មនុស្ស ៤នាក់ ត្រូវបានគេរាយការណ៍មកថា បានស្លាប់ ហើយជាង ១០០នាក់ទៀត បានរងរបួស បន្ទាប់ពីរញ្ជួយដីកម្រិតខ្លាំងក្លាមួយ បានវាយប្រហារភាគខាងត្បូងនៃកោះមិនដាណាវ ស្ថិតនៅភាគខាងត្បូងប្រទេសហ្វីលីពីន នៅល្ងាចថ្ងៃម្សិលមិញ ដែលរញ្ជួយនោះបានធ្វើឲ្យអន្តរាយដល់ហេដ្ឋារចនាសម្ព័ន្ធមួយចំនួន ព្រមទាំងកាត់ផ្ដាច់ប្រព័ន្ធអគ្គិសនីនៅតាមតំបន់ជាច្រើន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីមន្ត្រីហ្វីលីពីន។
AFP បានផ្សាយបន្តថា រញ្ជួយដីកម្រិត ៦.៧រ៉ិចទ័រ បានកើតឡើងក្នុងស្រទាប់ដីជម្រៅ ១០គីឡូម៉ែត្រ និងស្ថិតនៅចម្ងាយប្រហែល ១៣គីឡូម៉ែត្រ ភាគខាងកើតទីក្រុងស៊ូរីហ្គាវ។
ទោះជាយ៉ាងណា ទីភ្នាក់ងារតាមដានរលកស៊ូណាមិ បានឲ្យដឹងថា ពុំមានការគំរាមកំហែងពីរលកយក្សស៊ូណាមិនោះឡើយ។ ហ្វីលីពីន គឺជាប្រទេសមានភូមិសាស្ត្រស្ថិតនៅតំបន់ជួរភ្នំភ្លើងប៉ាស៊ីហ្វិក និងតែងតែរងគ្រោះរញ្ជួយដីជាញឹកញាប់៕
