ប្រទេសមហាអនុតំបន់មេគង្គចំនួន៦បានចុះកិច្ចព្រមព្រៀងរួមគ្នា ដោះស្រាយបញ្ហាគ្រឿងញៀន ខណៈដែលពួកគេរកឃើញថា ការប្រើប្រាស់គ្រឿងញៀនប្រភេទមេតំាហ្វេតាមិន នៅតែបន្តកើនឡើង។
ប្រទេស ឡាវ វៀតណាម ថៃ ចិន ភូមា និងកម្ពុជា បានចុះកិច្ចព្រមព្រមព្រៀងនេះ កាលពីម្សិលមិញ បន្ទាប់ពីបិទបញ្ចប់វគ្គបណ្តុះបណ្តាលមួយនៅកម្ពុជារយៈពេល៣ថ្ងៃ។
ក្នុងវគ្គបណ្តុះបណ្តាលនោះ តំណាងប្រចាំតំបន់នៃការិយាល័យអង្គការសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ លោក ជាមី ដូក្លាស មានប្រសាសន៍ថា ប្រទេសទាំង៦ បានរកឃើញថា កំណើននៃអ្នកប្រើប្រាស់ថ្នាំញៀនប្រភេទមេតំហ្វេតាមីន មានការកើនឡើងជាងឆ្នាំមុន។ លោកថា អ្នកប្រើប្រាស់ទាំងនោះ ភាគច្រើនជាយុវជន។
លោក ជាមី ដូក្លាស បន្តថា ប្រទេសមហាអនុតំបន់មេគង្គត្រូវមានកម្មវិធីបន្សាប ដើម្បីទប់ស្កាត់បញ្ហានេះ។ លោកថាប្រទេសកម្ពុជាក៏ស្ថិតក្នុងចំណោមប្រទេសបួន ដែលមានមន្ទីរពិសោធន៍គ្រឿងញៀនផងដែរ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន (NACD) លោក មាស វិរិទ្ធ មានប្រសាសន៍ថា កម្ពុជាបានទប់ស្កាត់និងបន្សាបករណីនេះផងដែរ តាមរយៈការអនុវត្តច្បាប់ ការគ្រប់គ្រងតាមព្រំដែន និងចំណាត់ការ របស់តុលាការ ដែលលោកគិតថា ជាការរួមចំណែកមួយយ៉ាងសំខាន់ក្នុងការទប់ស្កាត់បញ្ហាទាំងនេះ។
របាយការណ៍ស្តីពីការត្រួតពិនិត្យគ្រឿងញៀន របស់អាជ្ញាធរជាតិប្រយុទ្ធប្រឆាំងគ្រឿងញៀន ឲ្យដឹងថាអាជ្ញាធរបង្ក្រាបបទល្មើសជួញដូរគ្រឿងញៀន សរុបចំនួន៣០៦១ករណីដែលចំនួននេះកើនឡើងជាង១២៨ភាគរយ បើធៀបនឹងឆ្នាំ២០១៤គឺមានតែ១៣៣៧ករណី។
របាយការណ៍បន្តថាសមត្ថកិច្ចឃាត់ខ្លួនមនុស្ស៧០០៨នាក់ និងចាប់បានគ្រឿងញៀនសរុបជាង១៦២០គីឡូក្រាម៕