រដ្ឋាភិបាលកម្ពុជា បានសម្រេចបង្កកគណនីធនាគារអង្គការមួយ ដែលដំណើរការដោយស្ថាបនិកកាសែត ដឹ ខេមបូឌា ដេលី បន្ទាប់ពីកាសែតភាសាអង់គ្លេសមួយនេះ បានសម្រេចផ្អាកដំណើរការរបស់ខ្លួនកាលពីសប្ដាហ៍មុន ដោយពុំបានទូទាត់បំណុលពន្ធទៅតាមការបង្គាប់របស់រដ្ឋាភិបាល។
អង្គការជំនួយពិភពលោកដើម្បីកម្ពុជា ដែលដំណើរការដោយអតីតម្ចាស់កាសែត ដឹ ខេមបូឌា ដេលី លោក Bernard Krisher បានប្រកាសនៅលើទំព័រហ្វេសប៊ុករបស់ខ្លួន កាលពីថ្ងៃទី១០ខែកញ្ញាថា គណនីធនាគាររបស់ខ្លួន ត្រូវបានអគ្គនាយកដ្ឋានពន្ធដារបង្កកហើយ ដោយពុំមានការជូនដំណឹងជាមុននោះទេ។
អង្គការនេះ បានបញ្ជាក់ថា សេចក្ដីសម្រេចបែបនេះរបស់អាជ្ញាធរកម្ពុជា បានរំលោភលើអនុស្សារណៈយោគយល់គ្នារវាងរដ្ឋាភិបាលកម្ពុជា និងអង្គការមនុស្សធម៌មួយនេះ។ ក្រៅពីថា រំលោភលើអនុស្សារណៈហើយ អង្គការនេះបានអះអាងថា កម្មវិធីជំនួយមនុស្សធម៌ដែលផ្ដល់ការអប់រំដល់កុមារកម្ពុជានោះ ក៏នឹងត្រូវផ្អាក ដោយសារតែវិធានការបែបនេះរបស់រដ្ឋាភិបាលកម្ពុជា។
វិធានការបែបនេះ របស់រដ្ឋាភិបាលកម្ពុជា ត្រូវបានធ្វើឡើងបន្ទាប់ពីកាសែត ដឹ ខេមបូឌា ដេលី បានសម្រេចបិទដំណើរការរបស់ខ្លួនកាលពីថ្ងៃទី០៤ខែកញ្ញា បន្ទាបពីផុតឱសានវាទ ដែលរដ្ឋាភិបាលកំណត់ឲ្យកាសែតនេះបង់ពន្ធជាង ៦លានដុល្លារ ដែលរដ្ឋាភិបាលចោទថា កាសែតបរទេសមួយនេះ ជំពាក់រដ្ឋនៅក្នុងរយៈពេល ១០ឆ្នាំចុងក្រោយនេះ។
អង្គការជំនួយពិភពលោកដើម្បីកម្ពុជា ឲ្យដឹងថា ចាប់ពីថ្ងៃទី១១ខែកញ្ញា ខ្លួននឹងផ្អាកកម្មវិធីសិក្សាភាសាអង់គ្លេស ថ្នាក់កុំព្យូទ័រ កម្មវិធីសាងសង់សាលារៀន និងការផ្ដល់គ្រូបង្រៀនទៅដល់មណ្ឌលសិក្សា នៅតំបន់ជនបទប្រមាណ៩០កន្លែង។
អង្គការនេះថា គ្រាន់តែអាចបន្ដដំណើរការមជ្ឈមណ្ឌលថែទាំ ដល់កុមារជិត៤០នាក់ ក្នុងរយៈពេល១ខែទៀតប៉ុណ្ណោះ ដោយថា បើគិតពីមូលនិធិ ដែលមាននោះ គឺអង្គការនេះ នឹងត្រូវបញ្ឈប់ការងារបុគ្គលិកចំនួន ១០០នាក់ ក្នុងចំណោម១២០នាក់។
កាលពីថ្ងៃទី៨កញ្ញាកន្លងទៅនេះ លោក Bernard Krisherបានផ្ញើលិខិតស្នើសុំកិច្ចអន្ដរាគមន៍ទៅលោកនាយករដ្ឋមន្ដ្រី ហ៊ុន សែន ដោយថា លោកនឹងរ៉ាប់រង កាតព្វកិច្ចពន្ធមួយភាគធំ គិតពីខែសីហាឆ្នាំ១៩៩៣ ដល់ខែមិនាឆ្នាំ២០១៧។
លោកស្នើថា កូនស្រីរបស់លោក គឺលោកស្រី Deborath Krisher Steele គួរទទួលខុសត្រូវបង់ពន្ធ សម្រាប់រយៈពេល៤ខែប៉ុណ្ណោះ ចាប់ពីខែមិនាឆ្នាំ២០១៧ទៅ បន្ទាប់ពីលោកស្រី បានទិញកាសែតនេះបន្ដ និងចុះបញ្ជីជាមួយរដ្ឋាភិបាល។
បន្ថែមលើសនេះ លោកស្រី Deborath Krisher Steele ក៏បានផ្ញើលិខិតមួយដែរ ដោយស្នើឲ្យលោក ហ៊ុន សែន អន្ដរាគមដោះស្រាយទំនាស់ រវាងអគ្គនាយកដ្ឋានពន្ធដារនិងកាសែត ដឹ ខេមបូឌា ដេលី ដើម្បីអាចឲ្យកាសែតនេះដំណើរការឡើងវិញ។
VOD មិនទាន់អាចទាក់ទងអគ្គនាយកដ្ឋានពន្ធដាលោក គង់ វិបុល បាននៅឡើយទេ។ ប៉ុន្ដែលោក គង់ វិបុល បានប្រាប់អង្គភាព Fresh Newsកាលពីម្សិលមិញថា ពាក់ព័ន្ធរឿងនីតិបុគ្គល គឺមិនអាចឲ្យអ្នកណា សុំទទួលខុសត្រូវបាននោះទេ ហើយថា ត្រូវតែសងជាដាច់ខាត។
នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ Human Rights Watch លោក Phil Robertson បានចាត់ទុកការបិទកាសែត Cambodia Daily ថាជាការគំរាមកំហែងដ៏ធ្ងន់ធ្ងរបំផុតដល់សេរីភាពសារព័ត៌មាននៅកម្ពុជា ចាប់តាំងសន្ធិសញ្ញាសន្តិភាពទីក្រុងប៉ារីសឆ្នាំ១៩៩១។
លោក Phil Robertson បានលើកឡើងថា ម្ចាស់ជំនួយរបស់កម្ពុជា គួរតែអំពាវនាវទៅរដ្ឋាភិបាលកម្ពុជា ឲ្យបញ្ឈប់ចំណាត់ការតាមផ្លូវច្បាប់ប្រឆាំងនឹងកាសែតមួយនេះ រហូតដល់មានការធ្វើសវនកម្មស្របច្បាប់ទៅលើបញ្ហាបំណុលពន្ធនេះ។
កាសែតភាសាអង់គ្លេស Cambodia Daily ត្រូវបានបង្កើតឡើងដោយអ្នកកាសែតអាមេរិកជើងចាស់ លោក Bernard Krisher ក្នុងឆ្នាំ១៩៩៣ មុននឹងកាសែតនេះ ត្រូវបានលក់ទៅឲ្យអ្នកស្រី Deborah Krisher-Steele នៅក្នុងឆ្នាំ២០១៧នេះ៕
