ធនាគារអភិវឌ្ឍន៍អាស៊ី ហៅកាត់ថា ADB បានឲ្យដឹងថា ក្រុមរដ្ឋមន្ត្រីកសិកម្មនៃបណ្ដាប្រទេសនៅមហាអនុតំបន់ទន្លេមេគង្គ បានឯកភាពទៅលើផែនការ ៥ឆ្នាំមួយ ខាងផ្នែកសុវត្ថិភាពចំណីអាហារ ជាកិច្ចខិតខំប្រឹងប្រែងមួយ ដើម្បីជំរុញសុវត្ថិភាពចំណីអាហារ ខណៈដែលអង្គការសុខភាពពិភពលោករកឃើញថា ស្ទើតែមានពលរដ្ឋម្នាក់ក្នុងចំណោម ១០នាក់ នៅក្នុងតំបន់នេះ ធ្លាប់ពុលអាហារ។
ក្នុងសេចក្ដីប្រកាសព័ត៌មានកាលពីថ្ងៃទី៨ ខែកញ្ញាកន្លងមកនេះ ធនាគារអភិវឌ្ឍន៍អាស៊ី បានឲ្យដឹងថា បណ្ដារដ្ឋមន្ត្រីកសិកម្មមកពីប្រទេសកម្ពុជា ចិន ឡាវ ភូមា ថៃ និងវៀតណាម បានជួបប្រជុំគ្នានៅឯខេត្តសៀមរាប។
ធនាគារមួយនេះ បញ្ជាក់ថា ក្រុមរដ្ឋមន្ត្រីទាំង ៦ប្រទេស បានឯកភាពគ្នាលើយុទ្ធសាស្ត្រ និងផែនការសកម្មភាពចន្លោះឆ្នាំ២០១៨ ដល់ឆ្នាំ២០២២ ដើម្បីកសាងប្រព័ន្ធសុវត្ថិភាពចំណីអាហារនៅទូទាំងតំបន់នេះ។
បើតាមធនាគារដដែលនេះ ប្រព័ន្ធដែលគ្រោងបង្កើតឡើងនេះ នឹងផ្អែកទៅតាមស្តង់ដារវិទ្យាសាស្ត្រ ការតាមដានលើផលិតផល និងការចែករំលែកព័ត៌មាន ជាពិសេស ព័ត៌មានស្ដីបញ្ហាគ្រោះថ្នាក់សម្រាប់ចំណីអាហារសំខាន់ៗ។
រដ្ឋមន្ត្រីកសិកម្ម រុក្ខាប្រមាញ់ និងនេសាទនៃប្រទេសកម្ពុជា លោក វេង សាខុន បានលើកឡើងនៅក្នុងសេចក្ដីប្រកាសព័ត៌មាននោះថា ផែនការយុទ្ធសាស្ត្រនេះ នឹងជួយតំបន់ទន្លេមេគង្គ ឲ្យក្លាយទៅជាតំបន់ផ្គត់ផ្គង់ផលិតផលកសិកម្មប្រកបដោយសុវត្ថិភាព និងជួយដល់បរិស្ថាន។
ផែនការយុទ្ធសាស្ត្រនេះ ត្រូវបានបង្កើតឡើងបន្ទាប់ពីអង្គការសុខភាពពិភពលោក (WHO) បាននិយាយក្នុងរបាយការណ៍ឆ្នាំ២០១៥ថា ស្ទើតែមានមនុស្សម្នាក់ទៅហើយក្នុងចំណោមប្រជាជន ១០នាក់ បានធ្លាក់ខ្លួនឈឺ បណ្ដាលមកពីការបរិភោគអាហារផ្ទុកសារធាតុពុល។
យោងតាម WHO មនុស្សដល់ទៅ ៤២ម៉ឺននាក់ បានស្លាប់ ពាក់ព័ន្ធនឹងការបរិភោគអាហារផ្ទុកទៅដោយសារធាតុពុល កាលពីឆ្នាំ២០១៥កន្លងមក៕