ចិនគឺជាប្រទេសដែលដឹកនាំដោយរបបកុម្មុយនីស្ត ដឹកនាំដោយគណបក្សតែមួយ ចំណែកមេដឹកនាំត្រូវផ្លាស់ប្តូរគ្នាដោយសមាជបក្សនៅថ្នាក់ជាតិ៥ឆ្នាំម្តង។ មានន័យថា៥ឆ្នាំម្តងសមាជិកបក្សកុម្មុនីស្តនឹងបោះឆ្នោតសម្រេចថា ត្រូវឲ្យបុគ្គលម្នាក់នោះកាន់តំណែងជាប្រធានាធិបតីទៀតឬ យ៉ាងណា?
សម្រាប់បុគ្គលដែលមានលក្ខណៈ ដែលមានការវិនិច្ឆ័យថា ធ្វើឲ្យប្រទេសរីកចម្រើន និង មានឥទ្ធិពលលើពិភពលោកនោះសមាជិកបក្សអាចនឹងបោះឆ្នោតគាំទ្រឲ្យបន្តមួយអាណត្តិ៥ឆ្នាំទៀត។ អាណត្តិប្រធានាធិបតីពីរអាណត្តិគឺ១០ឆ្នាំ។
សម្រាប់សមាជបក្សថ្នាក់ជាតិលើកទី១៩ នឹងចាប់ផ្តើមធ្វើឡើងនៅថ្ងៃទី១៨ខែតុលាខាងមុខ ហើយនឹងមានការពិភាក្សាជ្រើសរើសមេដឹកនាំបន្ទាប់។ ក្នុងដំណាក់កាលនេះ ពិភពលោកកំពុងតែយកចិត្តទុកដាក់តាមដានថា តើអ្នកណា ដែលសមាជបក្សជ្រើសរើសនៅថ្ងៃទី១៨ខែតុលា ឲ្យក្លាយជាប្រធានាធិបតី និង ជាមេបញ្ជាការបំពូលនៃកងទ័ពរបស់ជាតិ។
អ្នកដែលអាចនឹងត្រូវសមាជបក្សកុម្មុយនីស្តចិនជ្រើសរើសមិនសំដៅតែអ្នកនយោបាយទេ គឺអ្នកជំនួញ ឬ សហគ្រិនល្បីឈ្មោះ ក៏អាចជ្រើសរើសដែរ ឲ្យតែអ្នកទាំងនោះជាបុគ្គលមានឥទ្ធិពល ហើយមានការវិនិច្ឆ័យថា អាចធ្វើឲ្យប្រទេសមានការរីកចម្រើន។
សារព័ត៌មានCNN បានពិភាក្សាជាមួយអ្នកជំនាញ១០រូប ហើយធ្វើប៉ាន់ស្មានថា មានបុគ្គលម្នាក់ក្នុងចំណោម៥នាក់អាចនឹងត្រូវបានជ្រើសរើសក្នុងនោះគឺ៖
ទី៥លោកLi Keqiang: បច្ចុប្បន្នលោកជានាយករដ្ឋមន្ត្រី ដែលគេស្គាល់ថា ជាបុគ្គលមានឥទ្ធិពលទី២បន្ទាប់ពីប្រធានាធិបតី។ អ្នកជំនាញបានពិពណ៌នាថា នាយករដ្ឋមន្ត្រីរូបនេះ ជាអ្នកគ្រប់គ្រងសេដ្ឋកិច្ចធំបំផុតលំដាប់ទី២នៅលើពិភពលោកដែលមានលក្ខណៈស្មុគស្មាញ។ លោកLiជាអតីតអភិបាលខេត្ត Henanគឺជាអ្នកដែលគេស្គាល់ថា ជាបុគ្គលសំខាន់ក្នុងការជួយជំរុញអតីតប្រធានាធិបតី Hu Jintao ឲ្យមានឥទ្ធិពលកាន់តែខ្លាំង។លោកLi ជាបុគ្គលដែលមានសមត្ថភាព និង មានខ្សែបណ្តាញច្រើនលើវិស័យផ្សេងៗនៅក្នុងសង្គម។
ទី៤លោក Ma Huateng: នៅក្នុងសង្គមចិនមិនមានបណ្តាញទំនាក់ទំនងសង្គម ដែលពិភពលោកកំពុង ប្រើប្រាស់ដូចជា Facebook និងTwitter នោះទេ គឺនៅក្នុងប្រទេសចិនមានតែWeChat ជាបណ្តាញទំនាក់ទំនងសង្គមកំពុងពេញនិយមបំផុតនៅក្នុងប្រទេសកុម្មុនីស្តមួយនេះ។ លោក Ma Huateng គឺជាស្ថានិកក្រុមហ៊ុន Wechat ហើយត្រូវទស្សនាវដ្តីForbes ចុះផ្សាយជា ជាបុគ្គលដែលមានទ្រព្យសម្បត្តិច្រើនលំដាប់ទី៣នៅក្នុងប្រទេសចិនបន្ទាប់ពីលោក Jack Ma និង Wang Jianlin។លោក Ma Huateng ឈ្មោះហៅក្រៅរបស់លោក Pony ជាអ្នកបង្កើតក្រុមTencent ជាក្រុមហ៊ុនបង្កើតបណ្តាញទំនាក់ទំនងសង្គមWechat តាំងពីឆ្នាំ ១៩៩៨ គឺជាការសហការបង្កើតជាមួយមិត្តភ័ក្តិរបស់លោករៀននៅមហាវិទ្យាល័យជាមួយគ្នា។Wechat កំពុងតែពេញនិយមខ្លាំងក្នុងការប្រើប្រាស់ទំនាក់ទំនងផ្ញើសារផ្សេងៗ ដែលមានជាង ១ពាន់លាននៃការប្រើប្រាស់។
ទី៣លោកWang Qishan: ជាបុគ្គលដែលមានឥទ្ធិពលខ្លាំងនៅក្នុងគណបក្សកុម្មុយនីស្តចិនចាប់ពីឆ្នាំ២០១២។ លោកជា បុគ្គលម្នាក់ក្នុងចំណោម៧នាក់ដែលត្រូវជ្រើសរើសជាគណៈកម្មការកាន់កិច្ចការនៅការិយាល័យនយោបាយ ជាអ្នកដែលមានឥទ្ធិពលក្នុងការសម្រេចលើកិច្ចការសំខាន់នៅក្នុងបក្ស។
លោក Wang ជាបុគ្គលលេចធ្លោរម្នាក់ដែលជាបេក្ខជនក្នុងការបោះឆ្នោតជ្រើសរើសក្នុងសមាជ ហើយអាចទទួលបានការគាំទ្រ។ ទោះយ៉ាងណា បញ្ហាអាយុជាចំណុចមួយដែលអាចរារាំងដល់ប្រជាប្រិយភាពរបស់លោក ព្រោះលោកមានអាយុ៦៩ឆ្នាំហើយ គិតត្រឹមការរៀបចំសមាជជាតិលើកទី១៩ នៅថ្ងៃទី១៨ខែតុលានេះ។
ទី២ លោក Jack Ma: ជាអតីតគ្រូបង្រៀនភាសាអង់គ្លេស ចូលចិត្ត រាំតាមចង្វាក់ភ្លេងរបស់តារាចម្រៀង Michael Jackson ។ លោកមានឈ្មោះជា ភាសាចិន Ma Yun ជានាយក និង ស្ថាបនិកក្រុមហ៊ុន Alibaba ជាក្រុមហ៊ុនដែលមានប្រជាប្រិយភាពនៅចិន និង លើពិភពលោកក្នុងការលក់ផលិតផលលើបណ្តាញអ៊ិនធើណែត។ លោកជា បុរសដែលមានទ្រព្យសម្បត្តិច្រើនបំផុតនៅក្នុងប្រទេសចិន។
លោក Jack Ma ជាអ្នកជំនួញចិនធ្លាប់មានជំនួបផ្ទាល់ មួយទល់និងមួយជាមួយប្រធានាធិបតីអាមេរិក រួមទាំងលោកបារ៉ាក់អូបាម៉ា និង លោកដូណល ត្រាំ ដើម្បីជជែកពីការវិនិយោគនិងការបង្កើតការងារ។
ទី១ លោក Xi Jinping: បច្ចុប្បន្នលោកជាប្រធានាធិបតីចិន។ លោកត្រូវបានសមាជបក្សបោះឆ្នោតជ្រើសរើសជា ប្រធានាធិបតីកាលពីឆ្នាំ២០១២។ លោកស្ថិតនៅក្នុងតំណែងបាន៥ឆ្នាំ ដូច្នេះលោកនៅតែមានឱកាសកាន់តំណែងនេះរយៈពេល៥ឆ្នាំទៀត បើសិនជាបក្សបោះឆ្នោតជ្រើសរើសជាថ្មី។
លោកXi កាន់តំណែងបាន៥ឆ្នាំកន្លងមក ធ្វើឲ្យឥទ្ធិពលរបស់លោកកាន់តែខ្លាំងនៅក្នុងសង្គមចិន ដោយមានស្នាដៃក្នុងការប្រយុទ្ធប្រឆាំងអំពើពុករលួយ ពង្រឹងការងាររបស់រដ្ឋ និង ពង្រីកឥទ្ធិពលរបស់ប្រទេស នៅលើពិភពលោក។
ក្រុមអ្នកតាមដានលើកឡើងថា អ្នកដែលអាចនឹងត្រូវសមាជបក្សជ្រើសរើសនៅក្នុងថ្ងៃទី១៨តុលានេះ លោកXi នៅតែមានក្តីសង្ឃឹមច្រើនជាងគេ។
ដោយសារតែការដឹកនាំរបស់លោកXi បានបង្ហាញពីភាពខ្លាំងក្លានៃប្រទេស មន្ត្រីមួយចំនួនលើកឡើងពីការធ្វើវិសោធនកម្មរដ្ឋធម្មនុញ្ញជាច្បាប់កំពូលរបស់ប្រទេសនេះ ដើម្បីផ្តល់អំណាចដល់មេដឹកនាំរូបនេះ អាចគ្រប់គ្រងប្រទេសចិនបាន៣អាណត្តិឬ ស្មើនឹង១៥ឆ្នាំ។ ទោះយ៉ាងណាមិនទាន់មានការលើកឡើងជជែកជាផ្លូវការពីបញ្ហានេះនៅឡើយទេ។
រដ្ឋធម្មនុញ្ញរបស់ចិន បានកំណត់ថា អាណត្តិប្រធានាធិបតី កំណត់ពេលដូចការធ្វើសមាជគណបក្សថ្នាក់ជាតិគឺ៥ឆ្នាំម្តង។ អាណត្តិប្រធានាធិបតីដែលមានរយៈពេល៥ឆ្នាំនេះ គឺអាចបន្តបានតែម្តងគត់គឺ៥ឆ្នាំទៀត ហើយរាល់ការបញ្ចប់ឬ តែងតាំងប្រធានាធិបតីថ្មីធ្វើឡើងដោយសមាជបក្សកុម្មុយនីស្តថ្នាក់ជាតិ។