គ.ជ.ប អំពាវនាវជាថ្មីឲ្យពលរដ្ឋទៅមើលឈ្មោះឡើងវិញ ខណៈជិតផុតការផ្សាយបញ្ជីឈ្មោះ

គេហទំព័រសម្រាប់ពិនិត្យមើលឈ្មោះអ្នកបោះឆ្នោត​មានអាសយដ្ឋាន ​www.voterlist.org.kh

គណៈកម្មាធិការជាតិរៀបចំការបោះឆ្នោតបានអំពាវនាវជាថ្មីដល់ប្រជាពលរដ្ឋដែលបានចុះឈ្មោះបោះឆ្នោតរួចហើយ ឲ្យទៅពិនិត្យឈ្មោះឡើងវិញ ខណៈនៅសល់តែ២ថ្ងៃប៉ុណ្ណោះ ត្រូវផុតកំណត់នៃផ្សាយបញ្ជីឈ្មោះ។

នៅក្នុងសេចក្ដីប្រកាសព័ត៌មាន ចេញផ្សាយកាលពីថ្ងៃពុធ ម្សិលមិញ គ.ជ.ប បានទទូចឲ្យប្រជាពលរដ្ឋខ្មែរដែលបានចុះឈ្មោះបោះឆ្នោតរួចហើយ ទៅពិនិត្យមើលឈ្មោះ និងផ្ទៀងផ្ទាត់ទិន្នន័យក្នុងបញ្ជីបោះឆ្នោតដំបូងឡើងវិញ ដោយថាដើម្បីឲ្យពួកគេអាចប្ដឹងតវ៉ា ឬប្ដឹងជំទាស់ ចៀសវាងបាត់បង់ឱកាសបោះឆ្នោតដោយប្រការណាមួយ។ គ.ជ.ប ឲ្យដឹងថា ប្រជាពលរដ្ឋអាចទៅមើលឈ្មោះពួកគេឡើងវិញនៅតាមឃុំសង្កាត់នានាទូទាំងប្រទេស ឬក៏អាចពិនិត្យមើលតាមគេហទំព័រ www.voterlist.org.kh បានផងដែរ។

ក្នុងករណីបាត់ឈ្មោះដោយពុំត្រឹមត្រូវ  គ.ជ.ប ឲ្យដឹងថា អ្នកពាក់ព័ន្ធអាចប្ដឹងទៅក្រុមប្រឹក្សាឃុំសង្កាត់ ក្នុងរយៈពេល១០ថ្ងៃយ៉ាងយូរ បន្ទាប់ពីថ្ងៃបិទផ្សាយបញ្ជីបោះឆ្នោតដំបូង។ ប្រសិនបើ ក្រុមប្រឹក្សាឃុំសង្កាត់បដិសេធបណ្ដឹងតវ៉ា ឬបណ្ដឹងជំទាស់ ពួកគេអាចប្ដឹងបន្ដទៅ គ.ជ.ប ក្នុងរយៈពេល៥ថ្ងៃយ៉ាងយូរ និងអាចប្ដឹងទៅក្រុមប្រឹក្សាធម្មនុញ្ញទៀត បន្ទាប់ពីទទួលបានសេចក្ដីសម្រេចរបស់ គ.ជ.ប។ ចុងក្រោយ សេចក្ដីសម្រេចរបស់ក្រុមប្រឹក្សាធម្មនុញ្ញ ជាសេចក្ដីសម្រេចបិទផ្លូវតវ៉ា។

បើតាម គ.ជ.ប ការបិទផ្សាយបញ្ជីឈ្មោះដំបូង បញ្ជីឈ្មោះអ្នកត្រូវលុបចេញ និងការប្ដឹងតវ៉ា ឬប្ដឹងជំទាស់ ដែលបានចាប់ផ្ដើមពីថ្ងៃទី៣ មករា​ នឹងត្រូវបញ្ចប់នៅថ្ងៃទី១៤ ខែមករា ឆ្នាំ២០១៧ ខាងមុខនេះហើយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ