សារព័ត៌មានថៃបានចុះផ្សាយថា តម្រួតថៃកំពុងតាមចាប់ខ្លួនជនសង្ស័យបំផ្ទុះគ្រាប់បែក ៤នាក់ បន្ទាប់ពីកាមេរ៉ាសុវត្ថិភាពមួយបង្ហាញថា មនុស្ស ៤នាក់មានជាប់ពាក់ព័ន្ធនឹងការវាយប្រហារបំផ្ទុះគ្រាប់ ២គ្រាប់ នៅក្នុងផ្សារទំនើប Big C ស្ថិតក្នុងទីរួមខេត្តផាតានី កាលពីថ្ងៃអង្គារកន្លងមកនេះ ដែលបណ្ដាលឲ្យមនុស្សដល់ទៅ ៦១នាក់រងរបួស។
កាសែតបាងកក ប៉ុស្តិ៍ បានដកស្រង់សម្ដីមេតម្រួតថៃ លោក រ៉ុនណាស៊ីន ភូសារ៉ា ដែលបាននិយាយថា តាមរយៈវីដេអូកាមេរ៉ាសុវត្ថិភាពនោះ តម្រួតថៃអាចកំណត់មុខជនដៃដល់បានយ៉ាងច្បាស់។
តម្រួតថៃរូបនេះបន្ថែមថា ការងារកំពុងតែដំណើរការទៅដើម្បីត្រួតពិនិត្យមើលកាមេរ៉ាសុវត្ថិភាពដទៃទៀតនៅជិតកន្លែងកើតហេតុ ដើម្បីកំណត់អត្តសញ្ញាណជនវាយប្រហារឲ្យបានច្បាស់។
លោកបញ្ជាក់ថា ជនដៃដល់គឺជាក្រុមបះបោរនៅក្នុងតំបន់ ហើយនឹងត្រូវគេកំណត់អត្តសញ្ញាណបាន។
មនុស្សដល់ទៅ ៦១នាក់ ក្នុងនោះមានទាំងកូនក្មេងផងដែរ បានរងរបួសក្រោយការបំផ្ទុះគ្រាប់ ២គ្រាប់នៅផ្សារទំនើប Big C។ ជនរងគ្រោះ ៣នាក់ កំពុងស្ថិតក្នុងស្ថានភាពធ្ងន់ធ្ងរ៕