល់ឡើយថាអ្នកនាងគឺជាគូស្នេហ៍របស់ខ្លួនឆ្លើយតបនឹងអ្វីដែលបានទម្លាយចេញពីក្រុមអ្នកលេងបាល់ទាត់នៅក្រុមបឹងកេតអង្គរ និងអ្នកសិល្បៈមួយចំនួនដែលស្គាល់អ្នកទាំងពីរ។ លោកថាចូលចិត្តអ្នកនាង ទើបស្គាល់ត្រឹមតែរយៈពេលខ្លី ក៏មានអារម្មណ៍ជិតស្និទ្ធិ ហើយយល់ថាខ្លួនឯង និងអ្នកនាងហាក់ដូចជាមិត្តដែលមានវ័យស្រករគ្នា និងស្គាល់គ្នាយូរមកហើយ។
លោកសារភាពថារវាងលោក និងអ្នកនាងឧស្សាហ៍មានកម្មវិធីជាមួយគ្នា ហើយដោយសារតែអ្នកនាងមិនមែនជាតារាប្រកាន់ច្រើន និងបានបង្ហាត់បង្ហាញអោយលោកចេះសម្ដែងក្នុងពេលធ្វើការជាមួយគ្នា ទើបលោកក្លាហានហ៊ានដើរជាមួយ។
អ្នកនាង សុខ សោម៉ាវត្តី បានសារភាពថា រវាងអ្នកនាង និង កីឡាករខ្សែប្រយុទ្ធក្នុងក្រុមជម្រើសជាតិ លោក លី វ៉ាហេទ ពិតជាមានទំនាក់ទំនងនឹងគ្នាច្រើនឡើង ប៉ុន្តែអ្នកនាងបានចាត់ទុកថាអ្វីៗដែលបានកើតឡើងគឺមិត្តភាពមិនខុសគ្នាពីអ្នកនាងមិត្តស្និទ្ធិស្នាលផ្សេងទៀតនោះទេ។
យ៉ាងណាមិញ អ្នកនាងថាលោកបានក្លាយជាជម្រើសមួយក្នុងចំណោមអ្នកស្និទ្ធិស្នាលទាំងអស់ ដោយសារតែនាងហ៊ានបង្ហាញភាពស្និទ្ធិស្នាល និងផ្អែមល្ហែមនៅលើហ្វេសប៊ុក ដែលធ្វើអោយការប៉ាន់ស្មានថាអ្នកនាង និងលោកស្រឡាញ់ផ្ទុះឡើង។ អ្នកនាងថាមិនមែនជារឿងចម្លែកនោះទេ ប្រសិនបើអ្វីដែលបានស្ដែងឡើងគឺជារឿងការពិត ដោយសារតែអ្នកនាងក៏បានលែងលះស្វាមី ហើយលោកលី វ៉ាហេទ ក៏មិនទាន់រៀបការ។ ម្យ៉ាងមកពីលោកមិនមែនជាតារាសិល្បៈនោះផង ទើបអ្នកនាងយល់ថាប្រសិនបើប្រែក្លាយជាសម្ព័ន្ធស្នេហាដូចអ្វីដែលគេបានថាក៏ជាគឺរឿងធម្មតា។
ក្នុងពិធីសម្ពោធរឿង «ខូចចិត្តអាជីព» កាលពីថ្ងៃទី៩ខែឧសភា គេឃើញអ្នកនាង និងលោក លី វ៉ាហេទ ពាក់នាឡិកាគូស្នេហ៍ជាមួយគ្នា ដែលអ្នកនាងបានបង្ហោះនៅលើហ្វេសប៊ុក។ អ្នកនាងមិនបានឆ្លើយតបជុំវិញអ្នកនាងពាក់នាឡិកាគូស្នេហ៍ដែលបានបង្ហោះនោះទេ ដោយអ្នកនាងគ្រាន់តែទទួលស្គាល់ថាមហាជនមើលឃើញយ៉ាងមិច គឺប្រហែលយ៉ាងនោះ។ អ្នកនាងថាពេលវេលាទើបអាចកំណត់ថារវាងអ្នកនាង និងលោក លី វ៉ាហេទ គឺជាគូស្នេហ៍ ឬគ្រាន់តែរាប់អានគ្នាក្នុងភាពស្និទ្ធិស្នាល។
អ្នកនាងប្រលយថាខ្លួនអាចដើរតាមលំនាំអ្នកនាង ខាត់ សុឃីម និងអ្នកនាង គង់ សុជាតិ ក្នុងរឿងស្នេហ៍ ដោយអ្នកនាងបង្ហើបថាស្នេហាគឺមិនប្រកាន់រឿងអាយុនោះទេ។ ជាមួយនឹងការបង្ហើបនេះហើយ ដែលអ្នកណាៗក៏មើលឃើញថាស្នេហារវាងអ្នកទាំងពីរកាន់តែបើកចំហរ បន្ទាប់ពីលើហ្វេសប៊ុកអ្នកនាងតែងបង្ហោះភាពផ្អែមល្អែមជាមួយបុរសម្នាក់ធ្វើអោយអ្នកណាក៏មើលឃើញថាអ្នកនាងពិតជាមានម្ចាស់បេះដូងថ្មី ដោយបុរសម្នាក់នោះត្រូវគេដឹងថាគឺលោកលី វ៉ាហេទ ដោយសារតែលោកគឺម្ចាស់នាឡិកាដែលអ្នកនាងបានបង្ហោះនៅថ្ងៃសម្ពោធរឿង«ខូចចិត្តអាជីព»៕