HRW ស្នើមេដឹកនាំអាស៊ានបង្ខំឲ្យ លោក ហ៊ុន សែន បញ្ឈប់ចេតនារំលាយបក្សប្រឆាំង

រូបភាពពីហេ្វសប៊ុកលោកនយករដ្ឋមន្ត្រី​​​​ ហ៊ុន សែន

អង្គការឃ្លាំមើលសិទ្ធិមនុស្សអន្ដរជាតិមួយ ស្នើឲ្យមេដឹកនាំកំពូលអាស៊ាន ពិភាក្សាអំពីបញ្ហាសិទ្ធិមនុស្សនៅកម្ពុជា និងបង្ខំឲ្យរដ្ឋាភិបាល របស់លោកនាយករដ្ឋមន្ដ្រី ហ៊ុន សែន បញ្ឈប់ការប៉ុនប៉ងរំលាយគណបក្សប្រឆាំង នៅមុនការបោះឆ្នោត។

អង្គការ​ឃ្លាំ​មើល​សិទ្ធិ​មនុស្ស​អន្ដរជាតិ Human Rights Watch បានអំពាវនាវ ទៅមេដឹកនាំអាស៊ានទាំងអស់ ដែលកំពុងចូលរួមកិច្ចប្រជុំស្ដីពី «វេទិកាកិច្ចសហប្រតិបត្តិការសេដ្ឋកិច្ចនៅតំបន់អាស៊ីប៉ាស៊ីហ្វិក និងអាស៊ាន​» នៅប្រទេសវៀតណាម ឲ្យដាក់គំនាបលើរដ្ឋាភិបាលកម្ពុជា ដែលថា កំពុងចង់រំលាយគណបក្សសង្គ្រោះជាតិ នៅមុនការបោះឆ្នោតនាឆ្នាំក្រោយ។ នេះដោយយោងតាមសេចក្ដីថ្លែងការណ៍ ចេញផ្សាយនៅថ្ងៃទី៩វិច្ឆិកាម្សិលមិញ។

បើតាមសេចក្ដីថ្លែងការណ៍ អង្គការអន្ដរជាតិ Human Rights Watch ក៏ស្នើឲ្យមានការដោះលែង អ្នកទោសនយោបាយ ដែលកំពុងជាប់ឃុំក្នុងពន្ធនាគារ ដោយថា ដើម្បីកុំឲ្យកម្ពុជា វិលទៅរកការដឹកនាំ ដែលមានបក្សតែមួយ គ្រប់គ្រងប្រទេស។

ប៉ុន្ដែ ក្នុងពិធីជួបជាមួយកម្មករ កាលពីថ្ងៃទី៨ខែវិច្ឆិកាថ្មីៗនេះ លោកនាយករដ្ឋមន្ដ្រី​ ហ៊ុន សែន បានលើកឡើងជាថ្មី អំពីចេតនាចង់រំលាយគណបក្សសង្គ្រោះជាតិ ដែលមានអ្នកគាំទ្រជិតពាក់កណ្ដាលប្រទេស ដោយលោកអះអាងថា នឹងត្រូវរំលាយជាដាច់ខាត ខណៈរដ្ឋាភិបាលរបស់លោក ចោទមេបក្សមួយនេះថា បានឃុបឃិតជាមួយអាមេរិក ដើម្បីផ្ដួលរំលំរដ្ឋាភិបាលស្របច្បាប់។

គួររំលឹកថា កាលពីខែមករាឆ្នាំ២០១៧ ​កន្លងទៅ អង្គការ Global Witness  ក៏ធ្លាប់ស្នើសុំ ប្រទេសស្វីសដែលជាម្ចាស់ផ្ទះនៃវេទិកាសេដ្ឋកិច្ចពិភពលោក បណ្ដេញលោក ហ៊ុន សែន ចេញពីវេទិកានោះផងដែរ ដោយចោទថា លោក ហ៊ុន សែន ជាជនផ្ដាច់ការ និងធ្វើបាបតែពលរដ្ឋខ្លួនឯង៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ