រដ្ឋាភិបាលអះអាងថា ខ្លួនកំពុងជំរុញទៅស្ថាប័នពាក់ព័ន្ធ រកលទ្ធភាពឲ្យកម្មករអាចទិញរថយន្តដំឡើងក្នុងស្រុក យកទៅរត់ឈ្នួល ដឹកកម្មករបាន។
លោកនាយករដ្ឋមន្ត្រី ហ៊ុន សែន បានសរសេរនៅលើគេហទំព័រហ្វេសប៊ុក របស់លោកថា រាជរដ្ឋាភិបាលកំពុងសិក្សាពីលទ្ឋភាពបើកធនាគារ ផ្តល់ប្រាក់កម្ចីក្នុងអត្រាការប្រាក់ទាប សម្រាប់ឲ្យកម្មករអាចទិញរថយន្តដំឡើងនៅកម្ពុជា យកទៅធ្វើជារថយន្តឈ្នួលដឹកកម្មករ ដើម្បីរកប្រាក់ចំណូលបាន។
លោក ហ៊ុន សែន បញ្ជាក់ថា លោកបានស្នើទៅធនាគារជាតិកម្ពុជា និងក្រុមប្រឹក្សាអភិវឌ្ឍន៍កម្ពុជា ដើម្បីសិក្សាពីគោលនយោបាយ កម្ចីថវិកាមានភាពអនុគ្រោះទាបបំផុតនេះ។
លោកថា៖«ក្រុមហ៊ុន Daehan Auto Cambodia មានបំណងចង់បង្កើតជាធនាគារមួយជួយផ្តល់ប្រាក់កម្ចីដែលមានអត្រាការប្រាក់ទាបជាងធនាគារឯកជន»។
ការលើកឡើងរបស់នាយករដ្ឋមន្ត្រី ធ្វើឡើងក្រោយពីលោក ទៅពិនិត្យក្រុមហ៊ុនឯកជនដំឡើងរថយន្តមួយកន្លែង នៅក្រុងបាវិត ខេត្តស្វាយរៀងកាលពីម្សិលមិញ ដែលរថយន្តដំឡើងនោះ មានកៅអីអង្គុយជាជួរ មានឃ្លប់បិទជិត បំពាក់ដោយម៉ាស៊ីនត្រជាក់ និងវីដេអូ ។
ទីប្រឹក្សាសេដ្ឋកិច្ចនៃក្រុមហ៊ុន Emerging Markets Consulting (EMC) លោក ង៉ែត ជូ បានស្វាគមន៍ទៅនឹងគោលនយោបាយនេះ ប៉ុន្តែលោកបានចោទជាសំនួរជាច្រើន សម្រាប់គោលនយោបាយនេះ។
លោកថា៖«ប៉ុន្តែយើងសួរថា តើទំហំទីផ្សារមានប៉ុនណា ? រហូតយើងឈានទៅបង្កើតវិនិយោគបង្កើតធនាគារមួយ ដើម្បីផ្តល់សេវាអត្រាការប្រាក់ទាប។ មើលទៅសម្រាប់ខ្ញុំ ក្នុងន័យសេដ្ឋកិច្ចវាអត់ចាំបាច់ទេ បើសិនជាយើងចង់ផ្តល់សេវាហ្នឹងធ្វើការផ្ទាល់ជាមួយរថយន្តដំឡើងរថយន្តហ្នឹងតែម្តងទៅ ផ្តល់ជាសេវាបង់រំលួសសម្រាប់អ្នកដែលមានបំណងចង់យកទៅដឹកកម្មករហើយយើងផ្តល់ការប្រាក់ទាបអីអញ្ចឹងទៅ»។
ទោះជាយ៉ាងណាលោកនាយករដ្ឋមន្ត្រីថា កម្ចីប្រាក់ដែលមានអត្រាការប្រាក់ទាប នឹងជួយឲ្យសេវាដឹកជញ្ជូនកម្មករ នៅទូទាំងប្រទេស កាន់តែមានសុវត្ថិភាព ខណៈកម្មករបច្ចុប្បន្នភាគច្រើន ប្រើមធ្យោបាយធ្វើដំណើរ ដោយឈរប្រជ្រៀតគ្នាលើរថយន្តកូរ៉េ១តោនកន្លះ ឬពីរតោន ដែលអ្នកឃ្លាំមើលបារម្ភថា មធ្យោបាយធ្វើដំណើរបែបនេះ ប្រឈមនឹងគ្រោះថ្នាក់ ។