យ៉ាងហោចណាស់មនុស្ស៣នាក់បានស្លាប់ និង២០នាក់ផ្សេងទៀតរងរបួសធ្ងន់ស្រាលដោយសារគ្រោះថ្នាក់ចរាចរណ៍ក្រឡាប់រថយន្តក្រុង ដឹកអ្នកដំណើរនៅឃុំសង្វើយ ស្រុកជីក្រែង ខេត្តសៀមរាប នៅព្រឹកថ្ងៃទី១១ខែមេសាឆ្នាំ២០១៨នេះ។
អធិការនគរបាលស្រុកជីក្រែង លោក សុខ សុទ្ធាវុធ ឲ្យដឹងថា រថយន្តក្រុងដែលក្រឡាប់នោះ ជារបស់ក្រុមហ៊ុនស៊ុនអ៊ូខុងដឹកអ្នកដំណើរ ពាក់ស្លាកលេខភ្នំពេញ ៣D៥២៨០ ធ្វើដំណើរពីភ្នំពេញ មកខេត្តសៀមរាប និង ឆ្ពោះទៅកាន់ខេត្ដឧត្ដរមានជ័យ ប៉ុន្ដែធ្វើដំណើរដល់កន្លែងកើតហេតុរថយន្ដបុកបង្កាន់ដៃស្ពាន ត្រង់ចំណុចផ្លូវកោង ខណៈអ្នកបើកបរងងុយដេក។
លោក បន្ដថា ឧបទ្ទវហេតុនេះ ធ្វើអោយមនុស្ស៣នាក់បានស្លាប់ និង២០ទៀតរងរបួសធ្ងន់និងស្រាល ក្នុងនោះមានជនបរទេសបីនាក់។
លោក បន្ថែមថា ជនរងគ្រោះទាំងអស់ត្រូវបានជួយសង្គ្រោះយកទៅមណ្ឌលសុខភាពកំពង់ក្តី និងខ្លះទៀតបញ្ជូនទៅសង្គ្រោះនៅពេទ្យខេត្ដសៀមរាប៕