អ្នកមានជម្លោះដីធ្លីជាមួយក្រុមហ៊ុន OCIC ក្នុងខណ្ឌជ្រោយចង្វា បានជំរុញទៅក្រសួងរៀបចំដែនដី ឲ្យពន្លឿនការដោះស្រាយវិវាទដីធ្លីរបស់ពួកគេ ខណៈវិវាទនោះបានអូសបន្លាយអស់រយៈពេល ៨ឆ្នាំមកហើយនោះ។
ពលរដ្ឋប្រមាណ ២០នាក់ដែលមានជម្លោះដីធ្លីជាមួយក្រុមហ៊ុន OCIC បានប្រមូលផ្តុំគ្នាមុខក្រសួងរៀបចំដែនដីជាថ្មីទៀតនៅថ្ងៃនេះ ដើម្បីសុំទៅរដ្ឋមន្រ្តីលោក ជា សុផារ៉ា ឲ្យដោះស្រាយបញ្ចប់វិវាទដីធ្លីនៅខណ្ឌជ្រោយចង្វា។
តំណាងពលរដ្ឋ លោក ជា សុផាត ប្រាប់វីអូឌីនៅកន្លែងតវ៉ាថា ពលរដ្ឋជាង ១០០គ្រួសារនៅខណ្ឌជ្រោយចង្វាមានជម្លោះដីធ្លីជាមួយក្រុមហ៊ុន OCIC តាំងពីឆ្នាំ២០១១ ខណៈក្រុមហ៊ុនទទួលបានសិទ្ធិវិនិយោគក្រុងរណបនៅទីនោះ។
លោកបន្តថា ក្រោមគម្រោងអភិវឌ្ឍន៍ដែលធ្វើឲ្យប៉ះពាល់ដីធ្លីពលរដ្ឋនេះ គឺសាលារាជធានីភ្នំពេញដោះស្រាយសំណងផលប៉ះពាល់ឲ្យតែ ១០%ប៉ុណ្ណោះ ខណៈក្រុមពលរដ្ឋទាមទារឲ្យឃ្វាលជាស្បែកខ្លាសម្រាប់ដីលំនៅឋាន និងដីស្រែចំការសុំសំណង ៥០%នៃដីដែលខ្លួនកាន់កាប់ ហើយបើទិញលក់ត្រូវគិតតាមតម្លៃទីផ្សារ។
តំណាងពលរដ្ឋ លោក ជា សុផាត
ពលរដ្ឋសក់សវ័យ ៥៧ឆ្នាំម្នាក់ទៀត លោក ស៊ុន ប៉ុនសុង និយាយថា ដីស្រែចម្ការរបស់លោកជាង ៦ពាន់ម៉ែត្រការ៉េ បានរងផលប៉ះពាល់ ខណៈដែលលោកអះអាងថា បានកាន់កាប់តពីដូនតា និងមានការទទួលស្គាល់ពីអាជ្ញាធរមូលដ្ឋានតាំងពីឆ្នាំ១៩៧៩មកម៉្លេះ។
បុរសមានកូនក្នុងបន្ទុកចំនួន៩នាក់រូបនេះ ឲ្យដឹងបន្ថែមថា ចាប់តាំងពីក្រុមហ៊ុនបូមខ្សាច់ពន្លិចមក គ្រួសារគាត់គ្មានដីធ្លីសម្រាប់បង្កបង្កើនផលទៀតទេ ដែលធ្វើឲ្យគ្រួសារគាត់ជួបបញ្ហាជីវភាព។
លោកបន្ថែមថា៖ «កាលមុន ខែទឹកស្រកយើងស្ទូង ក្រោយស្ទូងចប់ ចូលខែ១ យើងដាំពោត ហើយយើងប្រមូលផលពោតអស់ យើងព្រួសល្ងទៅ តែក្រោយមកគេបូមខ្សាច់លុបចោលអស់ហើយ។ វាប៉ះពាល់ដល់គ្រួសារខ្ញុំខ្លាំងណាស់ កាលមុន យើងបានស្រូវបានអង្ករ យើងរកលុយទិញតែម្ហូបបានហើយ តែឥលូវទិញគេមួយចប់ ខ្ញុំមានអីទៀត ឥលូវរត់ម៉ូតូឌុបហ្នឹង»។
មន្រ្តីរដ្ឋបាលក្រសួងរៀបចំដែនដីនគររូបនីយកម្ម និងសំណង់ បានប្រាប់ទៅក្រុមពលរដ្ឋឲ្យរៀបចំញត្តិសារថ្មីដើម្បីសុំជួបជាមួយរដ្ឋមន្រ្តី លោក ជា សុផារ៉ា នៅពេលក្រោយ។
វិអូឌីមិនទាន់បានសុំការឆ្លើយតបពីតំណាងក្រុមហ៊ុន OCIC បានទេជុំវិញវិវាទនេះ។
ទោះជាយ៉ាងណា អ្នកនាំពាក្យសាលារាជធានីភ្នំពេញ លោក ម៉េត មាសភក្តី មានប្រសាសន៍ថា សាលារាជធានីភ្នំពេញគ្មានគោលការណ៍អ្វីថ្មីសម្រាប់ដោះស្រាយផលប៉ះពាល់ជូនពលរដ្ឋនៅសេសសល់នោះទេ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី
ក្រុមពលរដ្ឋអះអាងថា ពួកគាត់ ១៣៤គ្រួសារដែលភាគច្រើនជាមន្រ្តីរាជការ មានមានជម្លោះដីធ្លីជាមួយក្រុមហ៊ុន OCIC នៅខណ្ឌជ្រោយចង្វា តាំងពីឆ្នាំ២០១១ ក្នុងទំហំដីប្រមាណជាង ១០០ហិកតាទៀតដែលមិនទាន់បានដោះស្រាយចប់៕